ماهى هوية السودان؟؟؟؟؟؟؟؟

ما هي هوية السودان؟

أهو بلد عربي، أم افريقي، أم هو عوان بين ذلك؟

سؤال بحجم مليون مليون ميل مربع،
هي مساحة السودان الذي يغطي جسده المثخن بجراحات الحروب والإنقلابات السياسية والعسكرية،
مساحة كبيرة من خريطة أفريقيا وكذلك الوطن العربي.
نال السودان إستقلاله عن الحكم البريطاني في الأول من يناير/ كانون الثاني 1956،
واختار زعماؤه السياسيون على اثر ذلك الإنضمام الى جامعة الدول العربية.
ورغم أن القرار لم يثر آنذاك الكثير من الجدل حول مدى فائدة هذا الإختيار من عدمه،
إلا أن هذا الجدل كان يظهر ويغيب بين أوساط السودانيين وفقا للمناخ السياسي المتقلب باستمرار في البلاد.
غير أن سؤال الهوية عاد الى الواجهة،
وبكثير من الإصرار والإلحاح في الاونة الأخيرة،
كما أسهم في تأجيجه توقيع إتفاق السلام السوداني وما يحمله في باطنه من هواجس الوحدة أو الانفصال.
وتزامن ذلك مع تعالي أصوات دعاة العروبة أوالأفارقة الذين وضعوا اطارا منظما لخطابهم
عقب التطورات التي وقعت على الصعيدين العربي والأفريقي
الأمر الذي زاد من أهمية هذا الخطاب، ورفعه درجات في سلم اولويات الاجندة اليومية للسودان الجديد
الذي بشرت به الحركة الشعبية لتحرير السودان وعلى الرغم من ان الكثيرين يعتبرون أن سؤال الهوية يقع ضمن دائرة خطاب الصفوة
وانه لا يمس الحياة العادية للناس، الا ان البعض الاخر يجادل على أهمية السؤال بصفته مدخلا لرسم خريطة طريق جديدة للسودان يحتاج معها لحسم السؤال المعلق حول هويته
هل هو بلد عربى ام افريقى.؟؟؟؟؟؟

الاخ تسالية

سلام بالكوم
في اعتقادى الشخصى السودان بلد عربى
لانو لغتنا عربية ودينا اسلامى وهذا اكبر دليل على عروبتنا
فى حاجة تانية انت نسيت انو السودان عضو فى جامعة الدول العربية

عزيزى بوحة
سلامات يا رائع

لماذا نتشدق بالعروبة
السودان ليس بلد عربى انما فرضت علية العروبة من قبل الانظمة التى
تاتى على ظهر الدبابة
عزيزى السودان بلد افريقى الوجود عربى التطلع
اما بالنسبة للغة الانت بتبرهن بيها عروبتنا
اللغة يا عزيزى لاتعبر عن قومية معينة لان اللغة مكتسبة
والدين الاسلامى ماهو الدين القومى فى السودان
فى كمية من المسيحيين فى الجنوب
للاسف الشديد متذكر انو السودان اترفضت عضويته فى البداية
للانضمام لجامعة الدول العنصرية وتخيل لى اي زول مطلع على التاريخ
عارف راى لبنان فى انضمامنا لجامعة الدول العنصرية
وفى تقديرى المفروض ننسحب من جامعة الدول العنصرية لم نستفيد منها بل على العكس
الانتماء اليها سبب لنا المشاكل
واعتبرالانتماء الى العرب انتماء زائف لقد جررنا الى العروبة جرا رغم العرب غير معترفين بنا
حتى الموسيقى السودانية لاتجد اذن عربية تستمع لها بينما تنتشر فى افريقيا
حيث يعتبر وردى الفنان الاول فى اثيوبيا.
فى رئيس افريقى قال
كان بامكان السودان ان يكون افضل الدول الافريقية
لكنه اختار ان يكون اسوا الدول العربية
كلامو صاح

