العــــــــــــــــراب

الحبيب ولد عمي ... أريتك تبقى طيب .. طالما مررت من هنـا وقرأت كثراً
فخامة الفكرة والابداع في الطرح الموفق للموضوع الذ يحكي لنا عن ذكريات
جمـــيلة تعكــس لنا مدى ارتباطنا بهذا المكان وإلتفافنا حوله منذ زمن بعيد ..
العراب موضوع جميل وموفق جدا ..
وعن قصتي أنا فكــان عرابـــي الأستـاذ بدر عبدا لماجد أبو محمد
حيث كنت في زيارة له في المنزل وكان معاي عبدالله نابري ..
وقال لي هناك منتدى على النت وقلت ليهو مستحيل نحن بصدد التجهيز له
ومعي فريق يعمل بهذا لشأن وقال لي بل هو حقيقة و هاك الرابط وفعلا وفي أقصى سرعة
شديت رحالي ومشيت وحطيت الرحــال حوله ولقيت الأحباب رحال وأحمد وسودانية والجب رونالدو
وبدر عبدالماجد وثم تسالية والاخناتون وجرينا الطيب بخيت
ثم الزينكوف وكثير من المبدعين وهنـا بدأت رحـلة الإعلان للمنتدى . . ومواضيع كثيرة
وجلسات وجلسات وأحاديث وود العبيد الحاضر الغائب عريس الموسم الفات وود ريا الاسعدنا وجوده
ورحــلة منتدى وملتقى طويــلة

شكرا محمد زين على الوقفة الجميلة على الأطــلال والتي أتت عفواً عبر موضوعك الجمــيل

الطيب الغالي إبن الطيبين أخونا محمد زين
أريتك تبقى طيب على قول أخونا الهندي .. ونبصم بالعشرة على جمال الفكرة .. والعنوان يحكي عن المضمون .. ومن خلال مداخلات الإخوان تجد الحميمية والأخوة الصادقة والصدق في القول ... وهنا تأتي عظمة الفكرة.. لك التحية وإلى مزيد من الأفكار التي يتفاعل معها الجميع.
وبالنسبة للعراب الذي رمى بشباكه نحوي هم الأبناء أحمد والطيب رونالدو والإبنة سودانية حيث أنهم زودوني بالرابط للدخول للموقع ... وعند دخولى وجدت الجميع جالس ومتحكر في راكوبة الجريف .. وإن كان واجهتني صعوبة في الدخول والتسجيل .. لأنني في تلك الفترة كنت صغير وجاهل.. ولكن بحمدالله ساعدوني وكتفوني وربطوني داخل الموقع ومن يومها وأنا متحكر .
لكم جميعاً التحية

الزعيم ود بشير عمي

اريتك تبقي طيب وربنا يتمم ليك الشفاء العاجل وشكرا لعرابك الاخ بدر عبدالماجد وان شاء الله تلتقي بكل اهل الجريف في المنتدي عشان تتونس معاهم براحتك ودعمي خليك قريب

اخوي الكبير عصام

اسعدني جدا مرورك الراقي في البوست وكنت متوقع انو يكون عرابك هم الاخوة أحمد والطيب رونالدو والإبنة سودانية فشكرا جزيلا لهم ومرة تانية مرورك زاد البوست اشراق وبهاء فكن قريبا دوما

أخى صحاب الفكرة الجميلة ( محمد زين نابرى )

فأنا عرابى هو google يعنى جبتها بإيدى براااااااااى ويكفينى شرفاً بأن أكون عرابا للمهندس الهندى ود البشير وهناك من إستنكر بأن أكون عراباً له !!!

وراجعين

الغالي الرائع بدر

سلمت يداك الجابتك وشكرا كثيرا لعرابك محرك البحث Google وقصة انك عراب الهندي دي في حد ذاتها اضافة كبيرة للمنتدي وفي انتظار المزيد من الاضافات خليك قريب

السلام عليكم

زين كوف الغالي بحق وحقيقة
والله فكرة البوست جميلة وحلوة واحيك عليها
حقيقة انا عرابي كان في دخولي الي قوقل وكنت ابحث علي اي شي اشوف بيهو الجريف شرق والي ماوصلت الي المنتدي
واول اسم قريتو في المنتدي (نسالية) وعرفت اني وصلة خلاص
يعني ممكن تقول (نسالية )بعد قوقل

الرائع بلبل

استمر في البحث دائما من اجل الجريف المنطقة وشكرا لعرابك محرك البحث Google وتسالية ايضا وفي انتظار مزيد من روائعك نبيل خليك قريب

