نداء المنتدى

موضوع: نداء المنتدى الثلاثاء 27 يناير 2009, 1:44 am

قبل ما اخش توش فى الموضوع ودون بهارات او رتوش الحاجة الداير اكتبى دى الناس المحت ليها كتير وهى انو المنتدى دى بقي اللقاء الجامع البجمعنا نحن كجرافه واصدقاء المنتدى وبعكس صوره مشرفه عن الجريف فكرا وعلما وادبا.

وعشان الناس ما تكون ماشه ساى لاازم كل فترة نقيم التجربه والكتابه انشاء الله الزول يراجع كتابتو ويقيمها بنفسو ويكون فى شعار مثلا( أبدع وأجتهد فأنك تمثل الجريف شرق )

انا بس داير اعلق على بعض الكتابات مع احترامى لحرية التعبير او الالفاظ القاسيه الاتقالت فى بعض البوستات وعشان اكون اكثر وضوح بضرب مثل من القرأن الكريم عن طريقة التعبير مثل:

قال تعالى (او لامستم النساء)

المثل الثانى(او جاء احدكم من الغائط)

لله المثل الاعلى ربنا طبعا عبر بكلمات بسيطه و جميلة احترم فيها ربنا ازواق الناس عن مسألتين التعبير عنهم باى طريقه فيها صعوبه نسبه لى اختلاف الثقافات والازواق وحساسية الاشخاص تجاه الكلمه بل فرق العمر والنوع قد يؤثر وخاصه انو نحن فى زمن بتستخدم فيه الالفاظ حسب الحاله العامه وقد تعنى الكلمه شى مختلف تماما عن المعنى الاصلى .

المهم انا ماداير ادين زول بعينو او انقدو لكن داير ازكر امثله حتى انها تكون نقطه نتاقش على اساسها النموزج الاول

ابدا بنفسى كتبت انا ايمن السر :فى بوست مصداقية المنتدى الى اين الاتى( Lاضمن من وين انو المشرف ما يخش البريد بتاعى)رغم احاسي انذاك بالضرر اعترف اننى كنت قاسي فى ومتفلت فى التعبير ضد المشرف .

النموزج الثانى :كتب الثائر قرشى قصيدة عن غزة امتلاءت نعوت جارحه سحاق و...وتبا طبعا انا افهم غضبه الشديد لكن كان الطريقة التى عبر بها عبارة سيل من ا لشتم واساءه لك التحيه اخى قرشى.

النموزج الثالث تساليه والمصيبه انو تساليه مشرف كتب عن اعتراضى على كتابة بوست عاهرات ام ضحايا :شكرا للرد الموضوعى على المدعو.........وما عارف سر النقاط شنو وقال يادوووب عرفتى ايمن فتح البوست دا لى شنو حزف المقال داك حارقك للدرجه دى. وانا ماعارف المدعو دى قاصد اتهام ام استخفاف ما عارف لك التحية اخى تساليه وفاوضنى بلازعل.المهم انو مستوى الحوار يجب انو يكون حضارى حتى العناوين فيها اثارة شديدة زى عنوان الدورة الشهرية للرجال انا ما عارف الكاتبه قصدت شنو

. يعنى ممكن نحن بنكتب بي الطريقة دى لانو بنتعارف لكن المنتدى دى فى اكبر شبكة فى الدنيا لازم نكتب للجرافة وغير الجرافه.الغريب فى الامر انو امكانيات الكتاب هائله حسب علمى المتواضع وفى الامكان التعبير بى احسن مما كان انا عن نفسي بحب طريقة النمازج الثلاثة لكن الوضع هنا بختلف الامر ما شخصى ومرات الزول لمن بكون قاعد اكتب بحس بأنو بالقلم دا ممكن اغير الدنيا .

الكلام دا ما يعني انو المشرفين يمسكو سكين وينحروا المقالات بس لازم يكون طريقه ما نطور بيها مستوى مناقشة الافكار .(لك التحية اخى اخناتون)

الاخوة الكرام دا نداء منى نابع من حبى واعجابى بالمنتدى انو الناس تحافظ على المنتدى ويكون الكتابه والردود مع حفظ المقامات بى بعيد من طريقة المعرفه الشخصيه كدا بخلى فى شفافيه وقوه فى الطرح يعنى اختلاف الراى يجب ان لايفسد للود قضيه وعشان يتحرك الركود.لانو بقى زى لو هلكت هذه الفئه .....

