الكرسى..........الساخن..........

احبة المنتدى السلام عليكم ورحمة الله

ضيفنا اليوم هو نجم بزغ فى سماء منتديات الجريف شرق
عزف لنا بحروفه الزهبية الحانآ خالدة ليضئ لنا بفكره عتمة
الظلام وينير سمائنا بمواضيعه المتلالئة بنور الكلمات وتوهج
الجمل ؛ وشاح بقلمه الزهبى عن ركيك الكلمات وابتزال
المعانى ليصيغ لنا الكلمات بطريقة ابداعية راقية لايمكن وصفها
فرسم لنا خطآ ثابتة عبر سلاسة الكلمات وقوة المعنى ليكون التميز
عنوانه للابد.

رحبو معى بى صاحب القلم الفضي

عبدالله محمد نابرى

لم اوفك حقك من التعبير

فلك منى احلى تحية

واشكرك علي تلبية الدعوه.
وبسم الله نبدا:

من هو عبدالله محمد نابرى

فهلا تفضلت بزكر بطاقتك الشخصية

ولنا عوده

عبد الله محمد عبد الله احمد نابري
مواليد الجريف شرق عام ؟؟19م جنسو شنو ما عارفو ذي وذي ناس كتيرين ! المهم امي محسية وابوي جعلي
السكن : الجريف شرق هب النسيم - حوش الضو
الدراسة : الابتدائي والمتوسط والثانوي عبر مدارس الجريف: هب النسيم المعهد ود السائح على التوالي
تخرجت من اكاديمية السودان للعلوم المصرفية..
مقيم في المملكة العربية السعودية
واعمل شركة بازل للاستثمارات المالية القابضة..
الحالة الاجتماعية : إنت سيد العارفين
ما عارف كدي كفاية !!!

العزيز عبدالله

شيل شيلتك مع الاعضاء لمن نفتح بابم بعدين ..

الاخ عبدالله محمد نابرى ماهو سر هزا الاسم ؟؟؟؟

( اسمك)
ولنا عوده

ما في اسم عندو سر .. لكن ممكن يكون عندو قصة وموجودة القصة بتفاصيلها (وخرفانها) في بوست اشتكي عبد الله نابري للكاتب ود ريا في قسم الشكاوى.

بعدين يا عبدوي ما تعملها ظاهرة كدي!!

ضيفى العزيز

اليك:_________________

المجموعة الاولى منتدانا

**
من اعضاء منتديات الجريف شرق لمن توجه:

1/ رسالة شكر ؟
2/ رسالة عتاب ؟
3/ رسالة شوق ؟
4/ رسالة نصح ؟
5/ رسالة تحزير ؟
6/ رسالة مؤاساة ؟
7/ رسالة خااااااااااااااااااااااااااااااصة جدآآآآآآآآآآآآ ؟؟
8/ رسالة ساخرة جدآ ؟
9/ رسالة استغاثة ؟
10/ رسالة طريفة ؟
11/ واخيرآ وليس آخرآ
رسالة شكوى؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الرجاء كتابة نص الرسالة واسم المستلم ؟؟.

وبصراحة.............................................

ولو ماتعبته انا قاعد ليك .

تفضل مشكور.