الرفيق تساليه جباك دبايوا
وتاني كلام كتير ......
الى ماذا نريد ان نصل
وهل هذه هى القضايا الملحة التى تواجه المواطن السودانى
لذا ما الداعى من اثارة مثل هذه الاسئلة
سؤال ليس من اولويات التنمية وليس من اولويات المواطن
وقد لا يحتل المرتبة المئة فى سلم الاولويات
مثل تلك الاسئلة سوف تتسع دائرتها لتشمل القبيلة ثم بطن القبيلة وفخذها حتى يتفتت السودان
الى كيانات ضغيرة
تخريمة:
انا افريقى انا سودانى

الاخ تساليه

مسكاكنى(سلام)

موضوعك فى غاية الاهميه

في رأيي لا أؤمن بشيء اسمه الهوية السودانية أو الهوية الأمريكية أو غيره
فلا توجد بقعة في الأرض يجتمع سكانها على معتقد واحد أو لغة واحدة
أو لون واحد أو عادات وتقاليد واحدة.
فلا يمكن أن نطلق اسم الهوية السودانية على بلد فيه مئات القبائل ومئات اللغات
واختلافات كبيرة في اللغة واللون والمعتقد،
حتى جغرافيا لا يمكننا أن (نحدد) هوية شمال السودان أو هوية جنوب السودان
فبالرغم من شيوع هذه التسمية إلا أن هناك اختلاف ثقافي وفكري بين أهل الشمال
وكذلك بين أهل الجنوب وأهل الغرب وأهل الشرق
ففي ظني أن كلمة (هوية) تحتاج إلى إعادة نظر.
وعلينا مناقشة أمر احترام الاختلافات العرقية والثقافية والعقائدية في بقعة واحدة.

باقــــــــة ورد

عزيزى المايسترو

لقد احرزت قووووووووووووووون شديد جدا ما يجبوا الا النقر فى زمنو

أخناتون كتب:: الرفيق تساليه جباك دبايوا
وتاني كلام كتير ......
الى ماذا نريد ان نصل
وهل هذه هى القضايا الملحة التى تواجه المواطن السودانى
لذا ما الداعى من اثارة مثل هذه الاسئلة
سؤال ليس من اولويات التنمية وليس من اولويات المواطن
وقد لا يحتل المرتبة المئة فى سلم الاولويات
مثل تلك الاسئلة سوف تتسع دائرتها لتشمل القبيلة ثم بطن القبيلة وفخذها حتى يتفتت السودان
الى كيانات ضغيرة
تخريمة:
انا افريقى انا سودانى

رفيقى في الغار

اخناتون (مسكاكنى)

عزيزى لطالما احببت مايسطره قلمك
لطالما احترمت طريقة تفكيرك فى تحليل المواضيع
سؤال الهوية سؤال مهم ظهر فى الاونة الاخيرة
والذى اجج هذا السؤال توقيع اتفاقية السلام
وما تحملة فى باطنة من هواجس الوحدة والانفصال.
عزيزى اخناتون قد ترى سؤال الهويه لايحتل المرتبة المئة
فى سلم الاولويات وانت حر فيما ترى
وانا شايف السوال ده مهم بقدر اهمية
جميع القضايا التى تمس حياة المواطن اليوميه..
مؤونة 100 عام من الود

عزيزى تسالية

ما كنت اريد فى الخوض فى بحركم العميق والذى لا يحتمل اى شى

سواء المشاهدة فقط ولكن الموضوع مهم ولا يقبل الحياد

والوقوف للمراقبة . عزيزى المسالة هذه مسالة عالمية الان عندى
سؤال لك اين الجنس الصافى الان فى كل العالم ، بالطبع لايوجد

ونحن نتفق ان العالم اصبح قرية صغيرة وهذه القرية سهلت سبل

الاختلاط بين القوميات ، واقرب مثل السودان حيث نجد ان القبائل
اختلطت اختلاط شديد وهذا يقود الى السؤال الاهم وانا افتكر راى المايسترو

