الغيره عند الرجال

السلام عليكم ورحمة الله
سوف اتحدث عن الغيره وهو اول موضوع لى اتمنى ان يجد الاهتمام نسبه لاهميته
ازا توقفنا قليلا عند هزه الكلمه (غيره ) هل هى مفيده اماضاره هل يمكن وصفها بانها مرض تودى بصاحبها الى التهلكه ا زا زادت عن الحد ام انها مفيده ازا كانت فى اطار التنافس اى ادا غار انسان من انسان اخر انجح منه وصمم بان يكون افضل منه على حد القول ( الغيره ولا الحسد) ازا هى سلاح زو حدين سوف ازكر نمازج للغيره
هنالك الغيره بين البنات وهنا بيتغير المفهوم من غيره الى حقد وانانيه ولانو مافى بنت بتحب انو وحده تكون احسن منها والنوع دى غالبا مايدمر الصداقه عشان كدا دايما صداقه البنات عمرها قصير.
فى الغيره بين الزوجه وام زوجها (النسيبه) ودى لان الام بتحس بان الزوجه استحوزت على ولده بعد ما كبرتو وتعبت فيه صعب تجى وحده تاخدو بالساهل والنوع دا من الغيره بيغلب الحياه الزوجيه نكد .
اما النوع الاخير من الغيره ودا تحديدا عايزه يكون منبر النقاش هى الغيره بين الزوجين .هى الغيره فى الحياه الزوجيه مطلوبه ولكن
للاسف الشديد معظم الرجال ليهم مفهوم خاطئ للغيره بيعتبرو الزوجه ملكيه خاصه وبالتالى بيلغو شخصيتها ( ماتلبسى دا ماتاكلى دا ماتسلمى على دا ماتطلعى ما ما ما ما .........الخ
الغيره دى مرض ممكن تتحول الى شك وتهدم الاسره وتبقى انانيه وحب امتلاك وتسلط مع انو بيقولو( زمن سى السيد انتهى)
ياريت الناس تتناقش بموضوعيه الان موضوع مهم وانا شخصيا فى حيره من امرى حابه اعرف فهم الجنس الاخر فى المساله دى واكيد ردودكم بتفيدنى فى حياتى وجزاكم الله الف خير

ألاستاذة سيدة صباحي،،،

أولاً أحي فيك هذا الحضور وهذا الاصرار على توصيل أفكارك التي تعتبر اضافة للمنتدى،،،

الغيرة في تصوري تنبع أساساً من الحب و العشق و الرغبة في المحافظة لما لدينا، لذلك نجد أن الانسان يغار على وطنه، و المرأة تغار على زوجها و الرجل يغار على زوجته و أهله و شرفه،، و كل ذلك ينبع من عاطفة الحب،،،

أتفق معك عندما تتعدى الغيرة حدود الحفاظ على الطرف الآخر تكون قد اكتسب صفة مرضية، و لكن لا يمكننا أن نتصور حياة زوجية بدون غيره، فمثلاً الرجل عندما يشعر أن زوجته تغار عليه، يشعر بسعادة في دواخله لأنه يحس بأنه مرغوب فيه، وكذلك المرأة إن لم يأبه بها زوجها و لم يظهر لها غيرته عليها لا شك ستشعر أن الرجل لا يحس بوجودها، أو لا يرغب فيها،،

أما المبالغة في الغيرة و التي غالباً ما تؤدي إلى فشل العلاقات الزوجية فتكون نابعة من خلل في الشخصية و عدم ثقة في النفس، و التي تؤدي إلى اللشك في كل حركات و سكنات الطرف الآخر،،،

إضافة إلى ذلك الانسان بطبعه مخلوق أناني، و توجد فيه غريزة التملك و الأنانية، فإذا أطلق لها العنان دون قيد و إعمال للعقل لا شك أنها سوف تتحول إلى ما ذكرتِ في سياق حديثك إلى أن يشعر الرجل بأنه يمتلك المرأة و كذك تشعور المرأة بأنها قد حازت على الرجل،،،