رسالة شكر ..
لهندي ود البشير عمي لسبب بسيط وهو انو هو سبب وجودي بينكم هو من دلاني على المنتدى وبالمناسبة لم تكن لدي اي خبرة بالمنتديات ولم اسجل قط في اي منتدى لجهلي باستخدامها وعدم معرفتي بها ... بس من أول ما سجلت في هذا المنتدى والامور مشت والحمد لله ..
بس طبعا رسالة واحدة ما بتكفي يا عبدو لانو من المفترض ان ارسل رسالة شكر لكل اعضاء المنتدى لوجودهم ودعمهم وحلّاتهم ..
رسالة عتاب :
للاخ لونقا الذي تم الترحيب به من اعضاء معروفين من المنتدى امثال عامر وتسالية ونبيل فاذا به يخرج عن اطار الزوق العام تماما ويكتب في بوست النكات نكتة بذئية اعتقد انها تمثل عدم احترام لنفسه اولا ثم لبقية اعضاء المنتدى عموماً..
رسالة شوق :
امي الله يسلمك .. مشتاق ليها شديد ..
الخضر حسن الفضل(الحتالة) والشفيع السلس الجزولي
ولكم ايها الرائعون .. مشتاق اشوفكم في لمّة ذي حقت شارع النيل والخرطوم بالليل!
رسالة نصح:
لشهاب الدين عبد الرحيم عثمان وتسالية .. السودان ملّحوق والعمر جاري..
رسالة تحذير:
ادارة المنتدى اذا لم تحرص شوية فدي مصيبة!
رسالة مؤاساة:
ما عندي ..
رسالة خاصة جداً:
طالما هي خاصة جدا فلماذا ارسلها؟؟؟؟؟
رسالة ساخرة جدا:
فطور العريس يتم فيهو توزيع اسكراشات .. طيب لو شبكتي اريبا اها العريس بعمل شنو ؟ يديني حق الاسكراتش حديدة! ولّا كيف ؟؟!!!!
رسالة استغاثة:
كبري الموت المنشية .. كل الموضوع عبارة عن صينية بتكلف 3 مليون واذا حسبنا الديات حقت الناس الماتو في الكبري كانت عملت صينيتين!!
رسالة طريفة:
حسن شمس الدين بعد ما وصل للمملكة قلت ليهو يا حس :البوست بتاع عرسك مشه شديد قال لي : والله دي كان كشف ما كان مشه كده!
رسالة شكوى :
لاولياء الامور(الاباء والامهات): العرس افضل لهم لو كانوا يعلمون ما تتمسكو شديد !!

اخوى ود نابرى لابت ليك لغاية ما اجيك زى

وزى الاعضاء .......

واليك :___________
منتدى الجريف هل هو :

فكرة ام نواة ---- ام بيت للونسة ----
ام خمول فكرى --ام هو خليط لا يمكن
ان يتجانس .

السؤال هو

ماهي نظرتك للمنتدى ؟؟؟؟؟؟؟؟؟؟؟؟؟؟؟؟؟؟؟؟؟
وعبى زى ماداير

الكرسى كرسيك -----والمجال لك

خش مشكور.

[size=24]الضيف الانيق - ودنابرى [/size]

هاااااااااااااااااااااااااااااااااك:____________________

1/ لو كنته فى ادارة المنتدى ماهى التغيرات التى
كنت سوف تقوم بها ؟؟؟؟؟ بصراحة؟؟؟.

2/ رأيك وبمنتهى الصراحة عن المشرفين الحاليين
للمنتدى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟.

3/ ازا طلب منك قرار تعيين مشرفيين جدد
واعفاء آخرين . ماهو نص القرار؟؟
(( الرجاء الاجابة بصراحة وبعيدآ عن الدبلوماسية ))

4/ هل يوجد لديك انتقاد لاحد المشرفين ؟؟؟؟؟

5/ هل توجد شخصية بالمنتدى تثير حفيظتك ؟؟

6/ هل هنالك مشرفين او اعضاء انزعجت
من ردودهم وتعليقاتهم ؟؟؟ فى حال
الاجابة بنعم ارجو التفصيل؟؟؟؟

7/ واخيرآ وليس آ خرآ بمازا تنعى الاسباب
لعزوف البعض من اعضاء ومشرفي
منتديات الجريف شرق ؟؟؟؟.

