البلد الوحيد ! ( الفاتح جبرا)

نحن البلد الوحيد الذى يعمل فيه (شرطى المرور) شاكى وقاضى ومتحصل وأمين خزينة .. فهو يوقفك متضررا من خرقك للقانون (شاك) ويثبت ضدك التهمة (قاض) ويستلم منك قيمة المخالفة (متحصل) ويضعها داخل الشنطة (أمين خزينة) !

نحن البلد الوحيد الذى لا توجد به (حديقة حيوان) على الرغم من تعدد المناخات وتنوع الحيوانات بجميع أشكالها
.. حديقة أيه … وحيوان أيه .. ما أولادنا بيمشوا (ماليزيا) يشوفوها هناك فى السنة كم مرة !
نحن البلد الوحيد الذى ما أن تفتح فيه محلاً لبيع الأطعمة حتى يتفقدك الجميع .. بتاع الرخصة التجارية .. بتاع النفايات .. بتاع الضرائب … بتاع الشنو ما بعرفو … الشخص الوحيد الذى لن يأتى إليك هو الشخص الذى يفترض أن يتأكد من صلاحية الاطعمة التى تقدمها ! (مش مهم صلاحية أيه؟ مش كل واحد إستلم قروشو)؟
نحن البلد الوحيد الذى لا توجد به (مراحيض عامة) للنساء إذ أن القليل جدا من المراحيض التى توجد مخصصة جميعها للرجال (أخوان نسيبة) ! وعلى (نسيبة) أن (تصبر) حتى تعود إلى منزلها لتقضى حاجتها !
نحن البلد الوحيد فى العالم الذى لا توجد بعاصمتة (مواصلات عامة) ومحطات (بصات) وعلى الرغم من أن وزارات كالداخلية يمكن بأن يكون لديها (مؤسسات تعليمية) إلا أن وزارة المواصلات لا يوجد بها (شركة مواصلات ) !
نحن البلد الوحيد الذى يمكن أن توجد به (كلية طب) لا توجد بها (مشرحة) ، مشرحة على أيه؟ مش أول لما (مكتبة) و(معامل) وأساتذة ؟
نحن البلد الوحيد الذى يمنع فيه أقامة (حفلات الزواج) إلا بتصريح (مدفوع القيمة كمان) مع تحديد موعد (إنتهائها) فى الحادية عشر مساء ! (ليه حداشر مش عارف) !
نحن البلد الوحيد الذى يمكنك أن نعلن فيه عن سلعتك فى أى مكان دون أى مراعاة لجمال المدينة ، (جوه الكبارى) على (أعمدة الكهرباء) فى (روسين البيوت) و أعلى (العمارات) على (الحوائط) .. مش المحلية بتقبض على (الخرمجة) دى (فلوس) ؟ يبقى جمال أيه وبتاع ايه !
نحن البلد الوحيد الذى يمكنك أن تقود فيه عربة دون أن يكون لديك رخصة قياده فيقبض عليك (شرطى المرور) الذى يستلم قيمة المخالفة ثم يفسح لك الطريق ويتركك تتابع سيرك وكأن شيئاً لم يكن (مش دفعت ؟ أيه المشكلة تانى) !
نحن البلد الوحيد الذى تدفع عند مغادرته (رسوم) … على أيه وليه مش عارف ! معقول بالمنطق داخل تدفع وطالع تدفع ؟
نحن البلد الوحيد الذى يسمح لموظف – مسئول - (عام) أن يكون له عمل (خاص) … مش مشكلة لو ما دفع سعادة المسئول الضرائب مثلاً لأخدى شركاته فأكيد (موظف الضرائب) ح يقفل الشركة بالضبة والمفتاح ! تاااح
نحن البلد الوحيد الذى يقوم فيه المواطن بشراء (عداد الكهرباء) من (الهيئة) ثم تؤجره له بإيجار شهرى مدى الحياة (مش يخلوها حلوة ويخلو المواطن يسدد قيمة العداد شهرياً لحدت ما يخلص تمنو … الدفعو؟)!
نحن البلد الوحيد الذى توجد به أعلى نسبة من (المحللين) حيث تحتشد البلد بالمحللين الرياضيين والمحللين السياسيين والمحللين الفنيين والمحللين العسكريين . (لو عاوز تتأكد من كده أمشى لأى صيوان عزاء) !
نحن البلد الوحيد الذى يكافئ من أفنى زهرة شبابة فى خدمتة من المواطنين لمدة ثلاثين عاماً بمعاش شهرى يعادل قيمة ستة كيلو لحمة ! (عجالى) ! (عارف .. لو ضأن تبقى مشكلة !)
نحن البلد الوحيد الذى بمكن فيه لموظف عام أن يقوم بتشييد (عمارتين) من (مرتبو) من غير حد يقول ليهو تلت التلاته كم ؟ هو بالذمة كده (تلت التلاته) الأيام دى كم؟

انت قايل الريادة دى ساي
نحن الوحيدين فى العالم المافى زول بشبهنا نوعنا انقرض

فعلا خالف تزكر

عشان كدا نحن مزكورين
[size=24]فى حاجه نسيتا اخ الطيب نحن البلد الوحيد الفيه ديمقراطيه فى الراى ومسموح ليك تقول اى حاجه مضايقاك داخل ركن نقاش فى الحرم الجامعى ويستمعو ليك باذن صاغبه وتانى يوم تلقى
روحك خارج التغطيه[/size]

باش مهندس .. الطيب .. عســاك طيب
والله كـــلامك صحيح وعين العقـــل
وأنا المزعلني شديد شركات الاتصالات زمان كانت بتشيل في الدقيقة 500 حنية
في الاتصال والاستقبال .. واسه خلوها الحكاية بقت رخيصة شديد وساهلة
لكن ناس المطار الى الآن ما خلوها .. مره سألتهم وقلت ليهم لو الزول وصل البلد
وماعندو قروش جاي كشــة مثلا يعني ما يدخل ويبقى معلق بين البلدين ههه
قعدو يضحكو وقالوا ادفع يازول بينهره كده ... دفعت ودخلت البلد مخلوع من النهرة

مرحبا بكم في عالم المستكا

شكرا علي المرور ايمن وسيدا ازيك

وتحياتي لك يا الهندي اخبارك وشكرا علي المرور ومشتاقين كمان

» إختفاء الشعب الفضل !! (الفاتح جبرا) (خطيره ارجو القراءه)
» برج الفاتح مبااااااااااالغة...؟؟؟!
» صور لبرج الفاتح في السودان
» مجموعة صور لبرج الفاتح
» مجموعة سيد وزعيم البلد