الجامعات السودانيه

الاخوه الكرام التحيه لكم جميعا
مالقته نظري لكتابة الموضوع سببين
الاول / الموضوع الرايع الذي كتبه ياسر عثمان عن التعليم في
قسم الجريف شرق
الثاني /
في مره من المرات وانا قادم من المكتب للزهاب الي البيت ومرورا
بجامعة الخرطوم وتحيد كلية صيدله او طب ومن خلال السور لفت نظري
كميه من الطلبه والطالبات وهم يقومون بالجري و(الكوراك )
مما جعل كل المارين علي الطريق الوقوف لمعرفة ما يحصل
ومن خلال نظرتي للطلبه اتكدته من انهم ليسه في المستوي الاول
والذي حدث انهم يقومون (بفليق ) بعضهم بالطورته والكريمه والكلام ده
داخل الحرم الجامعي ومن طلبة جامعة الخرطوم
هذين النقطتين هم السبب الاساسي لكتابة مايدور في الجامعات السودانيه

الجامعه في السابق كانت لها قيمتها بانها تخرج طلبه لهم
وزنهم في المجتمع ولهم دورهم الفاعل تجاه الوطن ولكن الان الجامعه
تخرج طالب غير موهل اكديميا ولا اجتماعيا ولس لديهي اي نوع من انواع الالتزام
تجاه الوطن

لا اريد ان ارمي باللوم علي الطلبه ولكن الاساس في الموضوع هو

سياسة الحكومه تجاه التعليم ودي نقطه مهمه جدا

في السابق وقبل الانقاذ تحديدا كان الطالب عندما يصل المرحله الثانويه يكون موهلا
تاهيلا كاملا من كل النواحي وعندما يصل الجامعه يكون الطالب بمثابة المربي والمعلم
وعندما يتخرج من الجامعه يكون لهذا التخرج صدي كبير في نفوس اقرب الاقربين
والمجتمع كامل
اما بعد الانقاذ
بدات الحكومه في السيطره علي التعليم وقامت بتغير المنهج دمجة المتوسط مع الابتد ئيه
وخصخصة التعليم (وكترة من المدارس والجامعات الخاصه ) واجبرت المعلم الي اللجو
الي التعليم المادي والهروب من التدريس في المدارس الحكوميه
بعد ذالك استطاعت الحكومه السيطره علي التعليم من خلال هذه الاشياء التي فرضتها علي الشعب
واصبح الطالب غير موهل حتي للتحدث ناهيك عن الاشياء الاخري
وهذا ما ارادتهوا الحكومه وهي ان تقضي علي التعليم حتي لا تستطيع هذه الشريحه الوقوف امامه لانوا
وعلي مدي التاريخ غالبية الانتفاضا ت كانت من خلال الطلاب
وسوف اقوم بسرد قصه لكم

في الزياره الاخيره للاخ صديق النعمه للسودان قمة انا ومجموعه من اعضاء المنتدي
بزياره له في منزلهي وقابلنا عمنا النعمه حاج الطيب وبعد حديث طويل عن الجريف
والمشاكل تطرقنا الي التعليم ومشاكل مدارس الجريف
تحدث عمنا النعمه عن مدرسة مبارك زروق وقال المدرسه شهدت تدهور غريب
وهي من مدارس التاريخ علي مستوي السودان
زكر عمنا ان نسبة النجاح قبل سنتين كانت 10% وبعد جهد من اهل الجريف وجهد من
عمنا استطاعوا ان يجهزوا المدرسه تجهيز كامل وخلال سنتين اصبحت نسبة النجاح 75%
بعد ذالك قام مكتب التعليم بنقل المدير الي مدرسة عوض الحسن ام دوم واتوا بمدير عوض
الحسن الي زروق واول ما قام بهي المدير الجديد
قام باخلا القاعه الخاصه بالكمبيوتر واستقلالها لسكنه الخاص وهذه القاعه كانت
مزوده باحدث الاجهز قام المدير بتخزين الاجهزه في المخزن ليستقل الصاله لسكنه الخاص
هذا ما يحدث في مدارس الجريف وما يحدث علي مستوي السودان
ولينا عوده
معز السماني