عبدو(كمبيوتر) كتب:: السؤال هو
ماهي نظرتك للمنتدى ؟؟؟؟؟؟؟؟؟؟؟؟؟؟؟؟؟؟؟؟؟
وعبى زى ماداير
الكرسى كرسيك -----والمجال لك
خش مشكور

مشكور يا كمبيوتر على السؤال ده ..
ذي ما قلت ليك لم تكن لدي اي رغبة في التسجيل في المنتديات لاحساسي إنك ممكن تكون بتكلم مع ناس افتراضين ولد مسجل بت بت مسجلها ولد .. يعني بصورة عامة كده لا توجد مصداقية وشفافية في المنتديات بس في هذا المنتدى بحس انو الموضوع ليس مجرد شاشة كمبيوتر وكي بورد بتحس بأنك موجود مع ناس تحمل نفس همك وتطلعاتك وفي نفس الوقت تكتسب علاقات ومعارف جديدة اغلبها من الطبقة المتعلمة (نظرا لمعرفتهم استخدام الكمبيوتر) وفي اعتقادي الشخصي ان هذا المنتدى ممكن ان يكون له دور ايجابي تماما في المنطقة ذي نادي السلام .. كل يوم نسمع فيهو باخبار جديدة وتطوّرات رهيبة اخرها افتتاح ملعب التنس وافتتاح مركز نت وتدريب الشباب على استخدام المنتدى .. يعني بعد شوية حاتلقه انو الناس اصبحت تتجه للكمبيوتر ولاحظ النقلة من قعدة كوتشينة وضمنة الي قعدة كمبيوتر ونت .. متخيل معاى الصورة!!
ولا يفوتني اجتماعكم بشارع النيل .. ما الذي جمعكم؟ وفيم كنتم تتناقشون وتتحاورون ..؟؟
وذي ما قال صديق النعمة المنتدي وسيلة وليس غاية .. واذا الناس اجتهدت اكتر من كدي ممكن ان تكون هناك بصمات واضحة للمنتدى في المنطقة ..
بحلم ب لافتة مكتوب عليها : جسر المشاه كبرى الجريف شرق( منتدى الجريف دوت كوم)
احب في هذه الفرصة ان اتقدم بالشكر لادارة ومشرفي هذا الموقع والمنتديات كده ولّا بلاش!!

عبد الله نابري سعدين بلقاك في الكرسي الساخن لدي سؤال اود من سيادتكم الاجابه عليه لوتكرتم ....

كتبت بوست بخصوص الشوفه الشرعيه وانتم باقي اليكم بسط ونازلين اجازه وطبعا في نية زواج
مدخل بسيط:

قيل لاحد الفلاسفه : كيف تختار امراتك ؟..

فاجاب: لا اريدها جميله , فيطمع فيها غيري .. ولا قبيحه فتشمئز منها نفسي .. ولا طويله فارفع لها هامتي .. ولاقصيره فأطاطي لها راسي .. ولاسمينه فتسد علي منافذ النسيم .. ولاهزيله فاحسبها خيالي .. ولا بيضاء مثل الشمعه .. ولا سوداء مثل الشبح .. ولاجاهله فلاتفهمني ولامتعلمه فتجادلني .ولاغنيه فتقول لي هذا مالي ولافقيره فيشقى من بعدها ولدي .

السؤال واضح اعتقد ؟
وبجيك راجع !!!

عبد الله نابري

تحياتي وكما قال العريس (حسن) سعيدين بيك
اولاً : متى يكون عبد الله عريس ؟
2- اذا اصبح عبد الله والي الخرطوم ماذا يفعل ؟
3- كما اعلم عبد الله رجل كاتب ورجل حساس لماذا لم نشوف
في هذا المنتدي كتابات عبدالله الجميلة ؟
4- لماذ انقطع الطيب بخيت عن المنتي ؟
كل الشكر والتقدير للاخ عبدو والأخ عبدالله نابري

الله يستر ... الفارس ماشي على وقعه ... والكرسي ليهو الله

الرائع المتألق عبدالله نابري مرحب بيك في الكرسي الساخن وربنا يكون في عونك
البقت المره دي بقت وماشاوروك وحتوك في الكرسي الساخن وانت بس شد حيلك
وأنا حأبدأ بالأسئلة
* قبل الأسئلة نريد تعريف كامل عنك الاسم السكن العنوان العمل وصورة من برج المملكة و الهاتف نبذة بسيطة عن الأسرة التي تنتمي إليها وتعريف عنها لباقي الأعضاء لكي تظهر لنا علاقات
الرحم بين الأعضاء ويسهل الربط ومعرفة الأرحام والأنساب

باسم الله ابتديت بالواحد القهار ..

