الكرسى...الساخن2

والله ياعصام انا ماعايز اسأل اى سؤال ... لأنو حقيقه زى ما قال عبدالله اجاباتك كانت كافيه وشافيه

[quote="احمد عوض الحاج النميرى"]

والله ياعصام انا ماعايز اسأل اى سؤال ... لأنو حقيقه زى ما قال عبدالله اجاباتك كانت كافيه وشافيه وبعد الحلاقة دى كلها عبده خليلينا حاجة جد ابدعتونا

أخى عصام الدين عبد الصادق لك التحية يا صاحب الردود الزكية، وسؤالى ياود خالى

ماذا تعنى لك هذه الكلمات وما هى علاقتها المباشرة بالقضية :

ليه بنهرب من مصيرنا ونقضى أيامنا فى عذاب ( الفنان الراحل إبراهيم عوض)

القلم عاودنى تانى ارجع للكتابة ( الفنان الراحل محمد احمد عوض )

حيران أسأل نفسى ايه كان السبب واصل الخصام ( الفنان الراحل عثمان حسين )

وبس مجبور عشان أهلك بخليك ( الفنان الراحل هاشم ميرغنى )

معز عبدالمنعم كتب:
اسئلة فى العالم الحقيقى
اخونا عصام بيقولو الغربة احيانا تظهر معادن الرجال اعطينا امثلة حقيقية
تعلمت في الغربة ان ارى الناس بعينين بدلا من عين واحدة وبعدة الوان ... وأن لا أعتمد على اللونين الأبيض والأسود فقط .... تعلمت ان الانطباع الاول غالبا هو انطباعي الاخير وعلي ان لا اكذب احساسي المتوجس والمرتاب من بعض الاشخاص .... تعلمت ان البشر هم نفسهم في بلدي وفي اي بلد آخر وان اختلفت الجنسيات واللغات .. فهناك الكاذب والمنافق والمرائي وايضا هناك الكريم والطيب واللطيف !
أما الأمثلة لذلك ... عندك مثلاً .. أقوم أتصل بك يا معز وأقول لك عليك الله حول لي 3000 ريال ضروري .. وثاني يوم أعمل مراجعة لحسابي أجدك أدخلت لي 3500 ريال .. والله دي قمة الرجالة في الغربة.. عشان كدة يا معز عاوزك ضروري ترسل لي 560 ريال ... ONLY TEST
برايك ما هو الافضل ان تربي ابنائك معك بالغربة ولايكون هناك توفير......
ام تتركهم بالسودان وتكون بعيد عنهم وتختصر الغربة
شوف والله إذا كانوا معك في الغربة ما حتوفر .... وإذا إستقريت معهم في السودان برضو ما حتوفر
وأحسن حاجة تنكوي بنار الغربة هنا وتجيب الأم زيارة 41 يوم وثلاثة ساعات ... وبذلك تكون ضحيت بالأم والجنين عشان تنقذ الأب.
اسئلة فى العالم الافتراضى
هل توافق بعزل ابو تراجي من قنصلية الجريف الافتراضية مع ابقاء داره الحقيقية قنص ليه للجريف
دي عاوزة تصريح من وزارة الداخلية ...
هل تقبل بعمل استفتاء داخل المنتدي بينك وبين ابو تراجي حول موضوع الطاقية والمشاركون اعضاء المنتدي علي ان يتولي عبد الله نابري لجنة الاستفتاء.
أعتقد أي تصريح من جانبي في هذه النقطة سوف يؤثر في سير القضية وينسف جميع مداولاتها ... ولكن بعد مثول أخونا عبدالله أمام هيئة المحكمة وآخرين .. سوف يكون لكل حدث حديث.
وراجعين ليك يا عصام
وكلمة راجعين ليك دي يا معز والله بتخلي كرعي يطاغشن.

أحمد عوض حاج النميري
والله ياعصام انا ماعايز اسأل اى سؤال ... لأنو حقيقه زى ما قال عبدالله اجاباتك كانت كافيه وشافيه
عليك الله يا أحمد أسعدي أقوليهم أمشو ... والا أقعدو
لك التحية أخي أحمد الفنان ... ودعوة السمك ما بخليها إن بقيت حي ..

الطيب الإمام
والله ياعصام انا ماعايز اسأل اى سؤال ... لأنو حقيقه زى ما قال عبدالله اجاباتك كانت كافيه وشافيه وبعد الحلاقة دى كلها عبده خليلينا حاجة جد ابدعتونا
الطيب أخوي ... وده حالتو عبدو كان مخلوع .. ومن شنو والله ما عارف..
تحياتي ليك أطنان أطنان .. لكنيا خوي قبل ما تمش .. وريني خليلينا دي بت حاجة منو.