أنا أعتقد أن الغيرة في توسط تضفي على الحياة نوع من الألفة و التماسك و الشعور بالقيمة لدى الآخر، وزي ما عارفين أخوانا الخواجات ما عندهم غيرة بمفهومنا لذلك دائماً ما نجد عندهم هجر البيت لفترات طويلة من أحد الأطراف فقط لأنه شعر ببعض الدفئ خارج البيت، و ربما يعود بعد فترة من الزمن و يواصل حياته كما لو أن شيئاً لم يكن،، أما نحن فدائماً ما نعاني من الافراط في كل شيء لذلك تنتهي الغيرة بخراب البيوت،،،

في أعماق كل رجل طفل، إن لم يجد هذا الطفل التدليل و الرعاية و إعطائه الاحساس بأنه شئ لا بد من الاحتفاظ به و الذود عنه، فإن مشاعره ستخبو و تتلاشى، و الشيء نفسه ينطبق على المرأة،،،

و لك كل الشكر،،،

سيده ...
انحنا السودانين قلوبنا حاره يعنى بنغير غيره عمياء وانا من مؤيدى الغيره الشديده على المرأه ...
وكما ذكر لك الاخ الصديق انحنا مازى الخواجات البهجرو البيت على كيفم واجو على كيفم..
ومن العادات الغريبه فى المجتمع الغربى او الذين ليس لهم غيره على زوجاتهم
تجد ان الزوجه تتكلم مع فلان وتعزم علان على العشاء والزوج موجود كأنو ماموجود
وللاسف هذه الصفات انتقلت الى مجتمعنا العربى المتغرب ... ويقولون هذه العولمه...
اختى سيده الاسلام لم يترك شىء
ولم يذكر شىء عبس عندما اعطاء المراْه حدودها
فى زينتها امام الرجال وفى صوتها امام الرجال وووووو...

saida sopahi كتبت

اذا توقفنا قليلا عند هزه الكلمه (غيره ) هل هى مفيده اماضاره

الغيره عند الرجال حسب نظرى مفيده بنسبه 80% اذا تقبلتها المرأه بشكل صحيح
وضاره بنسبه 90% اذا فهمتها المرأه بشكل خاطىء ....اى اذا فهمتها بتقيد وووووووو...

saida sopahi كتبت
اما النوع الاخير من الغيره ودا تحديدا عايزه يكون منبر النقاش هى الغيره بين الزوجين .
هى الغيره فى الحياه الزوجيه مطلوبه ولكن
للاسف الشديد معظم الرجال ليهم مفهوم خاطئ للغيره بيعتبرو الزوجه ملكيه خاصه وبالتالى بيلغو شخصيتها ( ماتلبسى دا ماتاكلى دا ماتسلمى على دا ماتطلعى ما ما ما ما .........الخ

ههههههههههه... والله ضحكتينى كيف ما ملكيه خاصه ...خاصه والف خاصه ...
زوجتى دى يعنى ام عيالى يعنى شرفى ...
لو ماكانت زوجتى ملكيه خاصه فى شنو تانى ملكيه خاصه....

الاخت سيده .... الغيره مهمه جدا جدا فى الحياه الزوجيه .

سيده صباحي

الغيره شئ مطلوب في الحياة الزوجيه واعتقد استاذ صديق النعمه ماخلالنا شئ عن التعريف ولكن احب اضيف الحياة الزوجيه من غيره جحيم لا يطاق الغيره تفرض الرجوله والهيبه في البيت هنالك الغيره العمياء التي تولد الشك وتدمر الحياة الزوجيه
الرسول صلى الله عليه وسلم كانت لديه غيره على زوجاته عندما خاطب السيده عائشيه وهي ذاهبه الى جيرانها فقال لها اين ذاهبه ؟ فهي سيدة نساء العالمين لكن الرسول يريد ان يعلمنا كيف نغار على زوجاتنا اذا لابد منها .
مفهوم ملكية الزوج على زوجته في كل شئ هذا مفهوم خاطئ فالحياة الزوجيه تبنى على المشاركه بين الطرفين في كل شئ لا على طرف واحد ..