1- منتدى الجريف شرق يعني لك الكثير .. احكي لنا عن حالك معه وعلاقتك به
2- الأعضاء بالمنتدى نجوم ساطعة .. بزغوا بلا استأذان .. فهل تعكس لنا رؤيتك
في المعايير التي من خلالها تعتبر العضو مثالي .
3- الزواج الهاجس الملازم كل يوم .. ماهي حكاياتك معه ؟
4- ماهي المقاييس التي تتمناها في شريكة المستقبل ؟
5- عبدالله وبصراحة بقيت على شنو في مسألة الشوفة الشرعية هل شفت ولا لسه ؟؟
6- الزواج من الأجنبية ماذا يعني لك .. هل تؤيد أم ترفض مع شرح للأسباب

هذا قليل من كثير قادم فقط كن بالجوار .. فنريد الغوص في أعماقك وكن كتاباً مفتوح
والحمد لله على مراد الله وكرسي شاحد الله وأهل الله لا اجي بيجنبو لا اقعد فوقوا ولا أضوقوا
ولا في الشارع ساي اسمع بيهو .. آمين يارب العالمين

اقتباس :: 1/ لو كنته فى ادارة المنتدى ماهى التغيرات التى
كنت سوف تقوم بها ؟؟؟؟؟ بصراحة؟؟؟.

بس حاكون مجلس ادارة واضح وبعدد كبير من الاعضاء لسد النقص والغياب الممكن يحصل في بعض الاحيان

اقتباس :: رأيك وبمنتهى الصراحة عن المشرفين الحاليين
للمنتدى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

والله ما فيهم كلام! الا الغياب والناس قتلت هذا الموضوع بحثا وخله بسيط جدا تعيين مشرف ونائب مشرف

اقتباس :: ازا طلب منك قرار تعيين مشرفيين جدد
واعفاء آخرين . ماهو نص القرار؟؟
(( الرجاء الاجابة بصراحة وبعيدآ عن الدبلوماسية ))

حافتح قسم جديد بعنوان "قسم المبدعين" واعينك يا كمبيوتر مشرف عليه

اقتباس :: 4/ هل يوجد لديك انتقاد لاحد المشرفين ؟؟؟؟؟
5/ هل توجد شخصية بالمنتدى تثير حفيظتك ؟؟
6/ هل هنالك مشرفين او اعضاء انزعجت
من ردودهم وتعليقاتهم ؟؟؟ فى حال
الاجابة بنعم ارجو التفصيل؟؟؟؟

الشخصية الوحيدة التي اثارت حفيظتي في المنتدى هو الحسن محمد الامين صاحب عامر ومع انه سخصية وهمية الا انني اعتقد ان هدفه الاساسي كان تدمير هذا المنتدى وانا لحدي الان مستغرب انو شخص يكون ده هدفه!بس الحمد لله ربنا كفانا شره وذلك بتجاهل الاعضاء له وعدم المشاركة في بوستاته

اقتباس :: واخيرآ وليس آ خرآ بمازا تنعى الاسباب
لعزوف البعض من اعضاء ومشرفي
منتديات الجريف شرق ؟؟؟؟.

المنتدى جميل ورائع وعزوف البعض عن المشاركة إمكن لصعوبة الحصول على النت في الجريف.