بدر عبدالماجد كتب:
أخى عصام الدين عبد الصادق لك التحية يا صاحب الردود الزكية، وسؤالى ياود خالى ماذا تعنى لك هذه الكلمات وما هى علاقتها المباشرة بالقضية :
ليه بنهرب من مصيرنا ونقضى أيامنا فى عذاب ( الفنان الراحل إبراهيم)
وبرضو يا بدر تقول لي إنتهينا ..... ويا خوي ... نحن في عز الشباب ... وبرضو جاي تقولي العلاقة المباشرة بالقضية...
ويا سلام عليك أيها الرائع سيف الدسوقي أحمد خليفة
القلم عاودنى تانى ارجع للكتابة ( الفنان الراحل محمد احمد عوض)
اسألو الخرطوم بتحكى لم غردون احتمابا
هكذا تكون التربية الوطنية والمحافظة على قيمنا السودانية السمحة
حيران أسأل نفسى ايه كان السبب واصل الخصام ( الفنان الراحل عثمان حسين )
ويمكن أكون في حقك إتلومت يا بدر في ساعة ملام ... لكن ما ظنيت وربنا يديم المحبة..
وبس مجبور عشان أهلك بخليك ( الفنان الراحل هاشم ميرغنى )
وزيادة فوق القول ....عشان أهلك بخليك وأشيل في جرحي ماضيك
أحاول وبرضي ما قادر وعشان أنس وأنسيك ..
هل يا ترى يا بدر مثل هذه الدرر النفيسة سيجدها أبناؤنا مستقبلاً؟
لك التحية أخي بدر

اخوي الكبيرمقام المرحوم (عادل)

انت الكلام القلتو لي في اضاني اليوم دااااااااااااااك
كان شنو انا ماسمعتو بس مسافة داير اقول ليك شنو
اتلفت ما لقيتك

وصايا منهجيه للجيل البعدك :
* نهج سياسي
* نهج عاطفي
*نهج عملي

أبو المريوده

عصام كتب
تعلمت في الغربة ان ارى الناس بعينين بدلا من عين واحدة وبعدة الوان ... وأن لا أعتمد على اللونين الأبيض والأسود فقط .... تعلمت ان الانطباع الاول غالبا هو انطباعي الاخير وعلي ان لا اكذب احساسي المتوجس والمرتاب من بعض الاشخاص .... تعلمت ان البشر هم نفسهم في بلدي وفي اي بلد آخر وان اختلفت الجنسيات واللغات .. فهناك الكاذب والمنافق والمرائي وايضا هناك الكريم والطيب واللطيف !
أما الأمثلة لذلك ... عندك مثلاً .. أقوم أتصل بك يا معز وأقول لك عليك الله حول لي 3000 ريال ضروري .. وثاني يوم أعمل مراجعة لحسابي أجدك أدخلت لي 3500 ريال .. والله دي قمة الرجالة في الغربة.. عشان كدة يا معز عاوزك ضروري ترسل لي 560 ريال ... ONLY TEST
********
اخونا عصام تم تحويل 600 تحية وسلام لحسابكم وانشاء الله رسالتين تهنئة عيد الاضحي تصلكم يوم العيد
وقد تم الغاء السؤال
يا عصام يا اخوي وقت تجي تشوف معادننا تقوم تفضحنا قدام الناس يعني
المشكلة انو ال 650 دى سعر الخروف بالضبط فى القصيم
وكل سنة وانت طيب

ملاحظة باقي الاسئلة خليناها خوفا من الفضايح
قلنا نختك في حتة ضيقة ختيتنا نحن فى حتة ضيقة
ود عبد المنعم

ود عبد الصادق

كل عيد وانته سعيد وبخيت

الحاصل شنو الناس دى

لسة معلقة فيك

الروائي الرايع عصام

والله من ما بدا الكرسي
السخن هي(البارد )
بتاع عبدو ده وانا
مستمتع بالاسئله والردود
الرايعه وبالجد تصلح ان تكون روائي
كان عندي اسئله كتيره بس لمن قريت ردودك
لقيت الاجابات كافيه تماما وتصلح لان تكون كتاب
لكن عندي سوال داير اسالوا

ماذا تعني الشعله لعصام عبد الصادق
ولينا عوده
معز السماني

عامر عبدالوهاب كتب:
اخوي الكبيرمقام المرحوم (عادل)
انت الكلام القلتو لي في اضاني اليوم دااااااااااااااك كان شنو انا ماسمعتو بس مسافة داير اقول ليك شنو اتلفت ما لقيتك
عامر أخوي الفاتك ما ترجع ليهو تاني .. وإنت الوداك تتلفت شنو .. لكن بيني وبينك كويس أنك ما سمعتو .. لأنك لو سمعتو .. كان ناس نبيل ومعز وباقي الفاتحين خشومهم سمعوهوا ويشهوك العافية .
عامر كتب :
وصايا منهجيه للجيل البعدك :
* نهج سياسي ...... دي إجابتها مع الدكتور حسن مكي ولو ما حصلتوا عرج على أخونا الشفيع الجزولي
* نهج عاطفي ..... دي أجابتها سوف تجدها مع هناي داك إسمو منو ؟ قول معاي .. ولو ما وجدته عرج على أخونا هناي التاني داك
* نهج عملي ..... دي إجابتها سوف تجدها مع أعضاء المنتدى المتواجدون داخل الجريف ولو ما وجدتهم تعال راجع لي تاني.