ثلاثة تتمتــع بها المـــرأه : الفطنـــه - وســلامـة الذوق - والغـــيره ...

شكرا للاخ صديق النعمه حقيقى تحدثت واوفيت .انا متفقه معاك انو الغيره

مطلوبه وهى النقهه والطعم الاساس فى الحياه الزوجيه

ولكن فى الحد المعقول ولكن نكون منطقين ادا المراه دلعت زوجها واهتمت

بيه واتعاملت معاه كطفل وغارت عليه . برضو مابينفع

حيزهج ويقول دى مره( خنقه) كاتمه على نفسى، مقيده حركتى ، نقناقه ،

بتدخل فى كل صغيره وكبيره، مابعتبره دا اهتمام ومحافظه عليه وممكن

يطفش من البيت كمان . وازا مااتكلمت معاه وثقت فيه زياده وما اشتغلت بيه

كتير تبقى دى مره بارده وعندها حاجات تانيه مهمه اكتر منى ويمشى يفتش

فى الاهتمام فى حته تانيه يعنى بالعربى كدا (لابيعجبم العجب لا الصيام فى رجب)

شكرا للاخ حسن على الاضافه

حسن كتب

الرسول صلى الله عليه وسلم كانت لديه غيره على زوجاته عندما خاطب السيده عائشيه وهي ذاهبه الى جيرانها فقال لها اين ذاهبه ؟ فهي سيدة نساء العالمين لكن الرسول يريد ان يعلمنا كيف نغار على زوجاتنا

تفتكر اخ حسن انو الرجل الشرقى الدمو حامى زى ما قال احمد عوض ممكن

يتعامل زى ما اتعامل رسولنا الكريم وغدوتنا مع زوجته يعنى ممكن يسالها

بالتهزيب دا 0 (اين زاهبه) يعنى ماكنت وين والمرقك من البيت هسى شنو‘

وماشه براك مالك كان تخلى زول يمشى معاك ويفرج عليها الامه والعالمين

الاخت سيدة الاخوة المرور
ما هى المساحة بين الغيره والظن وعدم الثقه
ماهى المسافه بين الغيره والحب الشديد
علاقة الشخص بالمجتمع واثرو على البيوت (زى ممثلا واحدة تقول لى واحدة زوجك عطرو جمبل او وسيم
المداخلات دى الثر بتاعه شنو

يا ابو احمد انت برضو ملكيه خاصه للزوجه من حقها تعترض على الكورة الكوتشينه اللبس
صاح

ليها حق يا ايمن .... بس مامثل حقوقى عليها ... لانها مرأه عوره ..
وبالمناسبه عندى كم سؤال ياريت تجاوبو عليه شباب ..

ما هى الاسباب التى تدفع الانسان للغيره فى الشرق ؟؟
ماهى الاسباب التى تقضى على عاطفة الغيره عند الغربيين؟؟
ماهى النتائج التى تترتب على الغيره؟؟
ماذا يجب فعله من جانب الرجال والنساء لكى يتفادو الغيره؟؟

منو القال ليك الخواجات ما بغيرو يا فردة الفيل بغير على فيولتو
اما الشرق دا لايخضع الا الى العشوائيه
ما تقول اتفادوا قول تبقى حاجة ايجابيه

احمد عوض إزيك ياراجل ياحمش يا ابو قلب حار انت شكرا ليك كتير على المرور والاضافه

احمد كتب:ههههههههههه... والله ضحكتينى كيف ما ملكيه خاصه ...خاصه والف خاصه ...
زوجتى دى يعنى ام عيالى يعنى شرفى ...
لو ماكانت زوجتى ملكيه خاصه فى شنو تانى ملكيه خاصه....

