عضو جديد

موضوع: عضو جديد الأحد 10 أغسطس 2008, 8:35 am

التحية لكم جميعا

يا أخوانا تلاتة سنوات كل أسبوع ولّا أسبوعين بتجينى

دعوة للأشتراك فى منتديات ، منها المناطقية ومنها العامة

ومنها الثقافية ، أصلو ما حاولت أشترك و ما زلت بعتذر بشكل مستمر.

لكن من مساء أول أمس الجمعة 8/8/2008 ،

أول مرّة أعرف عن منتداكم ده بقيت مطارد أصلكم كيف ،

والشكر لصديقى عمر حسن علي تنبيهه و لو إنو تنبيه متأخر.

وقسما بالذى جعل الجبال أوتادا ، أنا لمّن أدخل المنتدى ده

بشم ريحة كركوج الجَد جَد عديييييل كده ، يعنى مُش مجازا.

الشكر للذين وضعوا اللبنات الأول لهذا المنتدى.

وعلي أى حال بالرغم من الإرتباطات الكثيرة ،

وفيها المجبورين عليها و فيها غير المجبورين عليها، بنجيكم.

لأنو الواحد مهما إنشغل، آخر النهار لازم يجى بيتو.

ولكم خالص المودة

الشفيع الجزولي

موضوع: رد: عضو جديد الأحد 10 أغسطس 2008, 9:32 am

الشفيع معانا هنا؟؟؟ لاحول ولاقوة إلا بالله مالك إتاخرت يا زول؟؟
نورت البيت السعيد...
يا طلة العيد المجيد...
يا فرحة المولود جديد...
ليك نغنى وبيك نشيد...
... .... .... ....
... .... .... ....
وما كتر خيرك وما كتر خيرى كتر خير أبو مصعب الحمزاوى { الورانا } الدرب فعندما شرفنى بزيارته كان يذكرك كثيراً . فلك وله التحية ولك من المنتدى الف تحية
ودمتم لنا
خضر حسن

موضوع: رد: عضو جديد الأحد 10 أغسطس 2008, 10:41 am

الأخ الكريم أستاذ خضر حسن

ياخى ليك تحايا كبار

أها ، هذه إحدى الفوائد الجمّة لهذا المنتدى الجميل بأهله

حيث تمكّنا من لقياكم إسفيريا.

أبو مصعب{ شيخى و دليلى} كتر خيرو لكن برضو بتحمل مسئولية تأخيرى مع آخرين.

وهو أيضا قد حدّثنى عنك كثيرا بعد عودته من زيارتك

و كذلك حين كان معى مساء الخميس و نهار الجمعة الماضيين.

ياخى شكرا كتير كتير علي كلمات الترحيب الطيبة جدا

موضوع: رد: عضو جديد الأحد 10 أغسطس 2008, 10:53 am

الصديق الكبير، عصام عبدالصادق ، صديق الطفولة وحتى الآن!

وإبن عمّتى "أبو تراجى"

شفتو كيف أستاذ خضر بسألنى مالك إتأخرت؟

إنتو إتلوّمتو شديد ، المتعة دايرينّها لي رقبتكم بس يعنى.

إنت يا عصام بدل ما تدعينى أنا ، إنشالله من باب "كبيرهم الذى علّمهم السحر"

تَمِش تطبِّل ليّ خالد الجزولى؟ إنشالله ينفعكم ، إنت و أبو تراجى.

لكم تحايا و أشواق

موضوع: رد: عضو جديد الأحد 10 أغسطس 2008, 10:55 am

[size=18] مرحباً بك أخى الشفيع الجزولى ونورت المنتدى حقيقة هذا اليوم أنا سعيد جداً جداً بوجودك معنا وننحن فى أمس
الحوجة لكم لتزودونا بارائكم وأفكاركم الجميلة وجميعنا يعلم بماتحمله من ثقافة عالية أنت والاخوان محمد حسن
وعمر حسن والاستاذ خضر وألف سهلا ومرحباً بك وفى إنتظار مساهماتك الجميلة .
وراجعين[/size]

موضوع: رد: عضو جديد الأحد 10 أغسطس 2008, 11:08 am

أخى العزيز بدر

ليك التحايا النواضر و شكرا جزيلا على الترحيب و حسن الظن.

والمنتدى منّور بيكم إنتو والله ، أنا والله مليان غبطة و سرور بالتواصل ده

وأعاهدك إنو ما نغيب عنكم أبدا

موضوع: رد: عضو جديد الأحد 10 أغسطس 2008, 11:10 am

مرّة تانية التحية لكم جميعاً

ويا نبيل أحمد علي ، شُفتا أنا فى رسالتى الأولى لا جبت سيرة أخ و لا عم ،

أكتر شي بقبلو منّك تقول ليّ "الأخ" و إذا قلت "فردة" أو "حبّة" ده المطلوب.