هو الاصوب وهو كيف نوحد القوميات وجعلها تحترم بعض بدون عصبية

وجهوية ، وانا اعتبر ان هذا هو الاحسن والمفيد بالنسبة الى حالتنا فى السودان

عزيزى تسالية نحن عندنا فى الجريف نموذج لهذا الاختلاط حيث نجد ان رجل من الجريف

متزوج ما لايقل عن تسعة نساء جنوبيات وهن فى عين العدو وقول ماشاء الله ولم

يتزوج امراة شمالية قط وبرضو تقول مسالة هوية

ود العبيد

الرائع بروعة الحادو
هذا الموضوع جد صعب ولايمكن أن نقول فيه شيئا ؟؟؟
كما قال الدكتور منصور خالد :
هذا صراع مفتعل والغرض منه فى واقع الامر خلق بؤر للتنازع لاستغلالها سياسيا .
وكما قال :
( عراك فى غير معترك ) وامسك الخشب وراجعين sudan

اتفق مع المايسترو شكلاً وتفصيلاً ........

شفتك وابتهجت وين ياغالى انت؟؟

الغالى بدر
طالما رايك من راى د.منصور خالد
معناتو راى سديد لاشك
(طبعا د.منصور خالد تبعنا ما تبع اهلنا الطيبين)
تخريمة صغيرة:
الحادو ده منو؟؟؟؟؟
الرائع بروعة غاندى
ود نابرى(كيه لحافظ)
افهم شنو من ردك ؟؟
اطرح لينا رايك وخلينى من راى المايسترو.
مؤونة عام من الود

الغالى تمر السوق ،تسالية
الدكتور منصور خالد كان تبعكم ولكن الان تغير الحال وبقى نص تبعنا ونص تبعكم
تابع النص ....................... بعد إتفاقية نيفاشا
وراجعين

اخى بدر وتسالية

منصور ود خالد لا تبعك ولا تبع تسالية ده على بالطلاق تبعنا ولو مغالطنى افتح ظهره تلقى

ختم فريق الضلمة يعننننننننننننننننننننننننى تبعنا نحن ولو اى واحد مغالطنى بس ما عليه الا
يشوف الختم

الحمدلله أنت قلت الحقيقة الضائعة

هو أصلنا من عندنا من اول
وزى ما قلت الختم موجود وانا شفتو

وراجعين

الرائع بروعة النيل

بدر
لو سمحت لى اديك حصة صغييييييييييرة فى التاريخ السياسى
الدكتور منصور خالد كان وزير الخارجية فى عهد
(الدكتاتور)نميرى المعلومة دى معروفه لديك
منصور خالد انضم للحركة الشعبية عام1985
واصبح المستشار الخاص لزعيم الحركة الشعبية
وبعد اتفاقية نيفاشا اصبح المستشار لرئيس الحكومة الحاليه
يعنى المعلومة الانت ما واقعه ليك
انو منصور خالد كونه اصبح مستشار للرئيس الجمهورية
مابنفى انو لسه مع الحركة الشعبية وما زال عضو قيادى فى مكتب الحركة الشعبية حاليا
ويا عزيزى منصور اصبح مستشار البشير بترشيح من الحركة الشعبية
(ومستحيل يوم من الايام منصور خالد يكون مع التيار الاسلامى)
تخريمه صغييييييره:
لو مكذبنا وما مصدقنا اسال العنبه الراميه فوق القصر الجمهورى

عزيزى تسالية

كل المعلومات التى ذكرتها نحن وشوف كلمة نحن دى يعنى فريق الضلمة
معروفة لدينا تماما ولكن انت الذى لا تعرفه ايضا نعرفه نحن ، فحقو تعرف مننا
والدايرو تعرف ايضا ان هذه المعرفة بدون من ولا سلوى وهذا اسلوبنا من المفترض
تعرفو واكيد سوف تعرفوا لانك لو ما عرفتو الان اكيد الايام حتعرفك ليه

جبدة صغيرة داير تعرف اكتر ولا خلاص كفاك معرفة

توقيع
المعارفنا تب ما عارف

تسالية

انت خلاص بقيت على منصور خالد وهو مايوى كما زكرت اين ديقراطية

التى يتشدق بها البعض وياسيدى من اول من انقلب على الديمقراطية فى السودان

الذى اصبح يا معاى او ما عارف .