انامصره انو الزوجه ماملكيه خاصه للزوج فقط لو هو بيحسبها انو كتب عليها ورقه ودفع فيها مهر يبقى امتلكها يبقى غلطان لانو فى اهل ربوها وعلموها ودفعو فيها اكتر وليهم حق اكبر يعنى ماملكك براك يااحمد يعنى مامن حقك تتحكم فيها زى ماعايز تحرمه من اهلا اوصحباتا اوانها تمارس حياته كبنى ادمه

تفتكر يااحمد حابى زوجتك تكون ماعندها شحصيه تفتقد روح الحوار سهله الانقياد تقول ليها يمين تمشى يمين تقول ليها شمال تمشى شمال زى (الغنمايه)

اسفه للكلمه تفتكر الحياه كدا ممكن تكون ناجحه

سيدة صباحي والله اتي عجيبة عديل كدي !!
الرجال ديل اصلم كدي .. كعبيين وصعبين واتجاهم واحد !
بس الحياة ممكن تكون احلى لو بقه فيها شوية تفاهم .. يعني بالنسبة لللبس ممكن الاتنين يفقو عليهو وراي الاتنين احسن من الواحد .. وبالنسبة للمرقة وكدي مفروض يكون في زمن محدد متفق عليه مسبقا للزيارات والمجاملات ..
والطفل الصغير بتاع صديق النعمة الموجود في اي راجل لازم يدلعوهو في كل وقت وحين "واحلاتي ياناسي"
والمرة بطبيعة الحال الكلمة بتأثر فيها اكتر من اي حاجة في الدنيا .. بس ما عندها طلفة صغيرة دي عندها اطفال صغار كتار .. العيون طفل، الشعر طفل، الخشم طفل .. الخ فلابد ان يتم الاهتمام بكل هؤلاء الاطفال !.

يامرحبا اخ عبد الله مستنيه مرورك من قبييييييييييل عارفه مافى زول

غيرك بقيف معاى( ناصر المراه)

عشان خاطرك بمشى الرجال ديل حسب عقلم طفل طفل عوضنا الله ندلع

نعمل شنو الله غالب

سيده... انا ماقلت امنعه من صحباتا واهلا...
بس بمنعه من الشىء الشايفو خطاء
يعنى مثلاً اذا كان انا مابحب الحفلات والحاجات دى
ماممكن اخليها اى حفله فى الفريق ناطه.. وبعدين قصه دفعته فيها مهر
دا كلام غريب يعنى بيع وشراء
كان لى البيع والشراء اييييييا اشتريته
بس انا فهمى عكس فهمك ..
انا لما ذهبت الى بيت اهلها وطلبتها من اهلها
ماكنت ابقا لى سلعه انا كنت طالب نصفى الثانى .
وكنت اطلب مرأه صالحه وايه هى المرأه الصالحه هى:
القطب الثاني الذي يبحث عنه الرجل في كل زمان ومكان دون هوادة بهدف
الاستقرار ومواجهة متاعب الحياة، فالمرأة العاقلة والمتعلمة يمكنها أن
تخلق جواً من السعادة والرضى لزوجها وأولادها إضافة لسلوكها الأنثوي
المليء بالرقة والدلال، أما المرأة غير المتفهمة فهي قادرة على تحويل حلو
الحياة إلى مرارة ومرارة الحياة إلى علقم.
لا مناص من أن تحترم المرأة رغبات زوجها وإلا تحولت الحياة الزوجية إلى
جحيم والمرأة التي لا تحترم أفكار ورغبات زوجها لابد من استبعادها عن
المنزل (طلاقها) لأن الاحترام هو أساس الحياة السعيدة
وانا حسب وجهه نظرى الخاصه ارى من اهم اسباب الغيره على المرأه هو
أن الرجل في مجتمعنا الشرقي له متطلبات خاصة بعد احتكاكه بالعالم
الخارجي من خلال الفضائيات حيث أصبح يرى المرأة في صور متعددة وأصبح يخشى
الخيانة والتلون بعدة وجوه والتلاعب على الحبال... لذلك فهو يوجب أن تكون
المرأة التي ستشاركه حياته مخلصة ومحبة وبسيطة، وذكية ولكن دون التخابث
على زوجها أو الآخرين، وعلى المرأة أن تعمل جاهدة لجذب زوجها إليها وذلك
عن خلال أناقتها وأنوثتها وسلوكها ولا تغرق نفسها فى النقه الفارغه
(ما تغير على ... وماتسألنى ماشه وين ...معقوووووووووووووله.طيب اسأل منو؟؟؟).