الاخ ايمن .... لاحظت فى كتاباتك دائماً همك الاول هو تطوير المنتدى حتى النقد البتكتبو نقد لبناء منتدى يمثل اهل الجريف
لك الود والى الامام

يا ابو نمر زى ما الزول بخاف على بيتو لازم اخاف على المنتدى دا بقى البيت الكبير
حركة الاصابع دى جميلة جدا

شكرا للاخ ايمن على اللفته البارعه دى

اصعب موقف ممكن يمر بيه الانسان ومايقدر يرجعو تانى فرصه ضيعه واكلمه قالها واخر سمعه . فما بالكم بكلمه اتكتبت واتوثقت والف شخص قراها . لذلك علينا جميعا ان نحاسب على كل كلمه الان المنتدى واجهه لينا كلنا . واكيد مافى زول فينا متعمد يجرح زول ولكن التعصب اثناء الرد او قرأت بوست معين يجعل الزول يكتب حاجه مابيكون قاصد المعنى نفسو الاتكتب مثلا انا فى الموضوع الكتبو الاخ كانيجا عن امتلاك البنت العربيه كتبت باسلوب جارح شويه من انفعالى ووصفت موضوعه بانه ( فيه تفرقه عنصريه وحقد طبقى وتقليدى ) وكان ممكن اعبر باسلوب اجمل من كدا واقول راى فى الموضوع ومن هنا انا بعتزر للاخ كانيجا ولك العتبه حتى ترضى اخ كانيجا

الله عليك اخت سيدة
ومن نقطتك دى انا بناشد اى زول حس بانو لعبو كان خشن يكتب النقطه وهمسه فى اذن الزول الكتب ليهو

ايمن السر بابكر كتب:: مرات الزول لمن بكون قاعد اكتب بحس بأنو بالقلم دا ممكن اغير الدنيا .

الغالي ود السر بابكر
ياخي الجزئية دي بالذات راقتني كتييييييييير
وموش بحس انو ممكن اغير الدنيا وبس!! بتشعر اثناء الكتابة انو الطرف التاني قاعد يقرأ فيما تكتب وكأنو امامك!
واحي فيك روح الاعتذار الجميل وبالمناسبة الاعتراف بالخطأ اعتبره من صفات قوة الشخصية .!! ومن صفات الكرم ايضاً..

الأحبــاب الحضــور جميعــاً ...
إبتداءاً بالأنيق أيـــمن ... شئ جمــيل جدا أن يقف الانسـان مع نفسـه
في وقفات ويحاسبهـا عن كل تجاوز أصـــابته .. وهنــا نحن داخـل نفس
واحده المنتدى .. البيت الكبير .. البيت السعيد .. ونقاشات واختلافات
ومشّـــادات .. واتفاقات .. ومجاملات .. وغير ذلك كثير والنتيجه والحصــيلة
قوم على قمـة من الأنـاقة في التعـامل مادامت السريرة صافية .. وهي ميزة ممزوجه
بكل الاعضاء حقــاً ...
لكل انسـان اسلوب وطريقة في التعامل .. وشكلية للحديث والتصـرف والفهــم
ولكن يبقى الشيئ الجمــيل فينــا هو التراجع عن الخطأ والبحث دوماً عن التفاوض
بــلا زعــل ..
ابداء الآراء والاقتراحات والدفـاع عن وجهات النظر وتبنى القضـايا وطرحهـا
هو أساس النقـاش في كل المجتمعات والأمكنة والأركــان ولكن يبقى الحد الفيصــل
وهو مدى الإلتزام بالذوق العام وإحترام الآراء والأشخاص وأفكـارهم

موضــوعك اليوم يا أيمـــــن لم يمس العصـب الحي فقط وانمــا هو بمثـابة العصب الحي نفســه
وهو عبارة عن جلسه مع النفس واعتراف ومحاسبة واعتذار بشكـل يفوق الوصـف من الجمـال

شكرا ليك كتير يا أيمن تواجدك الذي يثري المكان نقاءاً وجمالاً وأفكارك التي تشع نور

القضية ياعبدالله في نظري ليست بالمعني المحدد اعتذار عن خطأ
لأن الكل لايريد ان يخطئ ويعتبر نفسه على حق وإلا لن يرضى
لنفسة أن يرتكب الخطأ .