ود رياء كتب:: عبد الله نابري
تحياتي وكما قال العريس (حسن) سعيدين بيك
اولاً : متى يكون عبد الله عريس ؟
2- اذا اصبح عبد الله والي الخرطوم ماذا يفعل ؟
3- كما اعلم عبد الله رجل كاتب ورجل حساس لماذا لم نشوف
في هذا المنتدي كتابات عبدالله الجميلة ؟
4- لماذ انقطع الطيب بخيت عن المنتي ؟

اذا كنت والي الخرطوم يا ود ريا أول حاجة بعملها بعرّس (دي اجابة لسؤالك الاول والثاني)

السؤال الثالث: نزلت بقسم الخواطر بوست بعنوان قصص قصيره جدا جدا ولم تجذب الناس الا حكيم المنتدى وإتخيل يا ود ريا انا اتصلت على تسالية مشرف القسم كي يسجل رد عشان يرفع البوست للناس وقد فعل بس برضو ما لقيت تجاوب من القراء لذلك اعتقد ان محاولتي للكتابة ما كانت مقنعة!

السؤال الرابع: الطيب بخيت اليومين ديل مشغول شديد "دي ايام الموسم" والزول ده ما بيلعب في اللحم الحي.

حسن شمس الدين كتب:: قيل لاحد الفلاسفه : كيف تختار امراتك ؟..
فاجاب: لا اريدها جميله , فيطمع فيها غيري .. ولا قبيحه فتشمئز منها نفسي .. ولا طويله فارفع لها هامتي .. ولاقصيره فأطاطي لها راسي .. ولاسمينه فتسد علي منافذ النسيم .. ولاهزيله فاحسبها خيالي .. ولا بيضاء مثل الشمعه .. ولا سوداء مثل الشبح .. ولاجاهله فلاتفهمني ولامتعلمه فتجادلني .ولاغنيه فتقول لي هذا مالي ولافقيره فيشقى من بعدها ولدي .
السؤال واضح اعتقد ؟
وبجيك راجع !!!

حسن الزول ده فيلسوف : يعني ما تستبعد انو يكون معرّس القضية.. وبعدين مواصفاتو دي الا موديلات 1950 ~1960 بس الموديلات الجديدة من 1980 ~ 1990 صعب تتلقي بالشروط دي

الهندي بشير نابري كتب:: باسم الله ابتديت بالواحد القهار ..
3- الزواج الهاجس الملازم كل يوم .. ماهي حكاياتك معه ؟
4- ماهي المقاييس التي تتمناها في شريكة المستقبل ؟
5- عبدالله وبصراحة بقيت على شنو في مسألة الشوفة الشرعية هل شفت ولا لسه ؟؟
6- الزواج من الأجنبية ماذا يعني لك .. هل تؤيد أم ترفض مع شرح للأسباب

هندي ود البشير عمي ..

معليش!! انا حاجيب على الاسئلة اعلاه وقد حزفت بعضها لاني اجبت عليها مسبقا
وقبل الاجابة ارجع لعبارتك "بسم الله ابتديت بالواحد القهار" ياخوي الحكاية شنو اته عاوز تضبح ليك خروف ولّا شنو؟!! وشكلت كففت يديك وخاشي على بالجامد ما فاضل ليك الا تجيب ليك قرجة الشفيع وتجيني!!

السؤال الثالث:حكايتي مع الزواج انو بغير الحياة ببدلك بواحد تاني بس!
السؤال الرابع: والله ما عارف يا هندي الا اشوف البت في الاول
السؤال الخامس : الاجابة في السؤال الرابع
السؤال السادس: ما عارف قصدك بالاجنبية هل تقصد من جنسية اخرى ام بره الجريف عموما انا ضد مبدأ الزواج من خارج الجريف لأنو الزواج عمل خير وطالما هو كذلك افضل يكون في الاهل.

الحبيب عبدالله صباحك خير

وانا جيت .