عبدو كمبيوتر كتب:
ود عبد الصادق
كعل عيد وانته سعيد وبخيت الحاصل شنو الناس دى لسة معلقة فيك
أخوي عبدو .. يظهر إنو خروف الضحية طار ليك في راسك .. أو ربما حصل تفاعل بين الشربوت ولحم الضحية .. وعشان كدة بدلاً من أن تقول لى كل عيد وأنت سعيد .. طلعت الجملة كما سطرتها (كعل) .. وياربي دي تكون بلهجة الدناقلة؟
وبالنسبة لتعليقك الناس دي لسه معلقة فيك ( الكتله خلية نحل)
معز السماني كتب:
والله من ما بدا الكرسي السخن هي(البارد ) بتاع عبدو ده وانا مستمتع بالاسئله والردود الرايعه وبالجد تصلح ان تكون روائي كان عندي اسئله كتيره بس لمن قريت ردودك لقيت الاجابات كافيه تماما وتصلح لان تكون كتاب لكن عندي سوال داير اسالوا
ماذا تعني الشعله لعصام عبد الصادق
ولينا عوده
معز السماني
أخونا معز .. كلمة روائي دي كبيرة خلاص على .. وبالنسبة لسؤالك فعلاً توقعته من قبل .. وبيني بينك سؤال بسيط جداً في شكله.. ولكنه كبير جداً في معناه... وده فعلاً حا يسخن بي رأسي.
لأن الشعلة إسم محبب وله وقع وتأثير كبير على نفسي .. لأنه مرتبط بأهم مرحلة عمرية بالنسبة لي .. ومن داخل مدرسة الشعلة تعلمنا الكثير والذي أصبح خير معين لنا في حياتنا العامة .. ومن خلالها تعرفنا على شخصيات لها وزنها الإجتماعي والفكري والأدبي... حيث أنهم علمونا أن نقدم العطاء لغيرنا وأن لا ننتظر العطاء من غيرنا .. بل نبادر به نحن ... حتى يقتدي به غيرنا .. وهكذا كان عطاؤنا الممزوج بالإحترام وعليه سارت أجيال الشعلة المتعاقبة.
ومن خلال مدرسة الشعلة تعلمنا كيف تكون الصداقة الأخوية الحقة ... وليلة السمر الأولى ما هي إلا نتاج لهذه البيئة الطيبة في ذلك الزمان... والتي أعقبتها عدة ليلة ثقافية متفردة.
أخي معز حقيقة .. تأكد بان الشعلة تاريخها طويل وستظل نبراس ضارب في السماء للأجيال الحاضرة والقادمة بإذن الله .. وما عليكم إلا المحافظة على هذا الأرث العظيم.

عصام عبد الصادق "المسيخ اللذيذ"
هاااااااااااااااااااااااااااااااااااااااااااااك دي بتاعت كمبيوتر!

ما هو سر الدكاكين الفي الزلط؟!!!!!!!

عبدالله نابري كتب:
عصام عبد الصادق "المسيخ اللذيذ"
هاااااااااااااااااااااااااااااااااااااااااااااك دي بتاعت كمبيوتر!
ما هو سر الدكاكين الفي الزلط؟!!!!!!!
_________________
عبدالله أخوي كل سنة وأنت طيب وعساك من عواده .. والسنة دي أخوك إتبهدل في الضحية وفقدت آثارك طيلة أيام العيد وحار بي الدليل.
بالنسبة للدكاكين الفي الظلط .. والله بي طريقتكم دي حاتجيبوا لينا الجلا .. ياخي ديل كلهم 4 دكاكين بيفتحن على ظلط أم دوم وحايكونوا مستقبلاً الدور الأرضي مركز العصيم مول .... والدور الأول مطعم الجيعان السياحي ... والدور الثاني مجمع الطوب الأحمر (سالم وكسار وفور) وكذلك الرملة السفايا بالصفيحة والجردل .... والدور الثالث حايكون مركز الطاقية الترفيهي.

عضو نشط عدد الرسائل : 53 تاريخ التسجيل : 27/10/2007

الاخ عصام عبد الصادق
تحية ود واحترام
وكل سنة وانت متكئ على قمم السعادة
وبما أنك فى الكرسى الساخن وددت أن أشارك ببعض الاسئلة
أتمنى أن لا تكون ثقيلة عليك

ماذا يقول عصام عبد الصادق لشخص من خارج الجريف عندما يسأله عن الجريف ويريد معرفتها ؟؟؟

ما الأفضل .. الجريف قديماً أم حالياً ؟؟؟ وما هى الأسباب ؟؟؟

ما يسمى عند البعض بالتحضُر فى طريقة التعاملات فى المناسبات وأساليبها الدخيلة واللبس الخليع لكثير من الفئات فى المجتمع السودانى و و و !!! كيف يراها عصام عبد الصادق ؟؟؟ وهل امتد أثرها الى مجتمع الجريف المحافظ من وجهة نظرك والى أى مدى أن كان حدث ذلك ؟؟؟ مع أمنياتنا بأن لا يكون حدث شيئاً كهذا !!