لكن القضيـة اعتبرهـا أجل وأكبر بكثير من ذلك .. أيمن هنـا يمهد الطريق
لكل الاختلافات ان تناقـش بهدوء وابتسامه وضحكه صادقة .. وبدا ذلك في
تفهم سيده صباحي لذلك واستجابتها .. يدعو أيمن الجميع للصفح ويقودهم باسلوب
ســاحر جدا ليجتمعو على كلمة ان الاختلاف لايفسد للود قضيـة
دعونا نختلف في آراءنا ووجهات النظر والأفكار والمقترحات وفي أي شئ
لكن دعونا نحرص على الود الذي بيننا ودعونا نحرص على الرابط الذي
يربطنــــا .. هنا ياسيدي أيمن يدعو إلى براحات واسعة من الفكــر الراقـي
والارتباط الجمـــــيل ... وهذه في الحقيقة شيمت أهل البلد خصوصاً
واهل السودان عموماً .

أما انا احب ان اضيف لهذا البوست كلمات استوقفتني كثيراً فيما يختص
بالبوست المنقــول لأيمن والذ كانت يتحدث عن البشير رئيس الدوله
فقد تناول أيمن الموضوع بشكل يغلب عليه الحده نوعاً ما وتكاتف الجميع
ليقفوا في مواجهته وانتقاده رغــم أنه ظـل على تمسكه برأيه ومقاله
إلا انه قال كلمة جميلة توحي معاني الأدب والفكر السامي حينما أحـس من
المداخلات للاعضاء اتهامهم له باتهامه لمحمد زين نابري والاسائة له كشخص
عبر قائلا أنا لو السر بابكر سمع اني أسأت لشخص في نهاية اسمه نابري
حيشنقني ..... وهـــنا توقف لأعبر بدون تركيز بسبب الهزة التي اصابتي
بما قال وقلت ليه ان شاء الله اتشنق انا في كوبر ومعاي عبدالله ولد عمي وزينكوف زاتو ...

ففهي هذا المقال تجلت لي معاني كثيره وقرأت بين السطور أحاسيس وهنـا سر الكتابة
الذي يحكي عنه أيمن والذي أعجبك ياعبدالله واستوقفك فالكتابة في منتديات الجريف شرق
تختلف عن الكتابة في أي مكان ولا يقتصر سحرها على الأسرار التي تجلت الآن فحسب
وانما يحس الكاتب أنه يخاطب أباه وأمه وأخته وأخوه ... وهنا متعة الكتابة
لكن يتوجب أن نلتزم جميعا بحفظ الروابط التي تجمعنـا كــ جرافة في المقام الأول ثم
كسودانيين ثم كمتعلمين ثم كبَشــــر .

شكـــراً مره أخرى أيمــن ويستحق موضوعك وســـام موضوع مميز

ايمن السر بابكر كتب:: يا ابو نمر زى ما الزول بخاف على بيتو لازم اخاف
على المنتدى دا بقى البيت الكبير

فلسفة أحســدك عليهــا

الاخ ايمن لك الود ومن جد انت دوما تسعى الى تطوير المنتدى والظهور بالشكل الجميل وفعلا ان المنتدى بقى بيتنا الكبير وهمنا الاول الجريف وكى يعرف الجريف بقية البشر لازم نظهر بالمظهر الذى يليق بالجريف واقولك ليس العيب ان يغلط الواحد فينا لكن العيب ان يعترف بغلطه ويقوم بمعالجته بالطريقة الصحيحه ودخلنا منتديات كثير نجد فيها السلبيات والاجابيات وكل انسان مامعصوم من الخطاء وخير الخطاون التوابون ويعجبنى اسلوبك فى النقد واقولك ان كل واحد من اعضاء هذا المنتدى فعلا قلبه على الجريف ومافى واحد بدخل الا ان يعمل شى ملوموس الى جريفنا الحبيب وقد لاحظت فعلا بان عدد كبير من اعضاء المنتدى يتحيزون فى ردودهم الى مواضع اشخاص معينين لااقول انى تصفحت كل المواضيع بالمنتدى ولكن من المفروض اى موضوع الواحد يتصفحة بان يترك تعليقه علية كى بعرف كاتب الموضوع قيمة الشى الذى عملة ويستفيد من اراء الاخرين وهذا الشى ينقصنا بصورة كبيرة فى منتدى الجريف بالذات وقد لاحظت فلان يرد على مواضيع فلان وفلان يرد على مواضبع فلان لانه رد على موضوعة دون النظر الى قيمة الموضوع ويوجد عدد قليل جدا من يشارك فى كل المواضيع وخير نموزج عندك منتدى الجعلين الواحد يتمنا ان يكون منتدانا يسير على نهجهم من معلوماته المفيدة وطريقة شرحهم الى قبيلة الجعلين واتمنا ان يصل كلامنا الى كل قلب يخاف ويحب جريفنا بدون تفريق او عنصرية