حتي الان محرك البحث قوقل عراب كثير من اعضاء المنتدي وهنالك جنود مجهولون روجو لهذا المنتدي ولابد من التعريف بهم, والشكر لكل من ساهم في نجاح المنتدي

شباب السلام عليكم ورحمة الله

في ناس كده انا داير اعرف عرابهم منو وما داير اذكر اسماء بس يا ريت يخشو براهم ويذكرو عرابهم منو والشكر لكل المشاركين في البوست واقول ليهم كل واحد منكم لابد ان يكون عراب لكثيرين قادمين حتي ينتشر هذا المنتدي في كل بيت من بيوت الجريف الحبيبة ودمتم لنا وللمنتدي

الاخ محمد زين فكرة رائعة والعرابى الذى اتى بى الى منتدى الجريف امكن تقول شوقنا الشديد اليها ونحن ندور فى النت عن اشياء تخص جريفنا الحبيب وبتصفح ذات يوم فى منتدى يخص الجعلين جانى زيارة الحاج ودالرشيد وزكر لى موضوع حصل له فى منتدى يخص الجريف وساقنى الشوق بمجرد زكر المنتدى ودخلت توش ومن ديك ليوم الليله مانى قادر اطلع وجد فكرة المنتدى فكرة عظيمة لابد ان يحافظ الجميع عليها وجد المنتدى افادنا كتير وخصوصا نحن بعيدين عن جريفنا وبقى حلقة وصل بينا وانا شخصيا استفدت الكتير من هذا المنتدى ويكفى انه عرفنا بكوكبة ممتازة من شباب جريفنا

محمد زين صديقي العزيز شاءت الصدف أن القاك على الانترنت وفرحان ليك شديد صدبقك كوبي انت بتعرفني كويس جدا لكن ماحوريك انا منو حسع لغايت ما امعطك شوبا ماشاء الله الموقع ملان مواضيع تابع مداخلاتي الفترة الجاية يمكن تعرف انا منو

الاخ النشيط جدا ودالامام التحية ليك والتحية موصولة لعرابك الرائع الذي نفتقده جدا الاخ الحاج ودالرشيد ونتمني ان نراه قريبا بيننا في اقسام المنتدي المختلفة يصول ويجول ونتمني ليك يا ودالامام كل السمح واصل في طرحك المميز

kobe كتب:: محمد زين صديقي العزيز شاءت الصدف أن القاك على الانترنت وفرحان ليك شديد صدبقك كوبي انت بتعرفني كويس جدا لكن ماحوريك انا منو حسع لغايت ما امعطك شوبا ماشاء الله الموقع ملان مواضيع تابع مداخلاتي الفترة الجاية يمكن تعرف انا منو

مرحبا صديقي كوبي ونتمني ان نتعرف علي شخصيتك قريبا ونعرف من هو عرابك للمنتدي ونتمني ان يطيب بك المقام في المنتدي

محمد زين .... انشاء الله دايما زين..

انا عرابى ( ودريـــــــــــــا ) ...
له التحيه والله مشتاقين ليه ولى قلمو ..
وكلمنى يوم جمعه فى بيت الخبر ... والغريبه فى الامر انو تاريخ التحاقى فى المنتدى هو تاريخ ميلادى
و الله مامقصوده ... وانتبهت ليها بعد فتره .

صاحب الجديد دوما احمد عوض

لك التحية وحقا انت اضافة رائعة للمنتدي ونشكرعرابك الحاضر الغائب حبيبي عبدالرحيم حطي ودريا ونتمني لك اقامة طيبة في المنتدي وفي انتظار جديد مساهماتك

[size=24]شكرا للاخ محمد زين .فكره رائعه حقا . انا عرابى اليه الفضل

الكبير فى انو ادخل البيت الجميل دا واتعرف بالاخوه الكرام وهم نعمه الاخوه لى . هو الانسان

الفاضل الاخ الغالى جدا عبد الرحمن ابراهيم( عبد الرحمن خوله) هو الادانى الموقع وانا كملت

الباقى وفى الحقيقه اتردت قبل الدخول وكنت اراقب مواضيعكم من ثلاثه اشهر قبل التسجيل

وكنت فخوره بيكم جدا الا ان شجعنى الاخ العزيز عبد الله نابرى وكملت بعد كدا [/size]

saida sopahi كتب:: [size=24]شكرا للاخ محمد زين .فكره رائعه حقا . انا عرابى اليه الفضل

الكبير فى انو ادخل البيت الجميل دا واتعرف بالاخوه الكرام وهم نعمه الاخوه لى . هو الانسان

الفاضل الاخ الغالى جدا عبد الرحمن ابراهيم( عبد الرحمن خوله) هو الادانى الموقع وانا كملت

الباقى وفى الحقيقه اتردت قبل الدخول وكنت اراقب مواضيعكم من ثلاثه اشهر قبل التسجيل

وكنت فخوره بيكم جدا الا ان شجعنى الاخ العزيز عبد الله نابرى وكملت بعد كدا [/size]

لك التحية أختى سيدا ونحن نفختر بك كثيراً ويشرفنا وجودك دائماً معنا وذلك نعمل
سوياً لرفعة هذه المنطقة الجريف شرق إيد مع إيد بترمى بعيد فدعى إيديك الطاهرتين معنا ..