هااااااااااااااااااااااااااااااااااااااااااااااااااااااااااااك:__

1/ الغربة:
مازا اضافت لعبدالله ومازا خصمت منه؟؟؟
2/ ماهو المنعطف الزى غير حياة عبد الله ود نابرى ؟؟؟

3/ وجه يضحك عبدالله ود نابرى ووجه اخر يبكيه؟؟؟

4/ سر تعلنه لاول مره ؟؟؟

5/ لو اعطيناك كراسة وقلم رصاص مازا سترسم؟؟؟؟

6/ بصراحه هل تتمنى ان يعود بك الزمن للوراء ؟؟ولمازا؟؟؟

عبدالله ياغالي

ماتخاف فضل ليك 600 سؤال بس؟؟

ويلا .... خش.

اقتباس :: 1/ الغربة:مازا اضافت لعبدالله ومازا خصمت منه؟؟؟

الخبرة العملية .. وفي الغربة بتحس انك قوي خاصة لمّا ترجع السودان وخصمت كل اللحظات الجميلة لم أتمكن من حضور ثلاث زيجات لاخواني واختى الصغيرة زمان كنت ببوسها عادي بجاى وبجاى.. اسه ما حاقدر! لانها كبرت..

اقتباس :: 2/ ماهو المنعطف الزى غير حياة عبد الله ود نابرى ؟؟؟

لسه ما وصلتو !! لسه باقي كم اشارة كده!

اقتباس :: 4/ سر تعلنه لاول مره ؟؟؟

كنت زعلان شديد من ود سنقد! بس اسه من احب الناس لقلبي..

اقتباس :: 5/ لو اعطيناك كراسة وقلم رصاص مازا سترسم؟؟؟؟

عروس!

اقتباس :: 6/ بصراحه هل تتمنى ان يعود بك الزمن للوراء ؟؟ولمازا؟؟؟

لا اتمنى أن يعود الزمن للوراء .. ليس بالامكان ابدع مما كان.

صديق النعمة حاج الطيب كتب:: عندي سؤال أرجو انك توصلو ليه: طبعاً في جزء من الأعضاء عرفتهم عن طريق المنتدى فمن هو الشخص الذي صورته في ذهنك و حاورته على هذه الصورة ثم وجدته مختلف تماماً عن الصورة، أو العكس؟؟

وصلني سؤالك يا Boss
هو الاستاذ/ الخضر حسن الفضل "الحتالة" .. كنت بسمع بحكيم المنتدي .. واتخيلت صورة الحكيم انو شخص كبير جدا في السن لابس نضارات سوداء "بتاعت وزارة الصحة" ويجلس على الكمبيوتر وهو منحنى الظهر ويكتب بصعوبة على الكي بورد بس كل كلمة بكتبها بتوزن جبل .. وحتى كنت بتحرّج ما عارف اناديهو باي لقب يا عمنا ولّا جدنا .!! لكن بعد ما شفت الصورة بقيت اقول ليهو الخضر عادي بس اضفت ليهو لقب جديد "الحتالة"

ضيفي العزيز / عبدالله

نواصل:________________

1/ قد يجمع الشخص عدة صفات

منها السيئة ومنها الحسنة ؟؟؟

** فما هى الصفة الحسنة التى يراها
عبدالله في نفسه ؟؟؟
** وما هى الصفة التى لا يحبها
ضيفنا في نفسه ؟؟

2/ امنية يتمنى ( عبدالله ) تحقيقها؟؟؟

3/ النسيان نعمة فما الشئ الزى
يتمنى نسيانه ضيفنا العزيز؟؟

4/ مازا يقول( عبدالله)لانسان جرح مشاعره؟؟؟

5/ كلمة قيلت لك فحركت فيك شئ ؟؟؟
وانته نادم من قائلها؟؟؟

6/ تمنيت ان تملك شئ فملكته ولاكن
ندمت بعد زلك لامتلاكك هزا الشئ ؟؟

7/حدثنا قليلآ عن

طفولتك يا عبدالله ود نابرى

وخش ليه قدام ..