عضو نشط عدد الرسائل : 49 تاريخ التسجيل : 27/08/2008

سلامات أخونا (معزالسماني)

الموضوع (موضوعي) جداً
من خلال طرح الموضوع انا جاني كم سؤال كدة...!!!!؟

هل عمرنا بتعادل مع نضوجنا (فكرياً وعاطفياً) ؟
هل ازددنا حكمة ولو شيئاً يسيرا مع تقدمنا في العمر؟
شكلو كتيير من الناس بنمو جسدياً وزمنياً... دون(فكرياً وعاطفياً) وأنا هنا بقصد بالعاطفي انو هل الشخص بقدر يضبط عواطفه حسب المكان والزمان.
والله يا(معز) موضوع الجامعات دا بقي محير شدييد..طلبة الجامعات محتاجين ل(تنمية) المهارات الاجتماعية .اكتر من تلقي التعليم الأكاديمي .وزي ماقلتة انت انو في عدم جدية ...! وانا شايف دا ناتج من عدم ترتيب الرغبات الحالية للحصول على مكافئات مستقبلية(القراية والوظيفة)، فهم دايرين (يعيشوا اللحظة) الفورية في الإشباع (ودا السواد الأعظم) فالجنسين بيهتمو كتيير لمظهرهم واكسسواراتهم ومتعتهم الشخصية،حتي بعد داك تجي (القراية).. وهم في نفس الوقت لا يحملون إلا قدراً يسيراً من التقدير لأنفسهم، وتكون لهم مطالب غير مقنعة أو مبررة.
رحم الله الجامعة..فهي الآن عبارة عن (حياة كاملة)(سوق وبيت وووو ..)..... في حين إنها مصدر التوجيه والتغيير في المجتمع المتقدم.. وفي الحقيقة الحكومة لها الدور الأكبر في أوضاع الجامعات لأنها هي البتراس وهي البتمول وبالتالي هي البتحاسب وتشوف النتائج..وانا ممكن اقول ليك ي (معز) بضمير مرتاح انو رداءة التعليم الجامعي هي سر التخلف التنموي..يعني التقدم والتخلف يمكن التعرف عليهم من الجامعة بفليق ) بعضهم بالطورته والكريمه)والمشكلة الاكبر انو الطلبة الحاليين ناقلين عدوة الشي البمارسوهو لأجيال المستقبل. فالحلول اظنها بتبدا من استقدام خبرات أجنبية تشرف علي مشاريع التعليم وتطويرها وتنميتها..ودا بكلف اكتر بكتييرمن بلع الحكومة للمال العام.. وللأسف لذلك لن تجد رسالتنا هذه ولو حتي صدي لصوتها.
.........................................................................................................................

إنّما أيّامُكمْ مُحدَثَةٌ

تَمشي على عَكْسِ خُطى آبائِها .

هِيَ في التّجديدِ لابُدّ لَها

أن تَفصِلَ الأشياءَ عن أسمائِها !

وَهْيَ في السُّرعةِ لابُدَّ لَها

أن تُسقِطَ الزّائِِدَ مِن أعبائِها :

واجعَلوا أصواتَكُمْ

بعضَ صَدى أصدائِها :

بِنَعيقٍ طَعِّموا لَحْنَ أغانيكُمْ

إلى أن تُفلحوا، يَوماً، بإتقانِ النَّهيقْ .

لن تَفوزوا بِرضا الأيّامِ

حتّى تخسروا الصِّحّة كُرمى دائِها

وَتُريقوا دَمَكْمْ حُبّاً لَدَى بَغْضائِها !

فاحْرُسُوا يَقْظَتكُمْ

خَشيةَ أن ترتَدَّ عن إغفائِها .

واطرحوا آلامَكُمْ

كي تَجمعَ المطروحَ من أبنائِها .

وامنحوا أقلامَكُمْ

حُريَّةَ التعبيرِ عن أخطائِها .

وانزعوا أحلامَكُمْ

ثُمَّ اغسِلوها

واعصروها

واشرَبوا مِن مائِها !