إنما خلق الانسان ليعمل كما خلق العصفور ليطير

وراجعين

شكرا جزيلا اختي سيدة وجزيل الشكر لعرابينك الاخوة الكرام عبدالرحمن خولة وعبد الله نابري ونتمني ان يكون المنتدي ساحة لحوار هادف ومثمر وندعو كل اخواتنا في الجريف العزيزة للاشتراك في المنتدي وفي انتظار جديد مساهماتك

والله موعك يازينكوف ثمح شديد ......
وأبو محمد يطول عمره ويلقى العافية يمين اكان ختيناهو ليوم الليله كنا
نكون لافين حايمين في الصقيعة ...... انا داير اعرف صديق النعمة وايمن السر عرابهم منو
يلقى العافية العجب أ يحيى كمان .... ياسلام عليك يابلد .... عمنا الخدر خصمتك بالنبي تجي
ناطي ... عمنا عصــام عارفين الوضع السياسي الجديد ليك حياخدك مننا شوية لكن يمين بالله ما
تظهر نقلب عليك الحكومه .... وياود ريا تلحقنا ......

محمد زين نابري، جينا متأخرين، معليش عارف براك المظاهرات الفي الشوارع و الزحمة و الطرق مقفلة،

لك التحية يا الهندي على هذه الدعوة الكريمة،

بخصوص العراب،

انا ما شاركت لأني افتكرت عراب دي مقصود بيها واحد بعرب الجمل، فاعل و مفعول و مؤخر، عشان كده شردت من البوست، لأني بصراحة مشكلتي في الدنيا الإعراب، و عامل لي عقده، غايتو الواحد بكتب بس علي ايقاع و مسيقي الكلمات، بالله دي مش زلة لينا منو فينا بحاول يدرس لغه عربية بعد الثانوي، في الوقت الفيهو كلنا و في أي عمر ممكن ندخل كورسات لغة انجليزية و عادي بل الناس تقول و الله ما شا الله مجتهد، و ياااا حليلك يا اللغة العربية،،

أنا ما عندي أي عراب .. بس صدفة سمعت أن هناك منتدى لأبناء الجريف، و عن طريق قوقل لميت فيكم، و من ديك و عيك،

ربما يكون عرابي هو ذلك الانتماء لهذه البقعة المباركة الجريف و هذا الجذب القسري الذي تنتفي معه أي مقاومة، فقط تجد نفسك منساقاً بقوى داخلية تتجاوز أي تفكير عقلاني، ربما يكون هو الحنين للذات التي تكونت منها ذواتنا لنستمد منها معاني الوجود و أصالة الوجود، ربي اجعل هذا البلد آمناً مطمئناً سخاءً رخاءً و ارزق أهله من الثمرات،،،

الرايع محمد زين والر ايعون فى منتدانا الفاتن لكم التقدير على افكاركم الثرة ??اما عرابى الذى دلنى عليكم فهو موقع الغالية(الجريف شرق)وبالمناسبة دى وين اختفا موقع( الجريف شرق)وياريت تورنا الحاصل فيه شنو

الهندي بشير نابري كتب:: والله موعك يازينكوف ثمح شديد ......
وأبو محمد يطول عمره ويلقى العافية يمين اكان ختيناهو ليوم الليله كنا
نكون لافين حايمين في الصقيعة ...... انا داير اعرف صديق النعمة وايمن السر عرابهم منو
يلقى العافية العجب أ يحيى كمان .... ياسلام عليك يابلد .... عمنا الخدر خصمتك بالنبي تجي
ناطي ... عمنا عصــام عارفين الوضع السياسي الجديد ليك حياخدك مننا شوية لكن يمين بالله ما
تظهر نقلب عليك الحكومه .... وياود ريا تلحقنا ......

الهندي اخوي شكرا لمرورك وهاهو صديق النعمة يشاركنا وفي انتظار البقية لنعرف من هو عرابهم شكرا كثيرا وجزيلا

المتفرد صديق النعمة شكرا كثيرا للمشاركة ونتمني ان يتواصل جهدك المقدر واسهاماتك الرائعة في المنتدي