الضيف الكريم

عبدالله ود نابرى

كلمات فى :_______ حق ____________:

1/ مقابر ناصر وكبرى المشاة ؟؟؟؟؟

2/ المراة في الجريف شرق . هل لها دور

ام الركود هو ديدنها؟؟؟؟؟؟؟؟

المؤتمر الوطنى

الحزب الشيوعى
انصار السنة
الاتحادى الديمقراطى
حزب البعث
الحركة الشعبية
الحزب الناصرى
حزب الامة

يا ضيفى العزيز فكفك الكيمان دى علي كيفك
وشوف ياتو واحد بصلح لقيادة البلد
بشرط ؟ انك تشوف نفسك تكون معاهم؟

بدون دبلوماسية وبمنتهى الصراحة
كما عهدتك عبد الله

خش

قد يجمع الشخص عدة صفات منها السيئة ومنها الحسنة ؟؟؟
**فما هى الصفة الحسنة التى يراها عبدالله في نفسه ؟؟؟
**وما هى الصفة التى لا يحبها ضيفنا في نفسه ؟؟
اسمعني عشان يكون كرسيك ساخن فخلينا من الصفة الكويسة احسن اديك "المسخنة" اقصد القبيحة ..
الصفة القبيحة التي اتمنى القضاء عليها .. التسرّع فانا متسّرع اكتر من زول قزازة السمن..

امنية يتمنى ( عبدالله) تحقيقها؟؟؟
بعد ده كلو وتقول لي امنية !!!!

النسيان نعمة فما الشئ الذى يتمنى نسيانه ضيفنا العزيز؟؟
والله ما متذكرو معانها نسيتو صاح "الحمد لله"

ماذا يقول( عبدالله)لانسان جرح مشاعره؟؟؟
الله يسامحك "وبالعكس"

كلمة قيلت لك فحركت فيك شئ ؟؟؟
في شحادة من جنسية خليجية كانت واقفة تشحد عند باب المسجد ولانها خليجية كنت مستغرب كيف خليجية وتشحد!! المهم وانا بعاين فيها باستغراب وبلاهه!! اذا بها تنهرني : إنقلع اقلب وجههك الاسود!! وفي الوقت داك جاني احساس انو أنا جنوبي .. حركت فيني هذه الكلمة العنصرية البغيضة القاعدين نمارسها في السودان .. واذكر في مرة ختّو لينا الفطور وناديت "ميري" تعالي افطري معانا ناس البيت شاكلوني شديد !!!
كنت بتمنى انو عمر البشير يأخد مرة جون قرنق عشان نقدر نحقق السلام الاجتماعي"المزعوم"

تمنيت ان تملك شئ فملكته ولاكن ندمت بعد ذلك لامتلاكك هذا الشئ ؟؟
الجوال "في بعض الاحيان".

عبدو(كمبيوتر) كتب:: المؤتمر الوطنى
الحزب الشيوعى
انصار السنة
الاتحادى الديمقراطى
حزب البعث
الحركة الشعبية
الحزب الناصرى
حزب الامة
يا ضيفى العزيز فكفك الكيمان دى علي كيفك
وشوف ياتو واحد بصلح لقيادة البلد
بشرط ؟ انك تشوف نفسك تكون معاهم؟
بدون دبلوماسية وبمنتهى الصراحة
كما عهدتك عبد الله
خش

بصراحة يا كمبيوتر انا ما عندي المقدرة للتحليل السياسي ... بس اقول ليك انو الشعب السوداني بحب التغيير وهو مؤيد بتلقائية لاي تغيير او انقلاب ولا يهمنا من يحكمنا يهمنا كيف يحكمنا!!

» النجم ( ودنابرى ) اول ضيف علي الكرسى الساخن
» فضل اية الكرسى
» الكرسى...الساخن2