ومن ومن ومن

يا حبيبى تاريخ السودان الحديث يحكى عن يا انا يا تغرق

وانا احسن والبقية كمبارس وانا الاولى وانا فقط

يا اخى نحن يادوب حسينا نحن عندنا استراتجية

عندنا فهم والان وانا بقولها بصريح العبارة كل الاحزاب التقليدية

لولا الاب والاستعمار هل هم احسن ناس فى السودان

الان كم يبلغ عمر الصادق والميرغنى من الاستقلال وهم روؤساء احزاب

الان وايضا حتى رؤوساء المكاتب اليس لهم اكثر من ثلاثين سنة
اهى الديمقراطية ، اذا كان هذه الديمقراطية كيف احد مثلى ومثلك
يحلم مجرد حلم بحكم السودان او حتى يكون احد قيادى الحزب
اذا كان الحكم باسم العائلة ، اليست هذه ملكية غير مقننة ،
يا اخى الديمقراطية فى وادى واهلها فى السودان فى وداى اخر
واصبحت الرئاسة فى السودان لابناء الفنادق فقط ونحن ناس
الحوارى علينا ان نصفق فقط وان نسبح بحمدهم ليل نهار
يا اخى والله طفح الكيل والله يرحم ديمقراطية السودان
والله يرحم الكان السبب

توقييع
ضربت كتف فقط من فريق الضلمة

[size=29]الا خ / عمو عبد الرحيم

الدكتور / منصور خالد محمد عبد الماجد ،( عبد الماجد) يعنى من فريق ناس وراء و عند مطلع مايو 1969
عمل وزير للشباب قبل وزرارة الخارجية ، وهومهندس إتفاقيات السلام بالسودان
ومعه الشيخ الجليل مولانا على عثمان طه وبدون منازع دى واحدة والثانية تحدث
عن مستقبل التعايش بين الحركة الاسلامية والحركة الشعبية وللحديث بقية أخونا تسالية

التوقيع النسخة الثانية من فريق الضلمة

وراجعين[/size]

حافظ العبيد الطاهر كتب:: الان كم يبلغ عمر الصادق والميرغنى من الاستقلال وهم روؤساء احزاب

الان وايضا حتى رؤوساء المكاتب اليس لهم اكثر من ثلاثين سنة
اهى الديمقراطية ، اذا كان هذه الديمقراطية كيف احد مثلى ومثلك
يحلم مجرد حلم بحكم السودان او حتى يكون احد قيادى الحزب
اذا كان الحكم باسم العائلة ، اليست هذه ملكية غير مقننة ،
يا اخى الديمقراطية فى وادى واهلها فى السودان فى وداى اخر
واصبحت الرئاسة فى السودان لابناء الفنادق فقط ونحن ناس
الحوارى علينا ان نصفق فقط وان نسبح بحمدهم ليل نهار
يا اخى والله طفح الكيل والله يرحم ديمقراطية السودان
والله يرحم الكان السبب

توقييع
ضربت كتف فقط من فريق الضلمة [/size]

[/size][/center]

الرائع حافظ

والله انا معاك فى كلامك كلللللو بس
هذا الحديث لاينطبق الا على هذين الحزبيين
بلغو ارذل العمر وبعد ده كلو مكنكشين
وياعزيزى اساسا انا عتدى راى فى الاحزاب
التى تسير على النهج الملكى (الامة والاتحادى)
مع احترامى الشديد لكل الاتحاديين والانصار
يعنى رئاسة الحزب من الصادق تؤول الى ابنه بشرى ثم الى صديق
ثم الى مريم ثم الى رباح .....الخ
وباقى الاعضاء تمومة جرتق
( يعنى ديمقراطية تك)مافى
ونفس الحال بالنسبة للاتحاديين
قصدك تقول الله يازه الكان السبب

عزيزى تسالية

ليست الاحزاب التقليدية فقط بالحال ينطبق على كل الاحزاب السودانية .