إزالة ( الكماين ) من الجريف بالرغم من ايجابيتها فى تنقية البيئة الا أنها أوقفت الكثير جدا من أهالى الجريف من مواصلة أعمالهم التى تربوا عليها وتعلموها من أبائهم وفقدت بعض الأسر مصادر دخلها ..تضرر البعض وكانت خيراً للبعض الآخر ... كيف يرى ذلك عصام عبد الصادق ؟؟؟ وما هو الأفيد للجريف ككل ؟؟؟؟

كل شخص يتمنى أن تكون منطقته هى الأفضل ..
لكى نجعل الجريف متطوره أكثر مما هى عليه .. ما هى إقتراحاتك ؟؟؟

الكيزان أو العسكر !! ماذا استفادت الجريف منهم فى ظل ادارتهم للبلاد ؟؟؟ وهل قدم المنتمين لهم من أبناء الجريف أى خدمات ترضى طموح اهالى الجريف بصورة عامة وهل عصام عبد الصداق راضى مما قدم كيزان الجريف لمنطقتهم ؟؟؟ وماذا تقدم أنت للجريف اذا كنت فى مكان أحد من يتولى منصب قيادى فى الدولة ؟؟؟

أخوك مصطفى المحسى
معذرة للاطاله

استاذنا عصام متعك الله بالصحه والعافيه

خروف عصام بتاع الضحيه بنضبح ثالث يوم في العيد كل سنه ..

نحن بنمشي نضبح ونقيل فيه وكل زول بشيل كومه ويمشي ماهو السر في ذلك على الرغم انك ليس من ناس الشهر ( عيد الحوش)؟

الفنان الجرافي ود النقر كلمنا عنه ؟

فريق السهم بالنسبه لعصام ؟

مسخينا "اللذيذ"
في الكرسي الساخن حقي قلت لي : لو طلبت منك تقلب الهوبه .. وقلت ليك انا ما بقدر اقلب الهوبة لكن ممكن اقلب الشُنْقُلت ..
السؤال : لو اتيحت ليك فرصة "دبل كيك" بتعمل شنو ؟!!

استازى(عصام) ( كعل)

ياااااااااااااااااااااااااااااااااخى بالغته شمته فينى
الحبيبب عبدالله والعدو ابو المريودة والشيخ معز السمانى
والقصاص نبيل احمد على .

وهاااااااااااااااااااااااااااااااااااااااااااااااااااااااااااااااااك

الكرسى...الساخن2 - صفحة 3 42

اهاااااااا ..... شربوتنا فيهو دخان رايك شنو.

وكل سنة طيبين

مصطفى المحسي كتب:
الاخ عصام عبد الصادق
تحية ود واحترام وكل سنة وانت متكئ على قمم السعادة وبما أنك فى الكرسى الساخن وددت أن أشارك ببعض الاسئلة أتمنى أن لا تكون ثقيلة عليك ماذا يقول عصام عبد الصادق لشخص من خارج الجريف عندما يسأله عن الجريف ويريد معرفتها ؟؟؟
الجريف شرق مدينة سودانيةعريقة تقع قبالة العاصمة السودانية الخرطوم وتقع على الضفة الشرقية للنيل الأزرق ، وتحتضن الرمال البيضاء والتي تشكل لوحة فنية مذهبة مع إنعكاس أشعة شمس الأصيل عليها . وتتكون مدينة الجريف شرق من عدة أحياء مشهورة وسوف يلفت إنتباهك كثرة المساجد المشيدة داخل أحياء الجريف بمآذنها العالية وأيضاَ الصهريج والذي يعتبر الأعلى في منطقة شرق النيل ومعروفة كذلك بترقيم المحطات ، حيث تستقبلك في البدء في بوابتها الشمالية أحياء أولاد باعو او المشهورة بهب النسيم او محطة (10)ومعظم أهلها جعليين ، ثم تنتقل خطواتك لتلتقى في (9) بأحياء المحس ، والتى تحتوى على عائلة كبيرة وهما الأخوين حاج الضوء و الدليل ، لذا اطلق علي الحى هذا الاسم (فريق حاج الضوء والدليل ) ، ثم تلتقى في محطة ( Cool