اللهم ارزقني زوجة تخافك وتطيعني فيك , تكون عونا لي في دنياي وآخرتي
وأكون عونا لها حسنة الخَلق والخُلُق
وجميع العزَّاب
آمين
والسلام عليكم

تحياتى اخ ايمن

ايمن كتب

[size=29]تحياتى اخ ايمن

الغيره حق مشروع ممكن الانسان يغير على حاجه بتخوصه من

دافع الحب الشديد والعشق ومن دافع المحافظه على مايملك زى

ماقال الاخ صديق ، اما الشك والظن وعدم الثغه والعياز بالله

معنى واحد لا يمد للغيره باى صله الا انسان ما فاهم يعنى شنو

غيره ويخلط بينم والانسان العندو وسواس قهرى وعدم ثقه

بيبرر دا بالغيره(يعنى لو شاكى فيك بيقول بغير عليك)

اماازا وحده قالت لى واحد ه زوجك وسيم او عطرو جميل دا

بيتوقف على الوحده نفسها ممكن تحس انها دايره تغيظه او

قاصده تخرب بيتا بان تشككه فى زوجها ودا بيتوقف على مدى

وعى الانسانه نفسها . والمراه ممكن تعرف ادا كان زوجها بغير

عليها او كان شاكى فيها

]

تعانى بعض السيدات من الغيرة الشديدة على أزواجهن، فإذا خرج زوجها من المنزل تزاحمت فى ذهنها الظنون، إذا حدد موعد أو تكلم فى التليفون أو رن المحمول تتسابق لديها الشكوك لتعرف إلى من يتحدث، وتأتى الصاعقة على رأسها إذا شرد زوجها فى التفكير أو ابتسم دون داع، فيقودها تفكيرها إلى أن زوجها يفكر فى امرأة أخرى وأنه يتذكر كلماتها له وضحكاتها.

وتزداد الشكوك مع اهتمامه بنفسه ودقته فى اختيار لون ملابسه وتناسقها، ووقوفه أمام المرأة أكثر من اللازم من وجهة نظرها، فكل هذه الغيرة تقودها إلى معاناتها من ضغوط نفسية، تضر بها وتؤثر سلبيا على الاستقرار الأسرى، ويمكن أن يمتد ضرر الغيرة الشديدة للزوجة إلى التأثر على أعضاء جسمها.
أثبتت دراسة علمية أن الغيرة الزوجية هي أحد الأسباب الرئيسية وراء إصابة العديد من الزوجات بآلام الظهر والرقبة، ويرجع ذلك إلى أن عدم الاستقرار النفسي يدفع المرأة للشعور بالآلام، خاصة إذا لاحظت تغيرات مفاجئة على الزوج.

تبدأ الغيرة عادتا في فترات الطفولة وإذا لم ينل
الطفل الرعاية والحنان في طفولته يحدث عدم النضوج العاطفي في الكبر مما يؤدي
إلي الغيرة المرضية وتعريفى للغيره هى احساس من احاسيس العاطفة
وهى شعور طبيعى فى وجدان كل شخص
ولكن اذا زاد هذا الشعور عن حده واثر على فكر الانسان دون مبرر واعاقة عن حياتهالطبيعة
اصبح شعورا مرضيا .

والغيرة المرضية هي نوع من أنواع العواطف المرضية المركبة
التي تشتمل علي فقدان احترام الذات مع الخوف والبغض والتقلب العاطفي .