اخي الطيب الامام ..
والله كلامك يخش القلب جووووه ..
بس عاوز اضيف حاجة في مسألة الردود على البوستات .. اهم حاجة انو صاحب البوست مفروض يتعهد البوست بتاعو بالرعاية والعناية ومفروض يكون جاهز للناس البترد ويعقب على تعقيب المتداخلين عشان الناس تحس انو كلامها وصل للغير ..
النقطة التانية مسألة فتح البوستات الكتيرة دي برضو بتشكل هم بالنسبة للاعضاء لانو الواحد ما حيقدر يرد على كل المواضيع المفتوحه وبرضو مفروض تعجن اللخيتو او تلخ العجنتو ايهما اصح ! بمعنى انو الواحد لما يفتح بوست حقو ينجضو تمام وبعد داك يعمل بوست تاني ..
وارجع واقول ليس الكاتب او البوست هو ما يجعلك ترد على الموضوع اهم حاجة انو يكون عندك قناعة بانو انك ممكن تشارك في الموضوع برائك .. وانا بصراحة بتكيف لما اسجل رد اكتر من ما اعمل بوست ليه؟ لانو البوست مسئولية !!
في بوستات كتيرة مفتوحة وردينا فيها والزول الفتح البوست لم يرجع لينا ولم يعلق على ما ذكرنا وده بديك احساس بائخ انك ما تواصل في البوست ده وكده ..
تحياتي ،،، وحبي ،،، واحترامي ،،،

معليش مع انو ما تخصصى وانا تخصصي رومانسيه بس لكن ردود البوست دى عجبتنى

ومع انو ما عارف الكاتب قال شنولكن لاحظت لى بعض اعتراضتو وبلخصى فى الاتى

طالب بملاحظة طريقة التعبير.

الكتابه بأجتهاد عشان نحن ينمثل الجريف
طريقة الكتابه تكون عامه عشان فى غير الجرافه بخشو المنتدى

اكثر ما عجبنى فى البوست المقوله الاتيه:لو هلكت هذه الفئة ......وهو بقصد تقريبا مجموعة المنتدى حقو الناس تخت خطين تحت الكلام دا الزول دا بى اسلوب اسلامى قال نحن خلاصة الجريفه ويتمنى لها البقاء.[/size]

سيدة صباحى اضافت لكونها اعلاميه فزه وانسانه جميلة زات حضور رائع رقة وشجاعة لك التحية.

الاخ ايمن

شكرا جميلا اظن ان الرساله تكمن فى التلاتة نقاط مع الرومانسيه والتوفيقsize]

بس خلاص ياهو دا ايمن السر بتاع كلية الاداب وصحيفة الوفاق

مشكور اخونا ايمن السر لهذا النداء والصحوه لتطوير المنتدى ليرتقي بالمستوى الافضل

الفرق بين الشخص الناضج والشخص غير الناضج هو قبول الحق !

كما انه عن طريق الحوار والنقاش ينقل المرء فكرته من الفجاحه الى النضج

لا ينبقي ان يكون معك قلم جيدا بل ينبقي ان يكون معك فكرا وخلقا جيدا

من جهلنا نخطئ ومن خطئنا نتعلم ..