لكن إذا مشيت قلت ليّ "العم" أو حتى "عمّو" بزعل منّك.

ومن هسى مافى زول يقول ليّ أضع الصورة بتاعتى فى البروفايل.

الكلام ده يا أبوتراجى بعجب ناس و ناس ، و مافى داعى للأسماء.

والتحية لك يا صلاح . منْ يصدق أننا كنّا جيران ، من بيتنا تشوف بيـتكم.

منْ يصدق أننى فى زمنٍ ما كنت بمشى بيت العم قريب الله شبه يومى ،

و هسى، ما حصل شُفت ،صلاح الجميل ده، شَوف ساى.

وسلامٌ علي روح الراحل د. محجوب.

وتحية صادقة لكل منْ لم أتعرف عليهم بعد ، لكن حتما سنتعرّف.

موضوع: رد: عضو جديد الأحد 10 أغسطس 2008, 12:35 pm

الصديق الكبير، عصام عبدالصادق ، صديق الطفولة وحتى الآن!

وإبن عمّتى "أبو تراجى"

شفتو كيف أستاذ خضر بسألنى مالك إتأخرت؟

إنتو إتلوّمتو شديد ، المتعة دايرينّها لي رقبتكم بس يعنى.

إنت يا عصام بدل ما تدعينى أنا ، إنشالله من باب "كبيرهم الذى علّمهم السحر"

تَمِش تطبِّل ليّ خالد الجزولى؟ إنشالله ينفعكم ، إنت و أبو تراجى.

لكم تحايا و أشواق

ألف مرحب ومرحب بقامتنا السامقة الشفيع الجزولي..

وحقيقة حضورك إنتظرناه كثيراً ومهما كان موعد وصولك ( بدري أو متأخر ) له طعم آخر .. وأظنك توافقني الرأي بأن الخيول الإصيلة دائماً بتظهر في المنعطف الأخير..

وطبعاً منذ مدة وأنا بلاهي بك وأعلنتها من قبل للأخوان أبو تراجي وتسالية وقلت لهم حاولوا تدحرجو لنا الشفيع الجزولي وفي حالة طلته ناس أبو تراجي يشوفوا ليهم بلداً ثاني ( ودي كانت الغلطه ) لأنو يظهر الجماعة عملوا تشفير لك وفات عليهم أن أبو مصعب طابور خامس وحايصلك .. حايصلك.

وعموما مرة أخرى مرحب بيك ونورت دار البيت السعيد ونتمنى أن يطيب لك المقام وتتحفنا كما عودتنا دوماًويستمر التواصل

عصام عبدالصادق

موضوع: رد: عضو جديد الأحد 10 أغسطس 2008, 12:50 pm

الاخ الشفيع الجزولي ياهلا بك

والدار دارك وفي انتظار مساهماتك وافكارك

ونورت المنتدى بطلتك البشوشه فلك خالص التحايا

ونتمنى لك طيب الاقامه وقضاء وقت ممتع ولحظات سعيد

بصحبتنا باذان الله
حسن شمس الدين

موضوع: رد: عضو جديد الأحد 10 أغسطس 2008, 1:38 pm

الحبيب عصام

والله ياخى طلّتك دى كتلت حيلى

وقصة أبو مصعب الطابور الخامس ده ، ضحّكتنى لحد ما وقعت علي ضهرى

وبعدين يعنى أبو تراجى ده ، كان ما بعرف إنو ابو مصعب ممكن يبقى ليّ طابور خامس، يبقى بعرف شنو فى كركوج؟

والله يا عصام ما براك البتهاتى و تلاهى ، خليها مستورة ساى.

وياخى الله يدوّم المحبة و الود و إنشالله المنتدى الجميل ده بي مواضيعو المتنوعة

نتلاقى فيهو كل يوم.

مع كثير الأشواق

موضوع: رد: عضو جديد الأحد 10 أغسطس 2008, 1:44 pm

الأخ حسن شمس الدين

عساك بخير ياخى

شكرا للإستقبال الباهى

ومتأكد إنو صحبتكم ممتعة و مفيدة

وحأجيك إنشالله فى موضوعك الحيوى بتاع العادات

وليك تحايا كثيرة

موضوع: رد: عضو جديد الأحد 10 أغسطس 2008, 3:19 pm

عساك بخير ياخى
الشفيع يا ابن خالى الغالى والرقم الجزولى سعيد
ياخى الترحيب بك لاتوجد كلمات تعبر عنو
وماداير ارد على كل الاتقال بس سامحنا
مشغولياتا هى الماخلتنى اقول ليك حاجة عن
المنتدى
والبركة فى اخونا عمر حسن الرائع دايما
حارجع ليك تانى
بس خلينى فى حالة الفرح الخرافى بى
حضورك
ابوتراجى