احيانا يطلق عليه ( حى المناشير ) وأحيانا يسمى محطة العشاى ، ثم تتجه خطواتك لتدخل في رحاب ( جريف قمر ) حيث يستقبلك مسجد العارف بالله الشيخ حاج عبدالله نابري عليه الرحمة والمغفرة و جريف قمر حى كبير يحتوى على السوق الرئيسى لمدينة الجريف شرق ، ثم تأتى أحياء (سرحان)، وهو على إسم الشيخ العلامة المعروف الفكى سرحان رحمه الله ، ومن ثم تدخل إلى نطاق ساحة الميادين التي تخرج منها أفذاذ اللاعبين وبعدها تظهر أمامك أحياء الجريف كركوج .. والتي يفصل بينهما طريق النص ويقسم كركوج إلى الحلة والنمر وهما أيضا مقسمة لأحياء . . حتى تصل إلى المحطة الأخيرة في كركوج وهو حي فريق الشفيع... وبمثل ما أستقبلك مسجد أولاد باعو في أول الجريف سوف يستقبلك جامع الفكي خليل في آخر محطة.
ويشتهر أهالي الجريف بالزراعة وصناعة الطوب الأحمر والتي توارثوها منذ زمن بعيد... وكذلك متخصصون في بناء المساجد والغباب .. وجميع مدن السودان تشهد لهم بانهم قاموا ببناء المساجد فيها. والجريف من المناطق العريقة التي ما زالت محتفظة بتماسك نسيجها الاجتماعي، ومحافظة على عاداتها وتقاليدها.. ومحتفظة بإرث اجتماعي متين يصعب اختراقه أو التسلل إليه.. مع بعض مظاهر العولمة التي إجتاحت جميع مدن السودان.
- ما الأفضل .. الجريف قديماً أم حالياً ؟؟؟ وما هى الأسباب ؟؟؟
والله يا مصطفى أخوي بيقولوا أن القافلة تسير إلى الأمام وبعض الناس ينظرون إلى الوراء .. ولكن سنة الحياة (ماضي وحاضر ومستقبل) .. ومن المفترض أن نكون بحاضرنا الذي نعيشه ونفكر كيف يكون مستقبنا القادم.
ولكن هل يمكننا أن ننسى الماضي .. في ظل التردي الذي نعيشه الأن .. إذن لابد لنا نربط الماضي بالحاضر لنعيش المستقبل .. والجريف ماضيها تليد.. وبرضو أنا بقول يا حليل أيام زمان..
-ما يسمى عند البعض بالتحضُر فى طريقة التعاملات فى المناسبات وأساليبها الدخيلة واللبس الخليع لكثير من الفئات فى المجتمع السودانى و و و !!! كيف يراها عصام عبد الصادق ؟؟؟ وهل امتد أثرها الى مجتمع الجريف المحافظ من وجهة نظرك والى أى مدى أن كان حدث ذلك ؟؟؟ مع أمنياتنا بأن لا يكون حدث شيئاً كهذا !!
أعتقد يا أخوي مصطفى أن الأمور إختلطت وخلال السنوات الأخيرة حدثت متغيرات كثيرة يصعب تغييرها .. وأمور كثيرة ساعدت في هذه التغييرات .. وأنا كغيري عند تمتعنا بإجازاتنا السنوية نلحظ هذه المتغيرات .. وأعتقد كثير من المغتربين ما زالوا محافظين على بعض الموروثات الأصيلة .. وأحيانا وأنت في السودان عندما تحاول التصرف في موضوع ما ... تجد أن العيون والسهام كلها موجهة نحوك ..
وطبعا الأشياء الدخيلة أصبحت موجودة في كل المجتمعات .. ومجتمع الجريف لم يسلم من هذه المعتقدات الدخيلة .. وأثرها واضح وباين .. ولا تحتاج لأدلة .. لأنها أصبحت واقع معاش ... وأعطيك مثال لذلك .. إبني الأصغر لم يتعدى الـ 6 سنوات .. ذات مرة أخطأ وكنت أحاول توجيهه فقلت له لماذا عملت كدة .. فرد بسرعة شديدة وقال لى والله دي عادي لاحظ للجملة والمعني ... فبماذا أرد عليه .. وصدقني رد زي ده نحن ما تعلمناه إلا بعد أن دخلنا الثانوي .. ومع العامة وليس مع الوالد .
أعتقد أن الموضوع كبير ويحتاج لدراسة وكيف يمكننا أن نساير روح العصر بدون أن نتنازل عن تقاليدنا السمحة.
-إزالة ( الكماين ) من الجريف بالرغم من ايجابيتها فى تنقية البيئة الا أنها أوقفت الكثير جدا من أهالى الجريف من مواصلة أعمالهم التى تربوا عليها وتعلموها من أبائهم وفقدت بعض الأسر مصادر دخلها ..تضرر البعض وكانت خيراً للبعض الآخر ... كيف يرى ذلك عصام عبد الصادق ؟؟؟ وما هو الأفيد للجريف ككل ؟؟؟؟
..............!!!!!............!!!!!!!!!!......................
-كل شخص يتمنى أن تكون منطقته هى الأفضل ..
لكى نجعل الجريف متطوره أكثر مما هى عليه .. ما هى إقتراحاتك ؟؟؟
إعطاء الفرصة للشباب خلال المرحلة القادمة وبعيداً عن السياسة والجهوية.
-الكيزان أو العسكر !! ماذا استفادت الجريف منهم فى ظل ادارتهم للبلاد ؟؟؟ وهل قدم المنتمين لهم من أبناء الجريف أى خدمات ترضى طموح اهالى الجريف بصورة عامة وهل عصام عبد الصداق راضى مما قدم كيزان الجريف لمنطقتهم ؟؟؟
لا ... لا ... لا .... لم يقدموا أي عمل للبلاد والعباد .. وكان للجريف هي يا يابا أخه .. عشان كدة مافي حاجة سوف تشفع لهم لتخلد ذكراهم في ذاكرة أهالي الجريف ... ربما هذه النقطة سوف تثير حفيظة البعض ... ولكن أجابتي مبنية على المرحلة خلال التسعة عشر عاماً الماضية.
-وماذا تقدم أنت للجريف اذا كنت فى مكان أحد من يتولى منصب قيادى فى الدولة ؟؟؟
يا زول إت ما نكصيح .. عاوزني أسيب السعودية .
أخوك مصطفى المحسى
معذرة للاطاله ..
وإنت خليت فيها إعتذار والله شهيتني العافية ... وقال إيه .. قال منصب قيادي ... يا عمي روح ... وده كوم وأني أحلم الليلة بالرآسة كوم تاني .. عشان كدة أديني فرصة أفكر..
لكن ما قلت لي إنت منو؟؟ ... وما تقولي مصطفى المحسي ... ومصطفى المحسي منو؟
حسن شمس الدين كتب:
استاذنا عصام متعك الله بالصحه والعافيه
خروف عصام بتاع الضحيه بنضبح ثالث يوم في العيد كل سنه ..
نحن بنمشي نضبح ونقيل فيه وكل زول بشيل كومه ويمشي ماهو السر في ذلك على الرغم انك ليس من ناس الشهر ( عيد الحوش)؟
يعني يا حسن لازم تقلب على المواجع ...
وبالنسبة لأختياري اليوم الثالث .. أعتقد أنها بدعة إبتدعها وكيلي الغالي الأستاذ/ عبدالصادق خالد حاج الطيب .. وخصوصاً أن خطته مدروسة جيداً بالتنسيق مع مجموعة التنظيم .. أنت وبقية العقد الفريد أحمد عبدالرازق هبار واحمد عبدالمجيد (تيسير) وبكري تاج الدين ومعاوية ميرغني ومعتز الصديق وصديق الحاج البشير والشيخ/ طارق الزين والمصيبة ود الجزار .. وأنتم في السودان تقطعوا وتوزعوا في الكيمان وأنا في الغربة مقطعه حشاي ... وخروفي بعد ما كان للضحية أصبح ضحية .. وعبدالصادق مابيصدق ويرسل لى الصور للخروف الراح ضحية .. ألم أقل لك بأنك سوف تقلب على المواجع...
وعموماً هي فعلاً كانت مجموعة طيبة وأسأل ربي الكريم أن يجمع شملكم مرة أخرى ونحن معكم بعد أن فرقت بينكم هذه الدنيا العجيبة..
الفنان الجرافي ود النقر كلمنا عنه ؟
أخونا عبدالله ود النقر .. له منى مليون تحية .. وهو فنان مسكون من ساسه إلى رأسه ( كدة صاح ) وجمعتني به عدة جلسات وإبداعه الحقيقي عندما يجتمع معه حسن على (أمبورا ) ودأئماً أختيارهم يكون للأغاني الصعبة .. ويجيد العزف على العود بصورة إحترافية جداً ... ولكن هو كغيره من مبدعى الجريف لم يجدوا حظهم من الإعلام ...
فريق السهم بالنسبه لعصام ؟
الحديث عن السهم سوف أفرد له مساحة أخرى وفي وقت لاحق
عبدالله محمد نابري كتب:
مسخينا "اللذيذ"
في الكرسي الساخن حقي قلت لي : لو طلبت منك تقلب الهوبه .. وقلت ليك انا ما بقدر اقلب الهوبة لكن ممكن اقلب الشُنْقُلت ..
السؤال : لو اتيحت ليك فرصة "دبل كيك" بتعمل شنو ؟!!
دبل كيك دي ما ظنيت .. ولو عملتها الجماعة حايجو يجمعوني حته حته .. ... لكن بالنسبة لي مافي طريقة إلا أجي ناطي جوز ...