تحياتي

]أحبك كثيرا ... ايمن

لك التحية والاجلال

واظن الموضوع الاكثر حزنا و الما سؤالي ..
اين اهل المنتدي البقية الباقية من مسلمي الجريف ام مازالو في جاهليتهم ؟
هل لاحظت( العصابة ) التي نجت من الهلاك ان لا احد غيرها في ساحة المعركة ...
لماذا استأثرت خلال شهرين ماضيين نخبة محددة على هذا المنبر فلان وفلان وفلان وهذا البوست خير شاهد نفس النخبة .
هل هنالك اي ضغوط على بقية الاعضاء يعني بالواضح هل مشرف المنتدي العام هو من يختار ما ينشر ومن ينشر ؟ انا مقتنع لاشيئ من هذا القبيل والرد للمشرف
هل المواضيع التي تناولتها االنخبه خلال هذه الفترة لاترقي الي مستوي ان يثري فيها النقاش او مجرد المشاهدة مما اصاب الصامتين بالملل ؟
اقتراح العزيز الغالي عبد الله ود نابري بمنح هذا الموضوع وسام موضوع متميز يستاهل ايمن اكتر واكتر لكن نريد اقترح ايضا لاستنهاض همم بقية الاعضاء للمشاركة والكتابة ...
اذا لابد من وقفة هنا ونكورك بأعلي اصواتنا اكتبوا الكحة وصمت الخشم واحد الاتنين ما بيخدمو غرض في الزمن ده
الماقادر يكتب ادي راس الموضوع لفلان وينزل الموضوع تحت اسموا
الشويه تعبان في التعامل مع الكمبيوتر يكتب الموضوع ويرسلوا لفلان وينزل الموضوع تحت اسمو
بدل كتب فلان ممكن نقول سمعت العضو فلان

الحلول كتيره وانا متاكد اننا كلنا حريصين على المنتدي وعلى حبنا للجريف والسودان .
[/size]

عندما تتصفح هذا البوست ينتابك إحساس جميل ..
مفاده أن كل من شارك فيها يحمل بين حناياه حبه للغالية الجريف ..
وإنتمائه لهذا المنتدى المحبب لنا ..
وتحس بانهم يحملون هم الجريف وهم المنتدى ..
ويقشعر بدنك للكلمات الطيبة التي تن عن طيب أصل وعظيم خلق ..
فهي بحق دعوة للتسامح والرجوع عن الخطأ والتصويب ..
وانا بدوري أفرد مساحة شاسعة للجميع ..
إذا قسوت علي شخص بأسلوب ردئ ..
أو سلبت حق أحد .. أو حاولت مجرد محاولة أن أظلمه أو أظلم حقه ..
إذا أجحفت في حق أحد ..

وإلى حينها ..

إليكم عاطر الحب والمودة ...

يحيي عثمان عيسي كتب:: ]

هل لاحظت( العصابة ) التي نجت من الهلاك ان لا احد غيرها في ساحة المعركة ...
لماذا استأثرت خلال شهرين ماضيين نخبة محددة على هذا المنبر فلان وفلان وفلان وهذا البوست خير شاهد نفس النخبة .
هل هنالك اي ضغوط على بقية الاعضاء يعني بالواضح هل مشرف المنتدي العام هو من يختار ما ينشر ومن ينشر ؟ انا مقتنع لاشيئ من هذا القبيل والرد للمشرف
هل المواضيع التي تناولتها االنخبه خلال هذه الفترة لاترقي الي مستوي ان يثري فيها النقاش او مجرد المشاهدة مما اصاب الصامتين بالملل ؟
ا
[/size]

لو فاهم حاجة .. ألحس المكوة ..
عفوا .. العتب على الفهم ..

ودم في أمان الله ...

وليد...............
[size=29]الآن حصحص الحق

فالوردة تحت اي اسم تنشر عطره
والقنفذ تحت اي اسم يدخل في جلده

ماجدوي ان تلحس مكوه......

لكن ما اقسي ان نلقي بعض الشر ببعض الشر
ونداوي اثما بجريمة
[/size]

حبيبنا يحيى ..
تحياتي ..
أرجو يا باشا أن تفصح من مدلول مشاركتيك السابقتين ..
حتى أستطيع الرد عليك .. كما أحسست من ردك الأول أنك تطلب الرد من المشرف ..
ولكني وبحق الله لم أفهم ما ترمي إليه .. وعلى ماذا أرد ..
كما أرجو أن تأخذني على قدر إمكانياتي العقلية ..
يسر ولا تعسر ..
ولك الشكر والتقدير ..