موضوع: رد: عضو جديد الأحد 10 أغسطس 2008, 4:12 pm

الشفيع الجزولى كتب:

وقسما بالذى جعل الجبال أوتادا ، أنا لمّن أدخل المنتدى ده
بشم ريحة كركوج الجَد جَد عديييييل كده ، يعنى مُش مجازا.
الشكر للذين وضعوا اللبنات الأول لهذا المنتدى.
وعلي أى حال بالرغم من الإرتباطات الكثيرة ،
وفيها المجبورين عليها و فيها غير المجبورين عليها، بنجيكم.
لأنو الواحد مهما إنشغل، آخر النهار لازم يجى بيتو.
ولكم خالص المودة
الشفيع الجزولي

ونحن أيضا في قســم آخر نقول
وقسماً بعظمة من كساك كل الجمـــال النقاء ووهبك صفاء الروح
وقسماً بمن حبانا السعادة بقدومك إلينــا وحباك جميل القول والحديث
أننا في سعــــادة تعانق السحـــــــاب ومع قدومك تناطح انفاس فرحنــا
قمم الجبــــال وفي لحظة وصـــولك كان إعلان الفرح الطويل

كن بخير أيها الرائع الفخيم الشفيع الجزولي ( بدون عم فقط لترضى ) وحياك الخالق
بيننا .. وكن بالقرب ما استطعت فمنكم نستقى ألوان نزين بها دنيا الحقيقة
وشكرا لك لوجودك معانا وشكرا للذي ساقك إلينا أبو مصعب
وشكرا لمن كساكم البهـــــــاء والجمــــــال فقط كن بقربنـــا بقدر ما تستطيع

الهندي بشير حاج عبدالله نابري

موضوع: رد: عضو جديد الأحد 10 أغسطس 2008, 11:55 pm

سلامات يا أبو تراجى

ياخى عذرك مقبول و أنا من ناحيتى سامحت

بس شوف تحلّها كيف مع صحبك الحبيب عصام

عبدالصادق ، القال ... ناس أبو تراجى ديل يشوفو ليهم بلد تانية.

علي أى حال، خلّيك حذر معاهو و ما تنسي إنو إيدو طويلة.

والبركة فيكم و فى كل محبى الشاعر درويش

و بمناسبة الشعراء ، بعد يومين تلاتة دايرك فى البوست الورد

فيهو سيرة عمّنا المرحوم عبدالقيوم إبراهيم مالك

وتحايا كثيرة لأم تراجى

موضوع: رد: عضو جديد الإثنين 11 أغسطس 2008, 12:25 am

الأخ العزيز ود "نابرى" الإسم الكبير

تحايا و تحايا و شكراً لهذا المنتدى الذى جمعنا وإيّاكم

ياخى عدم التواصل مع الطيبين أهل المنطقة الطيبة

حيث الوجدان إستقرّ ، عامل لينا شرخ فى النفس

وإنت أدرى بأفاعيل الغربة.

ياخى ما بكفى أقول ليك شكراً علي روح الإستقبال الفخم.

وأقول إنها فخامة أكثر منى ومما لديّ و لكنها بعض منكم.

وأأكد ليك أننى سأكون بقربكم ، لا بقدر ما أستطيع ، بل كواجب

لا فكاك منه.

موضوع: رد: عضو جديد الإثنين 11 أغسطس 2008, 1:57 am

الرائع بقامة بلدي الجريف ود الشفيع ..
حياك ربي زو الجلال .. وتحية منا نسوقها إليك عبر الشبكة العنكبوتية ..
مرحبا بك وسطنا تارة وأمامنا تارةً أخرى ..
مرحبا بك وسط أهلك وأحبائك وأصدقائك ..
وشكراً للأقدار التي جمعتنا بك يا ملك ..
نستميحك عذراً اخي أن نتكي على ظلال كلماتك المعبقة بالرياحين ..
وأن نسترق النظر إلى محياكم .. والنظر إلى ما تسطرون من روائع ..
تزكون به هذا المنتدى الحبيب إلينا ..

ود الشفيع .. دم لنا ولها ...

موضوع: رد: عضو جديد الإثنين 11 أغسطس 2008, 4:28 am

الكريم ود سنقد

ليك التحية مضاعفة و التحية لآل سنقد الطيبين

وشكرا لكم ، فأنتم منْ مكّنتونا من لقياكم ، فى الأسافير .

لقاءآت الأسافير التى بعدها يكون اللقاء وجها قبالة وجه ممكنا وسهلا ثم ممتعاً

ووالله ليس لديّ أى مشاعر أخرى غير ما ذكرت ، فأنا

حقاً وسط أهلي و صحابي و أصدقائى.