والغيرة في العلاقة الزوجية بين الرجل وزوجته هي شعور طبيعي تحافظ علي استقرار الأسرة ...
حيث يسعى كل منهما للاحتفاظ بالود والحب نحو الآخر ومراعاة شعوره والاهتمام بأمور الأسرة .

أما إذا وصل الأمر للغيرة المرضية الغير معقولة
والتي لا يوجد مبرر لها فإنها تكون بمثابة المرض الذي يجب أن نسعى لعلاجه .

وتحدث الغيرة المرضية في الأسرة عندما يكون أحد الزوجين مصابا بالشخصية الشكاكة ..
حيث يعاني من ضعف الشخصية وعدم الانسجام العاطفي والشك في سلوك من حوله
حيث يسقط ضعفه علي الآخرين ويتهمهم بالخيانة

والغيرة المرضية انفعال بغيض يشعر به الإنسان عادة
إذا شعر أن الشخـص المحبـوب يوجه انتباهه إلي شخص آخر غيره .
ومن أنواع الغيرة الشائعة(البنعرفها كلنا)
ما يحـدث بين الأخوة إذا شعر أحدهم أن والديه أو أحدهما يحب أحد أخوته أكثر منه.

بغير عليك
من جمال جيبيك
كان فى مسلسل سورى اسمو جميل وهناء جميل دا مراتو نهائى ما بتغير حس برتابه عمل خطط محكمه خلاها تغير وغارت قلبت حياتو جحيم .
يا اخوانا
الراجل معرووف مرات بعمل فيها زى ود ابرك بدور يطير ساي
ومرات بعمل فيها فحل المراح
المراه الحريفه تمشي حسب عقلو لمن يكون ودابرك ما تعمل نبله ولمن يتفوحل ماتعمل نمر.

لو مافى غيره ونقه وتحنيس بكون فى طلاق

أختى سيدة لك التحية وجميل جداً أن يكون هذا البوست بيد إحدى النساء وذلك لاهميته بين الرجل والمراة.

الحديث عن الغيرة والحسد له أبعاد كثيرة وقليل جداً ما يعددها أو يعترف بها ومتى ما دخلت الغيرة بين الرجل والمراة تخرج حقيقة الحياة الزوجية من الراس . ويبقى الكلام كتر يعنى خارم بارم زى ما بقول أخونا عبدالله ودنابرى . ولاننسى بأن الحب أجمل عندما يكون بدون غيرة لان المحبة عنيفة الصدمات كالموت عند سماعه وكما هى أيضاً أشدة قسوة من القبر فى وحشيته يعنى الاتنين حارات كلهما يجر الاخر بين الرجل والمراة كالماء قليله ينعش الورد والزهر يعنى يا saida sopahi كلما كانت الغيرة موجودة بنسبة بسيطة يكون هناك بناء للريدة والحب وتكون زيادة فى عمر الحياة الزوجية والعكس هو الهدم والخراب الكامل لتلك الحياة بين الطرفين فلذلك الغيرة عند الرجال أو النساء كلاهما يهدم زيادته فى الصاقات أو الحياة الزوجية والقليل منه يزيد الحياة نوراً وإشراق يعنى ما فى فرق عند الرجل أو المراة طبعاً أنا عارف إنك ما قاصدة ما هو الفرق بينهم ولكن ساقن الفضول أن أزيد البوست إتزاناً ولكى يكون الامر طبيعى لازم توجد الغيرة بيننا وإلا تكون الحياة رتيبة ، كما زكر الاخ الرومانسى بتلك المسلسل الســــــــــــــــــــــــــورى .

و الحسد يا أختى سيدا فيه ألمٌ حارق يفتك بهمه صاحبه قبلُ أن يقتلُ به .

إن لمت ذا حسدٍ نفست كربته وإن سكت فقد عذبتهُ بيده أه يا عبدالله الذال دى هنا صاح ولى لا!!