ودم لنا ولها ...

موضــوعك اليوم يا أيمـــــن لم يمس العصـب الحي فقط وانمــا هو بمثـابة العصب الحي نفســه
وهو عبارة عن جلسه مع النفس واعتراف ومحاسبة واعتذار بشكـل يفوق الوصـف من الجمـال
(الهندى)

والله كلامك يخش القلب جووووه (عبدالله نابرى

الفرق بين الشخص الناضج والشخص غير الناضج هو قبول الحق !(حسن)
ويقشعر بدنك للكلمات الطيبة التي تن عن طيب أصل وعظيم خلق (سنقد)
لكن ما اقسي ان نلقي بعض الشر ببعض الشر
ونداوي اثما بجريمة (يحي)

لانو بقى زى لو هلكت هذه الفئه .....(ايمن صاحب البوست)
بى صراحة انا ما داير معاكم والله احسن اشوف منتدى تانى اتعلم هناك فى اليتمى
دى شنو الشكيه لى الله زول نعامه نتاسد عليهو ساي فى المنتدى .
الرومانسيه هلكت وتعبت هس اسوى شنو ؟امش اتعلم تانى عشان اكون بالمهاره دى اركلس فى المنتدى دا اقع واقوم اااااااااافتوووووونا

موضوع: رد: نداء المنتدى السبت 31 يناير 2009, 7:07 am

حبيبنا وليد
كما اخترت انت عباراتك وقطعا هي مفهومة لديك وربما لدي بعض اخر واقصد هنا ( لحس المكوة ) والوجه الضاحك الذي زيلت به .. لكنها كانت غربية جدا لم افهما بحثت عنها في ما اعرفه من مصطلحات ومعاجم لم اجد شيئ فحق لي ان اختار عباراتي ايضا عساها ان توضح ما لم تفهمه ولكن صعقت انك لم تشأ ان تتفهمها واقصد هنا
الوردة تحت اي اسم تنشر عطره
والقنفذ تحت اي اسم يدخل في جلدة
ماجدوي ان تلحس مكوه
لكن ما اقسي ان نلقي بعض الشر ببعض الشر
ونداوي اثما بجريمه

وحتي لا نفسد ودنا فلنعد الي بداية الموضوع
كتب ايمن السر ( لانو بقي زي لوهلكت هذه الفئه )
المح ايمن واستخدم كلمة ( الفئة ) وافصحت انا واستخدمت كلمة (العصابة ) والتي قالها الرسول صلي الله عليه وعلي آله وسلم يوم بدر ( اللهم ان تهلك هذه العصابة فلن تعبد في الارض ابدا ) راجع سيرة ابن هشام
(قطعا لم نقصد معركة حقيقية ولا كفار ولا مسلمين ولا سيوف وخيول وحراب )
وانتصرت العصابة ونجت بقيادته صلي الله عيه وسلم ومعه ابوبكر وعمر وعثمان وعلي ومن معهم من السادة الكرام
لم تستأثر وانما ارست قواعد الاسلام حتي عم اركان الدنبا كلها ..
اطن الموضوع واضح
عدت مرة اخري الي غاية الموضوع ولبه وهي ملاحظتي وغيري ان هنالك نخبة من الاقلام هي ماتطل علينا واختفت اقلام البقية واخذنا هذا البوست خير شاهد على ما ذهبنا اليه (حسن الرومانسي عبد الله نابري الطيب الامام الهندي بشير احمد عوض الحاج ) قطعا ليس هذا تقليل من شأن احد بل العكس نقدر لهم جميعهم حرصهم على استمرارية المنتدي لكن الانكأ من ذلك ان مداخلاتهم في غالبيتها عبارات اشادة ومجاملة للموضوع حيث ان الموضوع فرض احترام وتقدير الجميع فلاداعي للاسهاب في ذلك .

لم اطلب منك الرد على سؤال ولكن كنت اظن انك ستكتب ان لا حجر علي اي موضوع او عضو وقلت انني متأكد من ذلك .