الاخ العزيز معز
موجعين والمراره اتفقعت
نسوى شنو فتحت لينا الجرح
الملوث
لك مليون تحيه
كانيجا
كانيجا
كانيجا
تجبرنى على رفع حواجبى
اندهاشا
اعجابا
وزهول

الرايعون ايمن السر وكانيجيا
اشكركم علي المرور والاضافه
وبجيكم صادي انشاء الله للاضافه
والتعليق
ولينا عوده
معز السماني

الاخ معز موضوعك كبير وحيوي وحساس

تدهور التعلم الجامعي والسلوك الجامعي بالاضافه للتعليم في الجريف

بقولو تقاس الامم بالمسرح والفنون لكن في زمننا هذا يقاس تقدم الامم بالتعليم والبحوث ومستوى الطبقه المتعلمه لكن ماحدث في التعليم بعد ثورة الانقاذ والسلم التعليمي الجديد وتعريب الجامعات ادا لدمار التعليم وما لحظته في الجامعه هذا ثمرة السلم التعليمي الجديد وماخفيى اعظم ..
ممكن نشمل ثمرة ثورة التعليم في الاتي:
التعليم في كل المراحل بالماده والمتفوقون من مدارس خاصه ونموزجيه اكثر من 26 جامعه وقابله الى الزياده كل يوم جامعه جديده اهليه او جامعه في احدى الولايات كترضيه لها
تغير المناهج المستمر تم تغير المنهج الدراسي اكثر من مره
الجامعات المتفوقه مثل الخرطوم والجزيره والاسلاميه نسبة القبول الخاص اعلى من المقبولين حكوميا
المعلم ونظرته الماديه قبل التعليميه والتربويه
غلاء المعيشه وهروب المعلمين الى مهن اخرى نسبة لدتني رواتب الحكومه او الهروب للمدارس الخاصه
نسبة المعلمات في المدراس اكثر من نسبة المعلمين (مدارس البنين)
والكثير نترك البقيه لباقي الاعضاء وعلى راسهم استاذ الخضر حسن الفضل
تحياتي

اخى منير السماني

تحياتى لك
موضوعك يعتبر عدة مواضيع وليس موضوع واحد
الجزء الاول مس مستوي التعليم بصورة عامة فى السودان
الجزء الثاني ومستوي الجامعات فى السودان
الجزء الثالث مستوي التعليم فى الجريف شرق

وسوف اعلق حاليا على موضوع التعليم فى الجريف ونرجع للبقية لاحقا

فعلا مستوي التعليم فى الجريف وصل لدرجة مخيفة
فهل نتيجة ال 10% نتيجة تمر مرور الكرام على اهلنا فى الجريف
بدون وقفة وبدون اهتمام فهذا شى خطير
بتزكر ( بالزال يا عبد الله نابري ولا بالذال ) بتزكر فى احدى السنوات طلعت نتيجة
المرحلة الابتدائية وكان كل الطلاب فى كركوج ناجحين ماعدا طالبين واحد
بمدرسة ابراهيم صباحى واخر بالمدرسة القديمة وكانت نتيجة طبيعية جدا
لانو هذا كان مستوي التعليم وكان يتم الاحتفال بالناجحين والمتميزين وتقديم الهدايا لهم
اما الان فحدث ولا حرج

واعتقد اخى معز السمانى انو الحكومة ليس هى المشكلة لكنها جزء من المشكلة
والمشكلة الاساسية فينا نحن ناس الجريف لم يتحرك احد ولم يناقش مشكلة
تدني مستوي التعليم فى الجريف وخاصة مجالس الاباء فلابد من المتابعة
متابعة البنية التحتية للمدارس
متابعة تعين المدرسين ومستوياتهم
متابعة نتائج الطلاب
اما بالنسبة للجزء الخاص بقيام المدير بتحويل معمل الكمبيوتر
الى سكن خاص له فهذه مشكلة كبيرة جدا
وللعلم ان اى اجهزة كمبويتر يتم تخزينها لا ستفيد منها احد لانها بعد 3 سنوات
لابد ان يتم رميها مع النفايات حتى وان لم تستخدم
( يعنى ليس مثل الثلاجات والتلفزيونات ولاجهزة الكهربائية الاخرى )
فكان لابد من تشغيل هذه الاجهزة لمدة ستة عشر ساعة ساعة على الاقل
اما بالنسبة لسكن المدير فلا نعرف ظروفه ربما يكون مضطر فكان يجب
على مجلس الاباء الاصرار على ستخدام المعمل للطلاب وحل مشكلة سكنه
(اخي معز السماني مجلس الاباء له دور كبير جدا فى مستوي المدرسة طبعا بعد الاسرة )
وبنجيك راجعين مرة ثانية
معز عبد المنعم

