الكرسى..........الساخن..........

اغدآ القاك...........؟
فيا خوف فؤادي من غـــــــــــدآآآ.........؟
قول ليهو امش ساكت ما تخاف ابوهم مافي .. بس شيل معاك كيس برتكان و 2 كيلو موز وباسطة!

*******************************************

طمنتني يا عبد الله هي كان ابوهم قام جا اشيل البرتكان واشيل رجلي

والله ياعبدالله لميت في أستلتي معطهن معيط شديد
يازول ده كلام شنو مافي حاجه اسمها ماعارف
تفتش لحدي ما تلقا الإجابه الصحيحة وتجيبها وتجي
Choose silence of all virtues, for by it you hear other men's imperfections, and conceal yoيur own
Yes it's!!cc

عليك الله يس اتز دي شنو أسه
أنا قلت ليك ده توقيع من تقول لي يس اتز .. والله حقو ننزلك من الكرسي الساخن ده اسه

إذا كان الكرسي ما زال ساخناً أتقدم لعزيزنا عبد الله محمد نابري، بأن يكتب لنا نبذة و لو مختصرة عن تجربته في رابطة طلاب الجريف شرق ، وعن جريد الجريف و أين هما الآن؟

مع تقـــــــديــــــر الخــــــالص جـــــــداً

عبد الله سلامات يا خوي :-

عساك بالخير دوام مبسوط:-1

1/موقف انساني في راسك وما نسيتو؟

2/قصة واقعية حدثت لك ولم تنساها ؟

3/ قصة حب في في خيال عبد الله ولم تنتهي ؟

4/شخصية اسلامية ؟

5/سخصية ثقافية؟

6/ اغنية ترددها ؟

7/ فنان سوداني يستمع له عبد الله ؟

8/ فنان عربي ؟

واغنية عربية

واخيرآ ابيات من الشعر

يا اهل الحلة

في الصفحة رقم 2 رفعنا الحظر علي ودنابرى

بعد ما قال التوبة . وفتحنا الباب للاعضاء

وماشايفين لينا سؤال طاشى.

ولا ود نابرى اداكم رشوة

عمر حسن حمزه كتب:: إذا كان الكرسي ما زال ساخناً أتقدم لعزيزنا عبد الله محمد نابري، بأن يكتب لنا نبذة و لو مختصرة عن تجربته في رابطة طلاب الجريف شرق ، وعن جريد الجريف و أين هما الآن؟
مع تقـــــــديــــــر الخــــــالص جـــــــداً

عمر حسن حمزة "اسمك رنان" مشكور جدا على السؤال ده ويمكن هذا السؤال
يكون موضوع بوست كامل في المنتدى لانو قضية تحتاج لمعالجة "رابطة طلاب الجريف شرق بالجامعات والمعاهد العليا"

على العموم انا قاعد اجهز في الرد على السؤال ده بجيك راجع .. وراجعين "بتاعت بدر"

بلبل حبيبي اتنمى ان ترضى الاجابات التالية غرورك..

موقف انساني في راسك وما نسيتو؟
كنت اسير في الطريق من مكة لجدة واوقفتني دوريات الشرطة .. فسألوني ان كنت سوداني قلت نعم .. فقالوا خذ معك هذه العجوز فوجدتها امرأة كبيرة في السن ومن خلال قصتها تبين لي ان ابنها اراد ان يهربها من جدة لمكة وتركها تركب في سيارة وركب هو في سيارة اخرى ولسوء حظها اوقفتها الدوريات ولم يسمحو لها بالمرور المهم يبدو انهم ارادو ان يتخلصو من مسئوليتها فسلموها لاقرب سوداني – وده بيأكد ليكم انو لسه سمعة السودانيين بالخارج بخير – يعني ناس الدوريات عارفين انو أي سوداني يمر ممكن يساعدها والا لما سلموني لها .. المهم قلت لها اين ابنك فذكرت لي اسمه وقالت لي هو يعمل في باب شريف يا معز وطبعا باب شريف سوق كبير والوقت كان متأخر فاخذتها معي للمنزل .. فأكلت؛ وشربت ؛ونامت بعد ان اعياها التعب والارهاق وفي الصباح اخذتها لباب شريف ومن محاسن القدر اول محل سألتو عن اسم ابنها دلاني عليه وعندما ذهبت للمحل لقيت الولد لم يحضر للدوام لانه رجع لمكة للبحث عن امه في الدوريات .. المهم اخذت تلفونه واتصلت عليه واخبرته ان والدته معي ولا استطيع ان اصف لكم كيف كان اللقاء بينهما دموع واحضان وبكينا التلاتة!!

قصة حب في في خيال عبد الله ولم تنتهي ؟
لا توجد لدي قصة حب لم تنتهي بعد؛ قصص الحب العندي كلها انتهت!

شخصية اسلامية ؟
د. عصام أحمد البشير

سخصية ثقافية؟
الشفيع السلس الجزولي

اغنية ترددها ؟
اخونك ...

فنان سوداني يستمع له عبد الله ؟
زيدان ابراهيم

فنان عربي ؟
فنانة عربية : وردة الجزائرية

واغنية عربية
بتونس بيك ..