نداء المنتدي
اهل المنتدي
اختلاف
اخر ثلاث بوستات ولكلها في ذات المعني وهذا قطعا لا يقلل من ما كتب بل العكس ولكن مواضيع ذات مضامين واحدة واقلام لنخبة واحدة فهذه مسيرة تفضي قطعا الي الملل بل لها مؤشر اخر اخطر من ذلكل
ما تبقي من الموضوع اظن قد اتضح لابد من ايجاد السبيل لاستنهاض بقية الاعضاء وندعوك ان تفكر معنا بدلا من ان تلحس
وبعدين موضه اللحس دي جات من مين ويا باشا دي غير مقبولة منك يا مشرف المنتدي حرقتني شديد فهي ليست سودانية ولها معاني اخر مشتبهات احجمت عن الرد عليها حتي لا ندخل في فاهم ولا ما فاهم

لك يدوم ابدا حبي والود القديم

يارومانسي
انتقاءاتك اكبر دليل
من بعدو ماداير دليل
انت الاصيل

الاحباب الحضور جميعا والأصــيل يحيى ... تحيــاتي السامقـات

صدقت فيما تحدث باسهاب عنه يا استاذ يحي فيما يختص بالمنتدى والعصبة التي حوله هذه الأيـام
فنعاني كثيرا من خمول وفتور في الاقلام الذهبية والمشاركات التي تنعش رغم تواجد الرومانسي
المشــع والخطير أيمن السر والكثير الكثير من امثالهم .. لكن ياترى ما السبب ؟ انا أيضاً اتزايد
تساؤلات لاأجد لها الحل حتى عند نفســي فأنا آخر واحد في العصابة الموجودة وأقلهم جهدا وتواجدا
ومشاركة ...

لكن هو حال المنتديات هكذا أحوال ومواســم وأجيــال لا اقول ان حكمنا صحيح مائة بالمائة على
وضعه حالياً مقارنة بفترات سابقة متقلبه كثيراً ولــكن أدعو أن يطول عمر النشـاط والحيوية في
الدمــاء وأن يزيد بقدر الامكان ... فعلا نحتاج للجديد و المثير ومرحبا بكل الآراء والمقترحات
والنقد البنـّـاء والمثمر فالكـل جنود لخدمة المنتدى ... دعونا نبتكر فكــرة الراكوبة والمماثلة
لهذا البوست في المضمون لنفرغ فيها الهموم .. وهي موازية لفكرة هذا البوست حيث نفرغ هنا
التضجرات ونقدم الاعتذارات في رحاب ايمن السر .. ولتكن هذه الراكوبة انطلاقة للحديث
الرصيــن واتكـائة للجميع للحديث خارج النـص عسى ولعــلنا ان نكتشف سبب الفتور ...

مع تأكـدي وعلمي التام أنه غياب وفتور غير مقصود ولامفتعـل .. لكن قد يكون امتحان
لغلاوتهم عندنــا ومن هنـا انا ذاهب للسؤال عنهم فردا فردا في كل الأمـــكنه ....
وابتدي بود ريـــا ( عبدالرحيم حطـــي الذي اختفى ) ثم كتابات عمنا عصا عبدالصادق
ومن الجيل اقديم عمنا حمد النيـــل عاشق الجريف وعمنا أبو زيد مصطفى والمعاهدة
وعمنا الحاج عبدالصادق وبقية أعمامنا الكرام ... وسؤال أيضا عن الأخوات الفاضلات
المغتربة وسودانية ونجمه والبقية منهن ... وسؤال عن كل الاقلام الحره التي فارقتنا
عن غير قصـد .. أو ضلت طريقنــا .....

لكم التحيه/ الاخ الايمن .. والاخ/ الهندى ..