موضوعك حيوى يا ود السمانى

سوق اتاقش مشكلة مدرسة زروق فقط لاننى وعدت العم النعمة بذلك

تم دعوتنا فى منزل عمنا الزعيم النعمة حاج الطيب من قبل ابنة صديق

احب ان ادعوه بلقب الزعيم لانة حرر المراه من التخلف

خاصة نساء المنطقة وساهم بصورة كبيره فى تعليمها وتطويرها

هذا النعمة الذى انعم الله لنا به انا شخصيا اعتبره فاق (بابكر البدرى)

قى مسالة الاهتمام بتعليم المرأه

يعنى رائد تعليم المراة بالجريفات

انشأ عدة مدارس ومعاهد يالجريف(معهد سلمى الحرقى ومعهد سلوى للكمبيوتر)

لكى تستفيد منه كل من لم يحالفها الحظ فى الاستمرار قى دراستها الاكاديمية

وايضا ساهم هذا النعمة قى بناء كلية الجريق شرق التقنية

ارجع للموضوع.. اثناء جلوستا مع العم النعمة سرد لنا باسى وحسره تحسها فى حديثة الصادق

ما آلت اليه اوضاع مدارس الجريف من تدنى اكاديمى ظاهر وذلك يعزى الى الادارة المدرسية السيئه

قهذا النعمة وعدة رجال من ابناء المنطقة الخيرين شمروا سواعدهم

وقاموا ببناء معمل للكمبيوتر فى مدرسة مبارك زروق

نسبتا لاهمية الكمبيوتر وما يلعبة قى عملية التطوير (فى الزمن الاغبر العلينا ده)

وفعلا ساهم المعمل بصوره كبيره وملفته فى توسيع مدارك وآفاق الطلاب وتم ادارة هدا المعمل بكفاءه عاليه

بجهد مقدر من المدير ونخبة من الاساتذة المختصين فى هذا المجال

فحصدت المدرسة ثمار جهدها متمثلا فى مديرها وواساتذتها ورجالها الخيريين

وحرزت نسبة نجاح عالية75%

ولكن تاتى الرياح بما لا تشتهى السفن

تم نقل مدير المدرسة الى مدرسة عوض الحسن بامدوم كانما الوزارة تريد ان تعاقب ادارة المدرسة

ورجال المنطقة الخبرين

و لا تريد النجاح والتقدم للمنطقة

وعين مدير جديد(زاد الطين بلة)

اول ما بدا بة مديرنا الموقر تدمير واغلاق المعمل

الذى تعب فبه رجال المنطقة الخيرين( آه من حظك يا الجريف)

واستخدم المدير المبنى كسكن للاساتذه (ده مدير مدرسة ولا وزير اسكان)

مع العلم المعمل عباره عن غرفة مساحتها 3متر لاتصلح كسكن نسبتا لضيقها.

اعتقد مدير بهذه العقلية لايصلح لاادارة روضة ناهيك عن مدرسة وكمان ثانويه!!!!!!!

مع انو معلوم لدى الكل مسألة استقرار وسكن المعلم من اختصاص الوزارة

لان عندما تم توزيع ذلك المعلم كان من المفترض يوزع توزيع جغرافى

اى بمعنى يوزع الى اقرب مدرسة من منطقة سكته (ودى ما دايره اى حرفنة او ذكاء لكن نقول شنو؟؟؟

واذا فرضت ظروف معينه توزيعه بعيدا عن منطقته حسب حوجة المدارس

من المفترض طواااااااااالى وزارة التلتلة والتأليم (تدق صدرها )وتتكفل بسكنه لان هذا من واجباتها

مش طوالى مدير المدرسه (يدق صدره )ويصادر المعمل ..لا مواخذه يامديرنا ده ما اختصاصك

ده اختصاص الوزارة التى ابتلانا الله بها تقف دائما مكتوفة الايادى (كخيال المأته )

لا بتحل لا بتربط .. انتهى

مخرج:

دايرين بوسطى ومدرسة وسطى وسوق منضبطه

ودايرين هسه زيادة الحصة

ولينا الله يا النعمة...