وراجعين

النصيحة البوست ده مفروض يكون حق المعرسين فقط !!
شوفو اخونا بدر عبد الماجد والدرر القاعد يرمي فيها دي ..
وصديق النعمة ..
ديل الناس الممارسين ياخي !
وكلامي انا واحمد عوض طلع خارم بارم سآآآآآكت ...

عبدالله نابري كتب:
النصيحة البوست ده مفروض يكون حق المعرسين فقط !!
شوفو اخونا بدر عبد الماجد والدرر القاعد يرمي فيها دي ..
وصديق النعمة ..
ديل الناس الممارسين ياخي !
وكلامي انا واحمد عوض طلع خارم بارم سآآآآآكت ...

شوف آآ عبدالله أخوي أنا لي كم يوم بجي أتاوق بس وأقوم جاري وأخوكم مكروب كربة شديدة (_ يعني زحمة عمل ) وزين الزحمة بالزين ولس بالذال .
ولكم أعجبت بهذا البوست يالذال ولكن الذي ( بالذال ) لفت إنتباهي فعلا مداخلات أخوانا العزابة ( زين العزابة لغوياً بالذال من كلمة عذاب ولكن عرفياً بالزين ) المهم وجدت العزابة داخلين تقيل والشئ المحيرني إنو ود النميري لو فعلاً ما متزوج الله يكون في عونه وعون بنت الحلال شريكته مستقبلاً .. وبالنسبة لك يا عبدالله نصيحتى ليك أشغل بالك بالشوفة الشرعية ...وكان على أخونا حسن اقول له بقليبك تقولي تعال وبعيونك تقولي مافي مجال .. وكان على أخونا أيمن وين وين تلقوا ز يده ... أما أخونا االرومانسي حبة فوق وحبة تحت .. وكان على محمد زين نابري .. اقول له يا خوي خارج نفسك زي ما تسالية خارج نفسو.
أما الأخوان بدر عبدالماجد وصديق النعمة أقول لهم لقد أوفيتم.
ولكن صاحبة البوست أختنا سيدة ما عارف تبع أي فئة متزوجين أم عزابة وفي كلا الحالتين نشكرها على هذا الطرح الجرئ...
ولنا عودة .....

شكرا للاخوه محمد زين وتساليه والرومانسى وبدر وعصام على الاضافه والحضور ا لجميل

عصام كتب

ولكن صاحبة البوست أختنا سيدة ما عارف تبع أي فئة متزوجين أم عزابة وفي كلا الحالتين نشكرها على هذا الطرح الجرئ...

انا فعلا بنضم الى قائمه المتزوجين بس حديثى الزواج عشان كدا الامور دى ملخبطه على شويه

عصام عبدالصادق كتب:-
والشئ المحيرني إنو ود النميري لو فعلاً ما متزوج
الله يكون في عونه وعون بنت الحلال شريكته مستقبلاً ..

الاخ عصام لك كل الود ....
حقيقه الله اعين بت الحلال البتكون زوجتى قريباً انشاء الله
لانو والله بخاف عليها من الهوى وهى ما بتشوف الحاصل دا غيره ...
دى ريده فى قلبى جوه ...
لك التجله عصام ماتحكم على متعقد
بس رياااااااااااااااااااااااد 1000 ولو ما رده زوجتى وخفتا عليها ابقا مافى فايده ..

الاخت سيده صاحبه البوست انا جبت ليك احاديث عن طاعه الزوجه زوجها ...
اقريهم وتانى قولى لى ماعندو حق عليا..

عن عائشة رضي الله عنها قالت: قلت: يا رسول الله أي الناس أعظم حقاً على
المرأة؟ قال: زوجها، قلت: فأي الناس أعظم حقاً على الرجل؟ قال: أمه. رواه
البزار والحاكم بإسناد حسن. .