ثانيا الحمد لله القلت اتفق معك لانها دى كنت قاليها فى قاموسك مافى

وعلشان تتفق معاى لازم تكون عرفتنى وعلشان تعرفى لازم تزيد معرفتك

وعلشان تزيد معرفتك لازم تعرف انو كم انا بحبك ومييييييييييييت فيك

وتقبل سلامى الكتيييييييييير

ود العبيد

كبير التربالة

ود فريق الضلمه

لاشمعه لا لمبه
حافظ
سلام
والله يا حافظ انا زول مسالم جدا وديمقراطى خالص بس ما بجامل فى ارائى
وعمرى ما كنت متشدد ومتعنت فى ارائى يعنى
لو كان راى الشخص سديد دون شك سوف اتفق معه
بغض النظر عن اتجاهته السياسيه..
مؤونة شهر بس من الود
عشان ظلمتنى ههههههه

عزيزى

الديمقراطية ممارسة وليس كلام كل رجالات الاحزاب فى السودان

يقولون نفس الكلام هل انت مقتنع بكلامهم اذا كنت مقتنع انا بقتنع

المهم لا ترجع من تصريحك السابق .

وهل تفتكر ان مبارك المهدى شخص يحب الديقراطية والسودان

بمناسبة مبارك يا اخوى العيد مبارك عليك طبعا ماعرفت يا تو عيد

يا اخوى عيد الحب مبارك عليك

ود العبيد

انت يا زووووووووووووول ماسكنا اتجاهاتو انت يا اخوى اتجاهك ايه

احسن نعرف علشان نفرز المعانا ومع الخيانه , بس اوعى تكون مع الموال

القديم من سنة 60 .

فكر شوية ثم فكر شوية ، ورائك مهم وضرورى علشان حيكون نقاش طوييييييييل

وعريض وربنا يصبرنا ويصبرك معانا

ود العبيد

الرائع تســـــــــــــاليه

لك التحيه لانك القيت الحجر في هذه البركه الساكنه

لا اريد فلسفه ولكن اريد ان اوضح من خلال رأئ الشخصي
مقدمه : الشيزوفيرينيا schizophrenia مصطلح يوناني الاصل ويعني انفصام الشخصيه وهو مرض عقلي يصاب به الفرد ويعالج من قبل طبيب نفسي بالادويه والصدمات الكهربائيه ويشفى بعدها .
موضوعنا الحالي الشيزوفيرينيا الاجتماعيه وهو يصيب مجتمعات مصابه بالازدواجيه في السلوك والمعايير نتيجه للتناقضات الحاده في الموروث بكافة جوانبه
يعني نحن مصابون بهذا المرض فقدان الهويه لا عرب ولا افارقه ولا معروفين نحن ايه؟؟
من اعراض المرض الوهم والشك وفقدان المشاعر الانسانيه وذلك مايحدث من حروب وعنصريه ونهب وقتل والخ
لدينا موروثات وعادات عربيه ونتكلم جزء مننا العربيه ولدينا بعض القبائل ذات الجزور العربيه ويعتنق اغلبنا الاسلام ومن الجانب الاخر السحنه واللون الافريقي والقبائل الافريقيه البحته والعادات الافريقيه والديانه المسيحيه تتداخلت كل هذه المورثات وصبت في نهر واحد
وكونت السودان المتداخل عربيا افريقيا ..
العرب لايفهمون اغانينا ولام كلامنا في بعض الاحيان وينظرون الى السودان انه قطر الفقر والحروب . اما افريقيا نحن من دول العالم الثالث وذلك بسبب حروبنا التي تشبه الحروب التي تحدث في الدول الافريقيه .
الغزافي رئيس ليبيا اعلنها صراحة وحدد هويته وقال ان بلده افريقي وليس عربي ولذلك لخزلان العرب له وموالاتهم للغرب ومواقفهم الغير مشرفه للقضايه العربيه.

تساليه لك التحيه ومشكور للطرح حسن

عزيزى حافظ

اتجاهى السياسى
ما ظاهر حركة اسلامية
بين قوسين كوز
مع ناس اخونا فلان الفلانى المعانا فى المنتدى
اها انا كده معاك ولا مع الخيانه؟؟؟؟؟؟؟؟؟؟؟؟؟؟؟؟؟؟

» السودان ياهو دا السودان
» ليبقي البشير في السودان
» السودان 220
» تساليه في السودان
» بعض الصور من السودان