كتب معز

واعتقد اخى معز السمانى انو الحكومة ليس هى المشكلة لكنها

جزء من المشكلة

والمشكلة الاساسية فينا نحن ناس الجريف لم يتحرك احد ولم يناقش مشكلة
تدني مستوي التعليم فى الجريف وخاصة مجالس الاباء فلابد من المتابعة
متابعة البنية التحتية للمدارس
متابعة تعين المدرسين ومستوياتهم

الاخ معز التحيه لك اولا واشكرك علي المرور والاضافه

اخي معز اختلف معك تماما في هذا الكلام
هناك الكثير من اهالي الجريف حاولوا تعديل
ما يحدث وزكرت لك عمنا النعمه حاج الطيب
ومن معهوا والجهد الذي بزل في مدرسة مبارك زروق
وياتي مدير التعليم ويقوم بنقل المدير وياتي بمدير همه الاول
راحته وتقول لي الحكومه ما ليها دور
سوف اقول شيين قامت الحكومه بفعلهم
1/ تغير المنهج
2/ دمج المتوسط والاساس
وبجيك لتوضيح اكتر
وليك كوم من الود
ولينا عوده
معز السماني

الرايع حسن اشكرك علي المرور
والاضافه الرايعه

الرايع تساليه مرورك اسعدني
وسردك التفصيلي للقصه المني
وليك كوم من الود
ولينا عوده
معز السماني

حقيقى موضوع فى غايه الاهميه

بالنسبه للتعليم فى المنطقه فعلا فى تدنى ملحوظ والمشكله تقع فى عاتق الاهالى اى اهالى منطقه الجريف معظم الابناء وانا اخص الشباب تحديدا بيقلدو بعض واحد من الابناء طلع من المدرسه مشى الكمائن او اشتغل طلبه وا حتى قعد عاطل جنب عتبه بابهم تلقى كتار قلدوه واهاليهم يغلبو معاهم . دى غير عدم احترام المعلم نفسه ذمان الوحده لو لغت معلمه فى الشارع مابتقدر تعاين ليها احتراما ليها . حاليا اى زره احترام مافى طالب الثانوى شايل موبايل وبرن فى الحصه والبنات شايلات عبايات ومكياج كامل فى الشنط . ودى حادثه حقيقيه فى مدرسه الخليفه عثمان حله كوكو معظم طالباتها من الجريف .كل يوم نسمع حادثه شكل انو طالبه ضربت معلمه يطلبو ولى امرها المفروض انو فاهم يشتم ويضرب المعلمات هو كمان يطور التعليم كيف اذا كان لسه فى ناس بتفكر بالمفهوم دا . واذا تحدثنا عن الجامعات وكميه الاطفال الفيها . وانا لا اقصد العمر وانما كميه الولدنه والطفوله الجوه عقولهم . غير التدنى الاكاديمى الانو الجامعات الخاصه بس الحمد ( القادى دين ) دخل الجامعه حتى جامعه الخرطوم الكانت ذمان (جامعه جامعه) هسى الجايب نسبه 50% بيدخل خاص الحاجه البعرفه انو القروش دى ممكن تعمر جيوب بس استحاله تعمر عقول .

[size=29]السلام عليك اخي المعز
الحقيقة الموضوع مهم للغايية وداير الناس تقعد وتتناقش فيهو بالجد مدارسنا مدارس الجريف في خطر كل سنة والتانية المستوي ماشي متدني هل هذا من اولادنا ام من الاساتذة ,
اما بخصوص الجامات فانا اري انها اصبحت مرتعا للاطفال اعمارهم تتراوح بين 15و16 والشي البزعل بالجد
عاملين فيها متاثرين بالحضارة الغربية الواحد تلقاهو لابس البنطلون ناصل منو وماشي مبسوط والفنيلة كت وهو هنا ثقافتو ما جايب ليها خبر
علي العموم انا ما داير اطيل ولنا لقا لو بقي العمر امد ا]