عن ابن عباس رضي الله عنهما قال: جاءت امرأة (وهي أسماء بنت يزيد
الأنصارية) إلى رسول الله صلى الله عليه وسلم فقالت: يا رسول الله أنا
وافدة النساء إليك، هذا الجهاد كتبه الله على الرجال، فإن يصيبوا أجروا،
وإن قتلوا كانوا أحياء عند ربهم يرزقون.
ونحن معشر النساء نقوم عليهم، فما لنا من ذلك؟ فقال: رسول الله صلى الله
عليه وسلم: أبلغي من لقيت من النساء أن طاعة الزوج واعترافاً بحقه يعدل
ذلك كله، وقليل منكن من يفعله. رواه البزار والطبراني.

( لا يصلح لبشر أن يسجد لبشر ، ولو صلح أن يسجد بشر لبشر لأمرت المرأة أن
تسجد لزوجها من عظم حقه عليها ، والذي نفسي بيده لو أن من قدمه إلى مفرق
رأسه قرحة تنبجس بالقيح والصديد ثم أقبلت تلحسه ما أدت حقه ) صحيح الجامع

( اثنان لا تجاوز صلاتهما رءوسهما : عبد آبق من مواليه حتى يرجع ،
وامرأة عصت زوجها حتى ترجع ) صحيح الجامع

اخ احمد عوض ليك التحيه

منو قال ليك انا مابطيع زوجى او بعصيه والعياز بالله . انت خرجت من لب الموضوع انا مابدعو الزوجات انهم يعصو رجالهم . عشان انت تكتب الاحاديت دى الانا سلفن عارفاها وحافظاها عن ظهر قلب . الموضوع كالاتى انو انا بتكلم عن مفهوم الرجال الخاطئ للغيره ومن خلاله بيمحو شخصيه المراه . وانا لما بدعو انو المراه تكون عندها كلمه فى بيتها دى مامعناه انو تعصى زوجها وتدخل فى حرمه بس ممكن الراجل يتفهم ويعطيها شويه ثقه فى نفسها ويعامله كانسانه ليها كيان . وفى كلامى قلت معظم الرجال ولم اقل كلهم لانو بجد فى رجال بيتعاملو مع زوجاتهم بمنتهى الرقى حتى فى غيرتم عليها بتكون فى حدود

اما انت يا اخ احمد لو يتعتبر غيرتك على زوجتك بعتبارو خوف عليها يبقى دا الغلط نفسو دى الانانيه فى الغيره بس بمفهوم تانى ( انو بمنعك تعملى كدا عشان بخاف عليك )

اخ احمد عوض تاكد انو مافى وحده فى الدنيا لو ما حافظت على نفسها وخافت عليها براها مافى زول ممكن يحافظ عليها لانو حاجه معروفه انو البنت لو اتقفلت جوه قزازه لو عايزه تعمل حاجه بتعملها يعنى لا خوفك ولا غيرو ممكن يحميها لا حاجه وحده بس ( انو تديها الثقه فى نفسها تحسسه انها انسانه ومسؤلها واهم حاجه الصراحه )

انا اسف .. وماقلت ليك انتى ... بس انتى صاحبه البوست وكتبتى
( ماتلبسى دا ماتاكلى دا ماتسلمى على دا ماتطلعى ما ما ما ما .........الخ

وذكرتى

saida sopahi كتب:

[right] ياريت الناس تتناقش بموضوعيه الان موضوع مهم وانا شخصيا فى حيره من امرى
حابه اعرف فهم الجنس الاخر فى المساله دى واكيد ردودكم بتفيدنى فى حياتى
وجزاكم الله الف خير

]انا من الجنس الاخر وهذا رأى فى القضيه التى طرحتيها بصفه عامه فى الحياه..

واسف اخت سيده لم اعلم انك متزوجه .. الف مبروك وربنا اوفقك ..

هذا رأى شخصى وعام لكل الناس
[/b]

[/size]

» (ديل الرجال)
» الدورة الشهرية عند الرجال‏
» لماذا حرم الله علي الرجال الذهب ؟؟؟؟
» اختلاط الرجال والنساء من اهم اسباب الفشل.....