الاخ عصام

السكن مع الاخوان ازهري الجاك وانور محمد الحسن !!!!!!!!!
الاجابة مفتوحة

معز عبدالمنعم كتب:
السكن مع الاخوان ازهري الجاك وانور محمد الحسن !!!!!!!!!
الاجابة مفتوحة
أخونا معز لك التحايا
أزهري ود خالي ونسيبي متزوج بنت أختى بدور وأتينا سوياً من السودان في طائرة واحدة ولم ولن نفترق .. تعلمت منه الصبر وقليل من المحنة ..
أنور محمد الحسن .. رفيق دربي ونسيبي ومتزوج بنت أختى ابتسام.. تعلمت منه أن أعيش على الفطرة... وعموماً المتابع سوف يجد تناقض بين الشخصيات الثلاثة وأنا طبعاً الحمل الوديع وسطهم.
عموماً يا معز الجماعة ديل ورقهم محكوم شديد خلاص.
لك التحية ولأسرتكم الكريمة ....

أخونا عبدو كمبيوتر ... تحايا كتار ليك
والشكية لله .. إنت طيرت الريش من الدريش وفكيتني عكس التيار ومشيت
عموماً ... أنا نبهتك وقلت ليك خليك صاحي .. ويظهر أنك نسيت أن الأستاذ الخضر قال عني لا بتفوت منى واردة ولا غزالة شاردة .. لك التحية

أخي الغالي عصام ود حاج عبدالصادق
لك التحية
بالنسبة لي أنا ما زلت في لحظة قراءة ومتابعة لجميع أقسام المنتدى الأخرى ومنها قد تابعت كل ردودك في الكرسي الساخن والتي كانت في مجملها معبرة عن شخصيتك التي عرفناك عليها ..
وأعتقد أن الأخ عبدو وفق في طرح بعض أسئلته وكذلك بقية الأعضاء .
هنالك أسئلة تقليدية ولكن برضو سوف أطرحها عليك وذلك لعلمي التام بأن مواقفك الطريفة عديدة .. وكذلك مقالبك مع بعض الأخوان لا تعد ولا تحصى ...
- موقف طريف لن تنساه في السودان
- موقف طريف لن تنساه حدث في خلال تواجدك في مصر
- موقف طريف لن تنساه خلال تواجدك في السعودية
- عاوزين تدينا واحدة من مقالبك .
وبرجع ليك تاني لو تذكرت حاجة

شهادة شكر و تقدير

لك أخي عبدو، على فكرة البوست و إدارتك له بشكل عــام. وأعتقد أنه علامة كبرى في هذا المنتدى

و لك أخي و صديقي عصام، على هذا الإبداع ، فما كنت أستطيع الجلوس على هذا الكرسي أبدا !!

