محجوب شريف

موضوع: محجوب شريف السبت 27 أكتوبر 2007, 1:34 pm

قصايد لشاعر الشعب محجوب شريف (اى قصيده مكتوبه بالون مختلف)
مازلت بتذكر

أنا عارفه اسمك مين

أنا عارفه شفتك وين

!ما زلت بتذكر

!ما زلت بتذكر

الزمان يا شباب:

أكتوبر الأخضر

المكان:

شارع

غضبان بيتفجر

وكنا خمسه بنات..

عاملات هلال أحمر

نزحف مع الثوار..

ونضمد الجرحى

ضمّدت جرحك ليك..

وربطتو بالطرحه

وقبل انت تفيق.. من قبل ما تصحى

لقيتو اسمك فوق

مكتوب على الدفتر

وعرفتَ اسمك مين

وعرفت إنّك مين

وعرفت إنّك شاب..

بتحب بلادك موت

!مازلت بتذكر

ما زلت بتذكر

قزازة دم

واحلالي القبلي شال شبال لمع برق المهيرة

قيرة قيرة يا مطيره

يا رزاز الدم حبابك

لما يبقى الجرح عرضة ولما نمشي الحزن سيرة

من دمانا الأرض شربت موية عزبة

كل ذرة رملة شربت حبة حبة

موية أحمر لونها قاني

فتقت ورد الأغاني

تهدي لى اسمك رمزاً للوطن كنز المحبة

قيرة قيرة يا مطيرة يا شهيد الشعب أهلاً

مش بتطلع كل يوم الشمس أجمل

وكل يوم النخل أطول زيدو قامة

وياما شفتك ياما ياما

لما شفت البدر طالع فى سما الوطن ابتسامة

إنتّ فى النهر البسافر جاري طول العمر صاحي

طبعو منك يا الملامحك من ضفافي

واللي شافك مرة شافو

واسمك الختيتو فرهد عشب أخضر فى الجناين

فى الشوارع نيمة نيمة فى مصابيح المدينة

فى فوانيس الضواحي

تملا نادي الحلة سيرتك

اسمك الخلانا نقدر فى ظلام الليل نعاين

والبتسأل عنو ده الخليتو شافع

لسه دابو

يا ما حيعجبك ، شنابو

صوتو رقان فيهو بحة

ود فلان اصرار وصحة

عندو قصة حب جميلة

جرب آلام الحراسة وحرض أولاد الدراسة

وهدّو حيل العسكرية

البنية أم طرحة كبرت

يا سلام الفنجرية

ليها راية وبى كلامها وبى اهتماماتها الجديدة

دقت أجراس القصيدة وشدت أوتار الصلابة

الكتوف اتلاحقت فى السكة يابا

واحلالي القبلي شال شبال لمع برق المهيرة

قيرة قيرة يا مطيرة يارزاز الدم حبابك

لما يبقى الجرح عرضة

ولما نمشي الحزن سيرة

محــــــبة البينا ولا صداقـــــــــــــــة

محبّه البينا..

ولاّ صداقه؟

ولاّ بداية فرقه طويله؟

أهو بنتقابل نمشى ونضحك

وياما نعدّى أماسى جميله

وكم بتساءل..

وكم بتفاءل

ومرّه أكون غلبان الحيله

واسارع أسارع

أطوى الشارع

وبرضو

خطايا بشوفا تقيله

واساهر..

أطرّز باسمك غنيه

وأنوم والشمسِ

مسح منديلا

جبين الدنيا ولفّ جديله

وأقول أكتبلك..

أنا من قبلك

يمكن تبقى الخطوة عديله

وأقول أصبّر

يمكن نكبر

أكبر من تغلبنا وسيله

وتانى الشوق يشعلنى فتيلة

وافتش عنك..

واهرب منك

وسيرتك دايماً بمشى واجيلا

محبة البينا ولاّ صداقه

ولاّ بداية فرقة طويله

ليـــــــــلة الميـــــــــــــــــلا د

يا مشتل فرحنا الشّال..

ويا مرسى الشراع الضّال

ويا واحة قليباً كان زمن رحال

يفتش عن عيون إنسانه..

ينسى لديها حزناً طال

ولما لقاكِ فرّهد ياما

بالفرح اللى عندو محال

ولّما لقاكِ رسّلو القمر منديل

وركّت نجمه..

