إبن الغالي،
تحياتي و تشجيعاتي الحارة علي طرحك، و مشاركاتك في الفعاليات تعتبر إضافة كبيرة ليك و لينا،،،
عجبني العنوان، "لنعيد بناء السودان"
فعلاً السودان محتاج إعادة بناء، لأن الأساس من أول غير سليم,,,,
لأننا ببساطة ما عارفين الطريق الصحيح من وين،،،
و كل مجهودنا ضائع لأننا بنبي بدون خرط، يعني بيوت جالوص عشوائية طبعاً ما بتعرف الجالوص أسأل عمر....
السودان بلا شك مليء بكل الإمكانات فوق الأرض و تحت الأرض و من السماء إضافة للبشر...
و لكن التنيمة لا تقوم بالإمكانات و البشر فقط، يعني في معادلة زي بتاعة الكيماء...
التنمية (الحضارة) = إنسان + تراب (إمكانات مادية) + وقت
و الثلاثة عناصر يتم تركيبها ومزجها عن طريق الفكرة بسموها الفكرة المركِّبة...
ببساطة جداً نحن في حاجة للفكرة، في حاجة للتخطيط الذي يتجاوز أعمار الناس، يعني تكون مدته طويلة...
بمعنى تفكير استراتيجي، لأن الإنسان عندما يعمل من أجل أن يأكل و يشرب بس بكون مثل البهايم لا يتطور ابداً...
و لكن الإنسان عندما يفكر في المستقبل سيعمل من أجل الأكل و من أجل المستقبل معاً...
لازم كل واحد و هو ماشي الشغل بتاعو يكون عارف حاجتين:
أولا: الشغل من أجل المأكل و الملبس و التعليم للشخص نفسه..
ثانياً: أن الشغل هو وسيلة لتنمية المجتمع كلو...
بمعنى تاني: أن العمل مهم للفرد ليأكل و يشرب و لكنه مهم أيضاً للوطن أو المجتمع عشان يستمر و يتطور و يتقدم...
يعني بالمختصر كده نحن محتاجين ثقافة واعية لكل أفراد المجتمع النجار و الحداد و الجزار و الطبيب و الطالب، ثقافة تجمع الناس ديل كلهم من أجل هدف واحد هو تطوير المواطن و الوطن....
بمعنى أن تكون مثلاً النظافة شعار الناس ديل كلهم، و بالتالي حتلاقي مثلاً البلد كلها بقت خالية من الأوساخ،،،
وشكراً ليك و انتو مستقبلنا، لازم تستفيدو من الأخطاء القدامكم دي، عن طريق العلم لأن العلم هو المخرج الوحيد، و ما تكونو زينا كلامنا كثير خلاص موش،،،