حاج على المنشاري كتب:

أخي الغالي عصام ود حاج عبدالصادق
لك التحية
بالنسبة لي أنا ما زلت في لحظة قراءة ومتابعة لجميع أقسام المنتدى الأخرى ومنها قد تابعت كل ردودك في الكرسي الساخن والتي كانت في مجملها معبرة عن شخصيتك التي عرفناك عليها ..
وأعتقد أن الأخ عبدو وفق في طرح بعض أسئلته وكذلك بقية الأعضاء .
هنالك أسئلة تقليدية ولكن برضو سوف أطرحها عليك وذلك لعلمي التام بأن مواقفك الطريفة عديدة .. وكذلك مقالبك مع بعض الأخوان لا تعد ولا تحصى ...
- موقف طريف لن تنساه في السودان
أخوي حاج على الكبر دخل علينا والذاكرة بدأت تمسح ولكن من الذاكرة لي موقف طريف مع أحد الكلاب خلال واحدة من إجازاتي في السودان وأنا قادم من الحلة ناحية الكمائن وفي وسط الخور وذلك حوالي الساعة العاشرة صباحاً شاهدت أحد الكلاب متجه ببصره ناحية جريف قمر وجالس جلسة الكلب المشهورة وبمزاج عجيب جداً وكأنه بيتأمل في الطبيعة أو بيعيد في الذاكرة ويقول في نفسه وينك يا حاج على ووين أيام زمان في هذا الخور .
المهم حتى لحظة وصولي بجانب الكلب لم يحس بي .. وفي تلك اللحظة قررت بأن أخلع الكلب بن الكلب ده .. وفعلاً أخذت عود عشر كبير ولحظة وصولي للكلب صرخت صرخة قوية وضربت الكلب.. وعاوزك تتخيل منظره .. والله الكلب ده إرتفع من الأرض أكثر من مترين وأخذ يجري ويصرخ وبعد برهة توقف وأتجه ببصره نحوي وأخذ ينبح بصوت متقطع .. وصدقني كل ما حدث لم يضحكني ولكن ضحكت من أعماقي لنباحه المتقطع ... لانني فسرته على أنه شتيمة وكأنه يقول لي يا حيوان يا وسخان يا تافه .... تفو عليك.
- موقف طريف لن تنساه حدث في خلال تواجدك في مصر
والله أيام القاهرة فيها مواقف كثيرة جداً ولكن أذكر جيداً موقفي مع أخي وصديقي الزين منصور السني .. وله مني التحية ولأسرته الكريمة ..
أذكر في تلك الفترة وفي عام 82 بالتحديد كان يسكن مجموعة من أبناء الجريف في شقة واحدة ومشهورة بالشقة عشرة .. وفي عز الشتاء أذكر أن بطانيتي .. ليست صالحة للإستعمال الآدمي .. والليل كلو تنكرش منها .. عكس أخونا الزين منصور بطانيته كانت جديدة وبتاعة أولاد ناس .. المهم قررت مشاركة أخونا الزين في بطانيته فكنت أصحو ليلاً وأقوم بإستبدال بطانيتي مع بطانية الزين وأقوم بإعادتها الصباح الباكر ... وخصوصاً أن نومه تقيل جداً .. المهم مشى الوضع على ذلك الحال لأكثر من أسبوعين ... ولكن واحد من الجموعة قلبو رهيف وحنين .. قال يا جماعة الزين ده الليل كلو يقحقح .. وفعلاً أخبر الزين دون علمي... وأنا المسكين قمت صباحاً لإسترجاع البطانية للزين كالعادة ولكن وجدت الزين منفقل عيونه ويتجه ببصره نحوه والشرر يتطاير من عينيه .. ولم ينطق إلا بثلاثة كلمات ودون أن يتحرك شبر واحد .. وأنا حتى تلك اللحظة رافع البطانية وأنظر إليه .. وقال لى إنت الليلة ما إنتهيت ... أنا الليلة ما بنتهي منك ... أنا الليلة بطلع ....... وفعلاً تم الإمساك بي وأخذت أكبر علقة في التاريخ.
-موقف طريف لن تنساه خلال تواجدك في السعودية
المواقف الطريفة في السعودية طبعاً كثيرة جداً وأنت يا حاج على كنت جزء منها .. ولكن أعتقد أن الموقف الأطرف كان معي الأخ أنور محمد الحسن وأخونا مصطفى عبدالرحيم بأن ذهبنا إلى سجن الملز لزيارة أحد الأخوان .. وحسب نظام السجون في السعودية يوجد عسكري ومعه مايكرفون وتعطيه إسم السجين .. ويقوم العسكرى بمناداته عبر مكبر الصوت ليأتي السجين من العنبر .. ولك أن تتخيل صوت مكبر الصوت داخل باحة السجن والعنابر .. المهم أنور طلب إسم السجين صاحب الزيارة وبعد أن إبتعدو عني قليلاً طلبت من العسكري إسم السجين مصطفى وأعطيته الإسم بالكامل .. وفعلاً بدأ العسكري ينادي مصطفى عبدالرحيم الطيب .. لكم أن تتخيلوا منظر مصطفى في تلك اللحظات وخصوصاً للذين يعرفون مصطفى جيداً .. وطبعاً نرفزته سريعة جداً وبيكيل على طول .. وعموماً أخذت نصيبي من الشتائم بعد أن خرجنا .
- عاوزين تدينا واحدة من مقالبك
المغلب الأظرف بتاع أخونا الطيب بخيت ... أذكر في واحدة من إجازاتي أعطاني ثوب لشقيقته زوجة عمنا نبيل عمر ... وحتى تلك اللحظة الأمور كان ممكن تمشي عادي جداً ... .. حيث أنه بعد أن أعطاني الثوب وصرف كلام جميل جداً وأستلمت منه الثوب وقلت له أبشر.. إلا أنه قال لي .. شوف يا جبان بمجرد ما تصل وصلوا طوالي وأوع تديهوا مرتك. ... ومن هذه النقطة قلت في نفسي الطيب بخيت ده براهو جابو لنفسو
وبالفعل عندما وصلت السودان وصلت الأمانه لأصحابها وباركت لأخونا نبيل زواجه .. وقلت له دي هدية زواجكم .. ولم أزد أي كلمة أخرى...
ومنذ تلك الفترة وحتى يومنا هذا الطيب بخيت بيحاول إقناع شقيقته بأنه الأرسل الثوب ولكن دون فائدة.. وعشان كدة الطيب بخيت حتى هذه اللحظة كل ما يشوفني يتذكر هذا الموضوع وكأنه حدث بالأمس وهاك يا شتائم....