الااخت سيده صاحي
التحيه لكي واشكرك علي المرور
اولا :
انا لا اتفق معكي في مسالة التقليد يعني ود جبرانا يطلع
من المدرسه ويشتغل في الكماين اقوم انا اعمل ذيو
الكلام ده ما حاصل الحاصل كالاتي :
التعليم في الجريف اصبح عباره عن مساله استثماريه يعني
المدرسه لازم تطلع قروش من الطلبه والطالب ماعندو يقوم يطره
يسيب المدرسه يقبل وين غير الكماين مافي حل (وهسي الكماين ذاته مافي )
ماداير اقلب الموضوع سياسي لكن الحكومه له الدور الاكبر في تدهور التعليم في السودان

في وكت من الاوكات كانت جامعة الخرطوم من الجامعا ت الاولي علي مستوي العالم

هسي شوفيها الان الحاصل شنو وده نتاج شنو
مسالة العقول الصغيره الفي الجامعه والتصرفات الطفوليه التي يقوم بها طلاب الجامعه
ده كلو ما ناتج من سياسة التعليم
كل المتداخلين قولوا لي سب واحد يجعل وزارة التربيه تغير المنهج او تنظر في دمج
المتوسطه والابتدائي السبب انهاء التعليم لانو هو السب الرئيسي في قيام الانتفاضات

الاخ الامبراطور اشكرك علي المرور والاضاف
ولينا عوده

معز السماني

الاخ معز ليك كل الاحترام والتقدير

والله العظيم يا اخ معز انا بعرف اولاد ماعندهم اى مشاكل ماديه وطلعو من المدرسه عدم وعى منهم واحد مستواه التعليمى تعبان طلبو منو يرجع يعيد السنه رفض عشان مايدرس مع اولاد اصغر منو واصحابو قدامو خلا المدرسه والثانى مستواه كويس خلى المدرسه عشان صاحبو نزل شغل وبقى عندو قروش ودى حالات فى جريفنا الحبيب ولو حابى تتاكد ممكن اقول ليك الاسماء . انا متفقه معاك اخ معز انو التعليم بقى متدنى فى السودان والنظره ليه بقت تجاريه بحته . بس دى مابيعفى الناس انو تكون مصممه على التعليم والنجاح رغم كل الصعوبات ماندارى عجزنا فى الحكومه ونبقى شعب اتكالى اكثر من الازم . لانو انا متاكده لو الحكومه وفرت كل وسائل التليم حيقولو عايزين زول يزاكر ليهم ويمتحن ليهم الننا اكسل شعب خلقو ربنا عايذين الجاهز اى جهد او مشقه مافى . ودى استحاله يتحقق

الاخت سيده صباحي التحيه لكي واشكرك علي المرور
النقطه الاولي
متاكد تماما من وجود هذه الحالات في الجريف
ولكنها لا تمثل الغالبيه
النقطه الثانيه
مسالة اننا شعب كسلان انا اتفق معكي ان
الشعب السوداني كسلان لكن السبب شنو
انا ماداير اقلب ا لبموضوع سياسي لكن
متاكد تماما من سياسة الحكومه تجاه التعليم
وبالفعل وصلت للشي الذي تريده والسبب سكوت
الشعب
النقطه الرابعه
زكرتي لو الحكومه وفرت كل وسايل التعليم
حيقولوا دايرين زول يزاكر لينا
اخت سيده قبل الانقاذ كان التعليم بمثابة الركيزه التي تعتميد عليها
الاسره في المستقل الان لو سالتي اي طالب جامعي بقول ليك
انو داير شهاده وبس عشان يقولوا خريج
وبدلا من ان تكون الشهاده الجامعيه بمثابة المعين اصبحت عباره عن وجاهه
بعدين سابقا الطالب الجامعي كان بمر بمراحل تعليميه تساعده علي تكوين شخصيه
تساعد المجتمع في التنميه
سوف ازكر لكي قصه غريبه لتاكيد تدهور التعليم
في واحده من مدارس الجريف وفي الصف السابع بالتحديد
دخل استاذ الرياضيات الحصه ومعهو واحد من مجلس الاباء
لمعرفة مايدور وطلبت من احد الطلاب ان يكتب الرقم 124
وقام الطالب بكتابة الرقم هكذا (10024) ولكي الحكم

ولينا عوده

معز السماني