ودمت أنت لهذا المنتدى الجميل، الضرورى ، الحنون

موضوع: رد: عضو جديد الإثنين 11 أغسطس 2008, 6:31 am

ألف مليون مرحب بأخونا العزيز الشفيع ود الجزولي ود سعيد
حياك الخالق وسعيدين بريحة الناس الجايين من بلدنــا الحبيبة
أتفضل أدخل لي جوه الدار دارك وكان ما شالتك بتشيلك في عيونا
نورت الدار بوجودك
وذي ما قال ليك عصام:
الخيول الأصيلة دائماً بتظهر في المنعطف الأخير
نتمنى أن يطيب لك المقام بيننا يا ود الغالي
ونحن في انتظارك مساهماتك وأفكارك
وسلم لي على الأستاذ/ عبد الله سعيد
وكل عام وأنتم بألف بخير

موضوع: رد: عضو جديد الإثنين 11 أغسطس 2008, 7:56 am

أخونا الطيب بخيت

إزيّك ياخى ، عساك بخير

شكرا جزيلا علي الترحيب الحار، ياخى أنا سعيد جدا بي لقياكم

سلامك لعمى عبدالله سعيد يوصل إنشالله ، ولكن أنا مجدوع فى الخليج

الكلَها حجر . وياريت لو ما فارقنا الأرض الطيبة

وتسلم داركم و تسلم عيونكم الطيبة

موضوع: رد: عضو جديد الإثنين 11 أغسطس 2008, 8:37 am

(

مرحبا بك فكر متجدد
وقلم لا ينوي غير الصدق

و100000000000000000000000000000 حبابك$$$$$$$$$$$$
( حتة خارج النص)

غربر منقي تيق ايرجيرو ان كاري كبو سفريرو
يلللللااااااااااااااااااااااااااااااااااااااااااااااااااااااااااااااااا انبلوويه اندار جوووووورو

موضوع: رد: عضو جديد الإثنين 11 أغسطس 2008, 10:10 am

65446410115/22932558.33.00كظ

موضوع: رد: عضو جديد الإثنين 11 أغسطس 2008, 2:49 pm

عبدو كمبيوتر ، يا إبن خالى

عساك بخير ياخى

شكرا علي الترحيب .وشُفت كركوج دى جذابة كيف؟

ولمنْ لا يعرفون ، إبن خالى كمبيوتر جا الجريف و هو طالب جامعى، و بقى

مكتول فى كركوج .

وما علي المتشككين ، إلا الإستنتاج.

موضوع: رد: عضو جديد الأربعاء 13 أغسطس 2008, 1:34 am

الأخوة الأعزاء

عساكم جميعا بخير
يا أخوانا مافى زول يلِـمّـنى فى صلاح قريب الله و نبيل أحمد علي؟
ويا أبو تراجى كيف حالك و الأرقام دي شنو ؟ شفرات لغوية جديدة نحن ما عارفنّها و لّا كيف؟

موضوع: رد: عضو جديد الجمعة 15 أغسطس 2008, 2:02 pm

الاخ الغالــــــي والحبيــــب / الشـــــفيع الجـــزولــــــــي

ن،وررررررررررررررررررت وشـــــــــــرفففففففففففففففففففت دارك ( منتــدى الجريـف شــرق ) ، ومشكـور علـى هــذه الاطـلالـــه الحبيـــــبه لنفوســــنا ، والحمــد للــه على المنتـــدى الـذي جمـــع بين الاحبــــه ، وما دايـرين نقــول ( إذا حضــر ( المـــاء ) الشفيع ، بطــــل التيمــم ( ابو تراجــي ) ، يعنـي الاصـلي ظهــر فـلاداعــي للتجاري .

مرحبـــا بــك وســــعداء بــــك ، اخ عـــزيــز وابن الحــــارة الكريمـــة .

اخـوك / ابو المقــداد

موضوع: رد: عضو جديد السبت 16 أغسطس 2008, 3:11 am

العزيز الأستاذ محمد كمال الدين

والله ليك وحشة ، طالت المدة التى لم نلتقى فيها. عشرة سنوات بالتمام و الكمال.
والشكر لهذا المنتدى وأهله الجميلين الذين جعلوا لقاءك إسفيريا ، أمرا ممكناً.
والبركة فى ذرية الرجل العظيم الذى فارقنا على حين غفلة ، وهكذا يرتحل نجباء الناس.
علي قبره النور و الرحمة.
والله قبل أسبوع فقط كنت بسأل عمر حسن عنك . آمل أن تكون الأمور كلها علي مايرام ما محمد ، و شكرا علي الترحيب الحار. والتحية للعيال.

» عضو جديد
» عضو جديد
» عضو جديد
» عضو جديد
» عضو جديد