انا ملاحظ ليك ياالهندى من زمن وانت قاعد تبكى ,
بس يادوب عرفت سبب بكاك ..
على ما اظن سببه الفتور
مااتعرف سبب لهذا الفتور وما اظن اتعرف
هل هو قله المواضيع ؟
ام هو قله الاعضاء المشاركه؟
وللاسف الشديد انا لاحظت شىء فى هذا المنتدى لم الحظه فى المنتديات الاخرى ..
وهو ان هذا المنتدى شلل ومجموعات ..
اى بالاوضح فلان نزل موضوع البردو عليه والبشاركوه فى الرأى تكون مجموعه معينه ..
يعنى زى الغربه..
واكيد اى واحد برا السودان بفهم قصدى ..
والشىء الثانى على ما اعتقد الناس خوافه وانا من ضمن الناس الخوافه ..
مثلاً اذا كان رديت على موضوع حسب وجهه نظرك وكانت وجهه نظرك مخالفه لصاحب البوست
تأكد تماما صاحب البوست بذعل منك حقيقه
عشان كدا اغلب الاعضاء اكتفو بالتصفح والاحتفاظ بارائهم ..
ولاشنو؟؟؟
دى وجهه نظر ولو غلطان ورونا الصاح.

ولكم خالص الود.

]الاخوة المرور
اخشى ما اخشاه ان يكون المنتدى اصيب بالداء السودانى الخطير وهو (عدم القدره على الحفاظ على القمه)
فى السودان كثير ماتتهاوى الاشياء الجميله بسرعة البرق تصيبها لعنه وزلك لاننا شعب مللول غير ثابت المنتدى وصل الى القمه وسمعته غطت الافاق والكثيرون يدخلون بدافع البحث عن الجديد المثير .
لكن بايدينا نحن التشكيله الثابته ان نغير الركود اذا كان الجميع يسأل عن الفتور فالاحري بكل شخص يسال ان يطرد النعاس عنه ويغسل وجهه بموية بارده ويفوق ويكتب .
بعدين غير الجازبيه للدخول هناك ظروو\ف قاهره تمنع الاشخاص التواجد المكثف......
جميل ان يكون هناك شلل يا ابو نمر لكن لا للفرقه فاصابع اليد تشكل اليد ودى تناغم الواحد يعنى مجموعه والمجوعه تعنى واحد[/

]الحبيب يحي

والاخ وليد
لكما التحيه صراحه لم ارد عليكم لاننى تمنيت ان يستمر الجدل بينكما الى حين ولو كانت هناك بعض الكلمات القويه .
يعتمد الجدلين على الجدل للوصول للحقيقه من وجهة الاختلاف لكن راى انا ان طريقه النقاش هنا ترفع درجات الحب والدليل على زلك ان الاخ تساليه بعد جدل سخن بينى وبينه قام ببعث رساله وانا كزلك فى البريد الخاص لى كلها رقه وحنيه وجمال .لدرجه تمنيت ان العن تساليه حتى يكتب لى .لكما التحيه وانتما درتين من ماس فى عقد المنتدى الجميل .

الحبيب أيمن،،،

الجماعة قالو بوستك ده يكون إتكاءة، فجة الناس تقيل فيها من الهجيرة، يعني خلينا نتخيلو كده شجرة نيم، و بتفق معاكم يكون خارج النص، لأنو أي كلام مهما صغر شأنو بالضرورة حا يكون فيه فايدة للناس،،

تحية وشكر للأخ محمد زين، و رايكم شنو في حكاية توصيل كتابات و أفكار الغير للمنتدى، من ناحية إشهار للمنتدى ومن ناحية أخرى تحريك للركود،
طبعاً ما حبيت أرد علي مداخلتو في البوست، و السبب هو أن هذا الكلم يجب أن يكون في الواجهة كم يوم كده لأنو دسم و بحتاج فترة للهضم، طبعاً من الأسلوب واضح جداً الروح الاحترافية و التمكن، ومحاولة محمد دي تعتبر إضافة للمنتدى، لأنها عملية نقل دم ودربات تغذية بتعمل على انعاشنا و فتح آفاق جديدة للكتابة، و الفكرة لو أخذناه لنهاياته القصوى ممكن المنتدى عن طريقه يتخطى حدودالجريف،،،
ليه ما يكون مثلاً في القسم الديني مرجعية دينية يمكن أن نلجأ إليها في الاشكالات التي تقابلنا، أو حتى فتاوى من ناس ثقات، و نخصص بوست مثلاً لشيخ معين و كل واحد يسأل في المداخلة و الشيخ براحتو يرد بعد يوم أو يومين حسب ظروفو، و كذلك باقي الأقسام،،،،

» لى شنو اشتركت فى المنتدى
» يا ناس المنتدى اصحو
» المنتدى
» اهل المنتدى
» أفراح المنتدى