ضوّت فى الدرب قنديل

وهشّت زهره..

كانت تبكى طول الليل

وجات من بعد طول الهجره..

غنوات الحروف

وكانت ليلة الميلاد

أقدّم نفسك ليك:

إنسان..

عزاى الشعرِ والآمال

وطيبه القلب

وحسن الفال

واحب كلّ العيون لمن تحب عينيك

واحب كل القلوب

لمن تعاين ليك

من حبى ليكى عليك

الغــــــــــــائب : سافر زمان

سافر زمان

قُبال سنين

لا جاب جواب لا جاب خبر

أمُّو تسأل كل طاير

وكل عائد من سفر

خيالو ما فارق عيونها

وطيفو ما غاب

ليهو

وما زال هناك..

فى الركن داك

صوتو وغناهو وضحكتو

وصور المعلّقه فى الجدار

وجرايدو

والكتب الزمان

الليله كاسيهم غبار

مصباحو فى الركن الحزين

ومكانو ما زال فى انتظار

اصحابو انداد الطريق

قدّام عيونها مشو اخضرار

يا ماشى لى بلداً بعيد

قول للمخاصم أُسرتو

قول للطالت هجرتو

أمك هناك مادقّ باب

ماعاد قطار

ووصل جواب

اسمك تهزّها ذكرتو

والبيت وراك لو شفتو كيف

ضاعت مواسمو وخضرتو

يا حليلو لّمن كان صغير

تلميذ بيمشى المدرسه

تشفق عليهو من الطريق

وتخاف عليهو من المسا

كيف ينسى عِيديّه وحنان

وكفاح سنين كيفن نسا؟

سافر زمان

قبال سنين

لا جاب جواب

لا جاب خبر

موضوع: رد: محجوب شريف الأحد 28 أكتوبر 2007, 3:46 am

الرفيق تساليه / تحية ثورية ...

لك منى جل الشوق وانت تعطر سماء المنتدي بالرائع محجوب شريف ..
أكتب ما أستطعت ولا تقف فنحن نحتاج شيئاً كهذا !من الابداع الشعري ..
فالمنتدي بحوجة الى كل أبناء المنطقة لا تتوقف فانى لم أعهدك كسولاً...
اكتب فالقلم بداية كل شئ ..
كلنا يستطيع أن يفعل ومقدرتنا على الإنجاز داخل حدود المستحيل سوف تكون حقيقة
بترابطنا كأبناء منطقة واحدة فانى أدعو نفسى وكل أعضاء المنتدى بالعمل من أجل تلك الجميلة
الجــــــــــــــــــــــــــــريف

موضوع: رد: محجوب شريف الخميس 13 ديسمبر 2007, 8:50 am

اخى تسالية

لك كل التجلة والاحترام

اخى حقيقا لم اتمكن من قراءة القصيدتين وذلك لان الكبر دخل خلاص والخط كان صغير جدا

ولكن لابد ان تكون القصيدة ابداع لانها من شاعر كبير لذا ارجو منك ان تراجع هذه القصائد

وتحاول ان تعديلها الى خط كبير حتى نستمتع بها ودمتم فى حفظ الله ورعايته

ود العبيد

موضوع: رد: محجوب شريف الخميس 13 ديسمبر 2007, 4:42 pm

اها ياحافظ كده كيف؟؟

ومشكور على التنبيه
(لك منى مؤونة 100عام من الود)

اخى تسالية والله ما قصرت حقيت و اوفيت نحن يا اخوى خلاص كبرنا لكن لقيت لينا العلاج متعك الله بالصحة والعافية شكرا على هذه القصائد الابداع

موضوع: رد: محجوب شريف السبت 15 ديسمبر 2007, 12:01 am

اخى تسالية لك كل الود والاحترام ونسال الله ان يديم المحبة واكيد القصيدة حلوة وجميلة يكفى انها من العملاق الكبير شكرا والف شكر واتمنى ان نلتقى فى القريبانشاء الله ودالعبيد

» فى ذمة الله دكتور محجوب كمال الدين
» خالد محجوب اجمل صوت فنان ادا المديح عندكم شك..؟؟؟
» حديث شريف
» حديث شريف.
» حديث شريف..