مأسي الغربة والبعد عن الوطن

يمه جيت راجع عشانكم

وغربتي مليت دروبها

حزن دائم ودمعه كابه

وكل حاجه كمان غريبه

وناس قدر ما تحب عيونها

ما بتلاقي عيون حبيبه

شوق معذب وذكرى مره

وسيره ما بنقدر نسيبها

كل حاجه هنا بدراهم

وبي طرق قاسيه وصعيبه

بلدي أعظم وناسها اصدق

وعيشتهم في الدنيا طيبه

وان غلت في بلادنا حاجه

حتى كان قمره بنجيبها

أصلو عيشة الغربه قاسيه

وحتى ناسها كمان عجيبه



***

عزنا وعزة بلدنا فتنا منها وانخدعنا

موج سراب ودانا ليها ونحن سرنا وانقطعنا

قلنا رايحين قلتي لا لا ويمه قولك ما سمعنا

ودابو قولك جانا واقع إلا قبلو كمان وقعنا

ونحن مما فتنا دارنا في العيون يوم ما ارتفعنا

التمن يا يمه غالي ونحن ليهو الروح دفعنا

هم كبير ودرب خطير وسكه تب ماليها معنى

لا دراهم لا مظالم نحنا بس للعز رجعنا



***



الحياه لحظات قصيره يمه وين نلقاها تاني

وين بنلقى رضا الحبايب صبحوا يا حليلهم أماني

وبلدي مما فت منو ديمه سيرتو معذباني

والمكان الرحت ليهو أصلو يوم ما كان مكاني

ما قدرته أحس بفرحه والجمال غيركم عماني

وعقدة الذنب بي فراقكم يمه والاحباط شقاني

شلته دمعي وباقي شمعي وجيت أفتش عن حناني

ولو هربت أنا من بلادي كيف حاهرب من زمانى



***

يمه جد الغربه ذله والشقى اليوم هو المهاجر

يومو حسره وليلو آهات وعيشتو هم ما ليهو آخر

حتى ناس بلدي الهناك البسالمك يمه نادر

وحتى أقرب اقربائك لا بيحن ليك لا بيزاور

كل واحد يقضي ليلو ساهي في أوهامو ساهر

مره يحلم باللواري وهمو يصبح أغنى تاجر

ولما يصحى يبكي تاني لما يشعر روحو خاسر

أصلو دنيا الغربه سراً البيكشفو ما بيسافر



***



يمه أغفري لينا جينا لي بلدنا ولي ترابها

كلمي النيلين تصفق والصداقه تضوى بابها

والعصافير المهاجره خلى يبقى النيل شرابها

وتوتي بي خضرة جروفها وضىء أماسيها ورحابها

والمدن الزاهيه ترقص بكره بيرجعوا كل شبابها

وكل واحد فات بلادو ضاق شقا الغربه وعذابها

حس إنو بلادو أجمل مهما كل الغالية جابها

أصلو عزك في بلادك وفيها سيرة الموت حبابها

اقتباس :

التمن يا يمه غالي ونحن ليهو الروح دفعنا

هم كبير ودرب خطير وسكه تب ماليها معنى

لا دراهم لا مظالم نحنا بس للعز رجعنا

أيهــــــــــــــــا المايسترو ... اعزف فينـــــــا ذلك النغم الحزين
فقد توطن الحزن في أرجـــائنا ... وأصبحنــــا ندفع في الثمن
طيلة سنين ... شوق وألـــــــم ..فراق وبعــــــــاد
لـــك ودي يا مايستروا ....

المايسترو


كيف حالك يا ود حبوبتى انشاء الله تكون مبسوط والله الحمد لله ياسر كويس والحمدلله متواصلين معاه شكرا للسؤال وفى انتظار المزيد من ابداعك

مشكور جددا

المايسترو قصيدتك رائعه وجميلة وحاجة حلوة شديد لكن زي ما قال الأخ حسن:
(الجابرك شنو على المر قال لهم الامر منه)

فحب الوطن شيء جميل

بس الجري وراء لقمة العيش

وتحسين الأوضاع ووووووووووو حاجات تانية كثيرة خليها

هي التي تركت الناس تبعد عن الوطن

الفنان الرابع بادي محمد طيب طيب الله ثراه قال حاجة حلوة في حب الوطن

في رائعته المعروفة

( في الؤاد ترعاه العناية)

في الفؤاد ترعاه العناية
بين ضلوعي الوطن العزيز
لي عداه بسوي النكاية
وان هزمت بلملم قواي
غير سلامتك ما لي غاية
إن شاء الله تسلم وطني العزيز
ليه ما ارعي الوطن الرعاني
والدهاه اشيله واعاني
الشباب والشيب شجعاني
قالوا نفدي الوطن العزيز
بقاسمه حظه سواده وبياضه
وايه مرادي انا غير مراده
ارعي نيله اشجع بلاده
يشيلوا حمل الوطن العزيز
عندي وطني بقضيلي حاجة
كيف اسيبه واروح لي خواجه
يغني وطني ويحيجني حاجة
لي عدوك ياوطني العزيز
طبيعي اعشق صيده ورماله
وما ببيعه واقول مالي ماله
وما بكون آلة البي حباله
داير يكتف وطني العزيز
علمونا اهل الحضارة
كيف اضوق شان وطني المرارة
والمحن برضاي اصلي ناره
خوفي تحرق وطني العزيز
شفنا فيه جواب فيافي
والبطير وبسابق السوافي
ما مراده عفارم عوافي
بس يعظم وطني العزيز
نحن للقومية النبيلة
ما بندور عصبية القبيلة
تربي فينا ضغائن وبيلة
تزيد مصايب الوطن العزيز

الاخ المناضل
ما نيل الاما نى بالتمنى و لكن تؤخذ الدنيا غلابا
بالحب والخير والجمال ينتصر الانسان على مايلاقيه فى هذه البسيطة
من عذاب والام يجدها الانسان فى الغربة وفى كنف الحياة عامة .
هذه هى فلسفة الشاعر إليليا ابو ماضى وعبر عنها قائلا :
[] أيها الشاكى وما بك داء كيف تغدو إذا غدوت عليلا

هو عبء على الحياة ثقيل من يظن الحياة عبئا ثقيلا
والذى نفسه بغير جمال لايرى الوجود شيئا جميلا
كن هزارا فى عشة يتغنى لا غرابا فى الليل يبكى الطلولا
صلاح امرك لاخلاق مرجعه فتقوم النفس بالاخلاق تستقم[/size


يعنى ياعزيزى الفاضل زى ما قال أخونا الطيب بخيت فى الفؤاد ترعاه العناية
ونحن للقومية النبيلة .
هجرة الاوطان لم تكن للرفاهية ولكن لاهداف سامية خاصة الاخوة السودانين يتغربون ويضحون
من أجل غيرهم لاشياء كثيرة تختلف من شخص لاخر وو................
وكما قال الحكيم لابنه :
يابنى أكلت الحنظل ، وذقت الصبر، فلم أر شيئا أمر من الفقر ، فإن إفتقرت فلا تحدث به الناس
كيلا ينقصوك ، ولكن اسال الله تعالى من فضله فمن ذا الذى سأل الله فلم يعطه ، او دعا ه فلم يجيبه
او تضرع إلبه فلم يكشف ما به . ونسأل الله يتقبل دعائنا ويرجعنا لاوطاننا سالمين غانمين .