واخيرآ ابيات من الشعر
نحن قوم ياحبيبي قد خلقنا للجمال
ان اجاد الله في الخلق اجدنا في المقال

تمام ياود نابرى

هااااااااااااااااااااااااك:
[size=29]مازا تعنى الصداقة لعبد الله نابرى[/size]

مشكور الوافر عبد الله علي الردود الشافية ودي كانت مشاركتي في الكرسي الخاص بي صديقي عبدو وموقفك جميل وانساني بالفعل فكون بخير

سلامات يا راقي

بس الاغنية جميلة ونتمني انك ماتخونو حتا لو شافت عيونو

أخوي عبدو أنا من زمان متعود بنتظر الأكل في (قعر الحله ) وعشان كدة أنا جاي بعد فك الحظر عن عبدالله وداخل بالإسئلة دي .. عشان نحصل خم الرماد!!!!
- عبدالله إنت منو ؟
-باقة شوك لمن تهديها با ودنابري؟
- اسوأ خبر سمعته...؟؟
- شخص لاترفض له طلبا ..؟؟
-ماهي التجربه التي تتمنى تكرارها ...؟؟
-من هو توأم روحك ...؟؟
-مالذي يشعرك بأكثر قدر من الحرج...؟؟
-جريمه تتمنى ارتكابها...؟؟
-لو أعطوك قطعة فحم صغيرة وجدار نظيف ماذا سترسم عليه ؟
- يا عبدالله لو أكملت خطوبتك بعد الشوفة الشرعية .. وتعلق قلبك ببنت الحلال هذه .. وتزداد ضربات القلب لديك في كل مرة تقابلها .. وأنت في هذه الحالة طلبت منك فجأة كده بأن تقلب الهوبة أمامها ... ماذا ستفعل؟ .

عبدو(كمبيوتر) كتب:: تمام ياود نابرى
هااااااااااااااااااااااااك:
مازا تعنى الصداقة لعبد الله نابرى

بالجد تعني الكثير .. فأنا من الناس المغرم بالصداقة والاصدقاء .. رب اخ لك لم تلده امك دي قاعدة وضعها الرسول (ص) وطبعا ما في شك ان علاقة الاخوة علاقة كبيرة وعظيمة بحكم الدم .. بس كون انو الصديق يقول عليه الرسول "اخ لك" فده يعني ان الصداقة عند الرسول (ص) لها معنى كبير..

فانا احب الاصدقاء واحرص تماما على تكوين صداقات قوية شديد تمتد للاسر ..
شكرا .. يا كمبيوتر فإنت صديق اسفيري ؛
وعندما قريب "بعد اشوفك شوفة شرعية" حاتكون - رضيت ام ابيت - صديق حقيقي!

عبدالله محمد نابري كتب:: ولا استطيع ان اصف لكم كيف كان اللقاء بينهما دموع واحضان وبكينا التلاتة!!

أم كانت رايحة ولقت ولدهــا وولد أمو رايحة ولقاها انت وبكو لحظة اللقاء
انت المبكيك شنو ؟؟ ده سؤال

انت المبكيك شنو ؟؟ ده سؤال

الهندي اخوي ياخي عبد الله دا قلبو طيب وعطوف وحنون ياخي مالك عليهو

عصام عبدالصادق كتب:: أخوي عبدو أنا من زمان متعود بنتظر الأكل في (قعر الحله ) وعشان كدة أنا جاي بعد فك الحظر عن عبدالله وداخل بالإسئلة دي .. عشان نحصل خم الرماد!!!!

عارف يا عصام فعلا كنت خائف من طلتك "المسخة اللذيذة" دي بس اهو جاوبنا على قدر ما قدرنا
عبدالله إنت منو ؟
يا عصام السؤال فعلا سخّن بي شديد ما بقدر ارد عليهو وبالجد سخنت!

باقة شوك لمن تهديها با ودنابري؟
للمهندس العمل شارع الجريف بالنص لانو اول مرة في حياتي اشوف طريق سريع يكون طريق الخدمة بتاعو عكسو ..

اسوأ خبر سمعته...؟؟
وفاة جون قرنق حسيت بوفاتو انو السودان ده لن ينصلح حاله ابداً

شخص لاترفض له طلبا ..؟؟
مديري المباشر!

ماهي التجربه التي تتمنى تكرارها ...؟؟
تجربة الثقل النوعي " استاذ الكيمياء في الثانوي عمل لينا التجربة دي وهي عبارة عن وضع حجر في اناء به ماء وبفعل ثقل الحجر يخرج من الاناء ماء يساوي وزن الحجر .. المهم الاستاذ - وبالجهد الذاتي - استخدم "الشرقرق" بتاع ست الشاى في المدرسة "وحصحاصة" ولان مخرج "الشرقرق" كان مقفول لم يخرج الماء من "الشرقرق" طبعا الاستاذ اصبح محرج جدا ونحن قعدنا نضحك عليهو فقام بطرد الفصل كلو من الحصة!