عمر حسن كتب:
شهادة شكر و تقدير
لك أخي عبدو، على فكرة البوست و إدارتك له بشكل عــام. وأعتقد أنه علامة كبرى في هذا المنتدى و لك أخي و صديقي عصام، على هذا الإبداع ، فما كنت أستطيع الجلوس على هذا الكرسي أبدا !!
شكرا أخونا أبو مصعب على المرور وربنا ستر من المستخبي
لكن شيل شيلتك لو لم فيك عبدو

لكم جميعآ

ضيوف وزوار البوست

اطيب الامانى بعام ملئ بما فيه
النفع ... والتوفيق ..... وان
ينال الجميع ما يتمنونه....

عام هجرى سعيد
عام ميلادى سعيد

وعيد استقلال مجيد

ود عبد الصادق:
تحية الفه ومحبه
وكل سنة وانته بالف خير.

بمناسبة 2009 هااااااااااااااااااااااااااااااااااااااااااااااااااااك:_

1** 1/1/1956
مازا يقول عصام عن هزا اليوم ؟؟؟

2/ من 1/1/2008 الى 1/1/2009

مازا جرى لعصام؟؟؟؟؟

مازا يقول عصام عن هزا اليوم ؟؟؟
2/ من 1/1/2008 الى 1/1/2009
مازا جرى لعصام؟؟؟؟؟
عبدو أخوي حمدا لله على سلامتك ... ويا خوي وين الحي بيك
شوف يا سيدي يوم 1/1/2008 أحتفلت بعيد الإستقلال بطعم ونكهة السودان خلال إجازتي الماضية
شهر فبراير... كان أسود لأني رجعت من السودان
شهر مارس .. والله ما متذكر حصل لي فيهو شنو
شهر أبريل .. عيك لا حول الله .. عيك..
شهر مايو .. ما متذكر شهر مايو في السنة الفاتت دي جاء أم لا!
شهر يونيو .. والله كان ممتاز جداً .... لي شنو والله ما عارف
شهر يوليو .. وده شهر كم؟
شهر أغسطس ... كنت بجهز حالي لشهر رمضان
شهر سبتمبر .. فرحت بقدوم شهر رمضان وقدوم عائلتي للرياض
شهر أكتوبر .. شهر كئيب .. لأنو أولادي سافروا
شهر نوفمبر ... توابع زلزال شهر أكتوبر لم تنتهي والكرسي الساخن مسخن
شهر ديسمبر ... كنت مزنوق فيهو بالكرسي الساخن.
يوم 1/1/2009 .. كل سنة والجميع بخير

الاخ عصام

ماهي خططك المرسومة بعد استيلاءك على السلطة
اقصد بعد ترشيحك لرئاسة الجمعية بالرياض
......................
......................
.......................
.......................
ماهو حجم التبرعات التى وصلتك لمساعدتك بالفوز بالرئاسة ( رئاسة الجمعية )
.........................
......................
.........................
........................
.....................
ماهى مشاريعك الجديدة للجمعية فى العام الجديد ( بعد اليوم الاسري الاول والاحتفال بالعام الجديد )

اخى عصام الله يعينك على تحمل هذا العبء الكبير !!

لى بعض الاسئله
1/ماهى اهم البرنامج الذى سوف يتم تنفيذها خلال فترتكم الرئاسية؟؟
2/ ماهى المشروعات الخدمية التى سوف تساهموا فيها داخل الجريف ؟؟
3/ ماذا عن ابناء الجريف خارج الرياض هل هم اعضاء فى الجمعية ام ستعملوا لتكوين جمعيات لهم فى مناطقهم تحت رعاية الجمعية ؟؟؟
ولك الشكر
ابوتراجى

» فضل اية الكرسى
» الكرسى..........الساخن..........
» النجم ( ودنابرى ) اول ضيف علي الكرسى الساخن