من هو توأم روحك ...؟؟
هندي ود البشير عمي

مالذي يشعرك بأكثر قدر من الحرج...؟؟
تلاقي واحد ويكون بعرف اسمك وانت ناسي اسمو وتشبكو كيف يا شاب ولّا يا حاج ولّا ولّا ...الخ

جريمه تتمنى ارتكابها...؟؟
ادخل القفص ...

لو أعطوك قطعة فحم صغيرة وجدار نظيف ماذا سترسم عليه ؟
برسم لي دكاكين في الزلط !

يا عبدالله لو أكملت خطوبتك بعد الشوفة الشرعية .. وتعلق قلبك ببنت الحلال هذه .. وتزداد ضربات القلب لديك في كل مرة تقابلها .. وأنت في هذه الحالة طلبت منك فجأة كده بأن تقلب الهوبة أمامها ... ماذا ستفعل؟
حاقلب "الشُنْقُلُت لاني ما بعرف اقلب الهوبة!

جريمه تتمنى ارتكابها...؟؟
ادخل القفص ...

عبد الله ياخوي وضح القفص الزهبي ولا ياتو قفص

الهندي بشير نابري كتب:: أم كانت رايحة ولقت ولدهــا وولد أمو رايحة ولقاها انت وبكو لحظة اللقاء
انت المبكيك شنو ؟؟ ده سؤال

خليهو يا بلبل .. الدور ماش عليهو!
لكن سؤالك ده يا هندي زي الزول القاعد مع جماعة وجابو الاكل وعشان يلّخموه
قالو ليه: كدي احكي لينا قصة سيدنا يوسف؟
قال ليهم : مو صغير راح من أهلو ولقوه!
يعني قصة سيدنا يوسف سورة كاملة في القرآن عبارة عن" صغير راح من اهلو ولقوهو"
انا حكيت موقف انساني كامل من جدة لمكة وباب شريف والدوريات و و و و .. بس انت ما لقيت غير دي!!
سبحان الله .. إمكن لحكمة!!!

نبيل احمد علي كتب:: عبد الله ياخوي وضح القفص الزهبي ولا ياتو قفص ]

قفص الحمام يا بلبل! قفص الحمام..

والله يا عبد الله ياخوي الهندي حبيبنا بي كلامو الفي شارع النيل داك شكلو كرسيهو ما حينتهي

ههههههههههههههههههههههههههههههههههههههههههههههههههههههههههههههههه
قفص الحمام يا خاين

كويس انا قاعد اقول عليهن (حمام) يا نبيل في واحد اسمو وليد مامون من محطة 8 لو بتعرفو!
بيطلق على البنات عموما مصطلح (الغنم) وعندو اسباب كتيرة جدا لهذا المصطلح!
1- ما بفهمن بسرعة ..
2- الواحد بتكون ماسكة منديل الورق في يديها ويكون اتوسخ وما بتجدعو ذي الغنماية لمّا تأكل ليها كيس بلاستيك!
3- بمشن جنب الحيطة - ولو بتلاحظ الحيط الفيها "طرطشة" بيكون في خط طويل بفعل احتكاك الغنم بالحيطة
4- واسباب كتيرة اخرى بس انا ما متذكره كلها.
طبعا الله يكرم السامعين وده ما كلامي ده كلام وليد مامون ..

كتب عبد الله :

وده ما كلامي ده كلام وليد مامون ..

أحيييييييييييي أنا

سوال ود للرايعين

عصام وعبد الله

باقة شوك لمن تهديها با ودنابري؟
للمهندس العمل شارع الجريف بالنص لانو اول مرة في حياتي اشوف طريق سريع يكون طريق الخدمة بتاعو عكسو ..

والله لو سالوني السوال ده

وادوني الخيار قول اشنقوها
عديل المهندس ده
ولينا عوده
مع السماني

هو شارع الجريف بالنص براهو القلبو فيهو الهوبة مهندسينا المدنيين مع الاعتذار للمهندسين المدنيين .

مهندس الكتروني

عبدالله محمد نابري كتب:

الهندي بشير نابري كتب:: أم كانت رايحة ولقت ولدهــا وولد أمو رايحة ولقاها انت وبكو لحظة اللقاء
انت المبكيك شنو ؟؟ ده سؤال

خليهو يا بلبل .. الدور ماش عليهو!
لكن سؤالك ده يا هندي زي الزول القاعد مع جماعة وجابو الاكل وعشان يلّخموه
قالو ليه: كدي احكي لينا قصة سيدنا يوسف؟
قال ليهم : مو صغير راح من أهلو ولقوه!
يعني قصة سيدنا يوسف سورة كاملة في القرآن عبارة عن" صغير راح من اهلو ولقوهو"
انا حكيت موقف انساني كامل من جدة لمكة وباب شريف والدوريات و و و و .. بس انت ما لقيت غير دي!!
سبحان الله .. إمكن لحكمة!!!

ياناس الحلة هوى

الكرسى سخن بنبيل

كمبيوتر سلامات

وسلامات للكل

طالما الكرسي بتاع عبد الله انتهي زيد الحطب بعد دا خلاص

» النجم ( ودنابرى ) اول ضيف علي الكرسى الساخن
» فضل اية الكرسى
» الكرسى...الساخن2